NG'THU K'THUUK~ 28 - Cho Bible Common Language 2016

¹ Chang shekha cu a u naw kä a gawt ung phi amät dawng ci, Cun ung phi düng ciah chang cu phongkawng ah mäih ah m’gäi ci.

² Khochang ah hmakat nak ung uktu tumat om ne ahei tumat kä om law ba ci. Cunung phi a lu hnga ni ne ng’langkha ciah ang vai gui a om ah a kyak ung, khochang khüighat ne khäng htek ci.

³ Dukhaih ci yawshe nak ciah huham ah cia huham ah ciah chang cu geit m’di ciah khaw k’aa ah mäih ah kyak ci.

⁴ Thukhän kä na läk ah a kyak ung chang shekha täng ah na om ciah kyak ci. Thukhän na läk ah ah a kyak ung ngami hnungtuk püi ciah na kyak ci.

⁵ Changshe gui naw taga nak ah mawng kä hmat ci gui, Cun ung phi Bawipa kawihnah ci gui naw, akni ah hmat ci gui.

⁶ Adukhaih ung phi düng nak om ciah chang cu bämang neta kä düng ciah ta bä tu ba ci.

⁷ Thukhän läk ciah changnong cu lunglang ciah kyak ci. Kä nik ciah chang awn khawtsheng ciah chang cu, apa ah thüi nak vai ah kyak ci.

⁸ Chang gui ah khan ah na lak ah a taw anglon awn na bühmang ah akyak ung, nang ah khawh cu dukhaih ci m’gein ciah chang ung gawk yawp khai.

⁹ Thukhän kä na läk ah a kyak ung nang ah taigü cu Khanpughi naw teng ne thüinak aih vai ah ng’yak ci.

¹⁰ Changnicu akshe bi vai ah nak k’tük ah a kyak ung nang cu na mät ah thaai ung na kyak khai. Changnicu ak bä ah m’cümhnah nak gah khai.

¹¹ Bühmang ciah chang gui naw angtäi sei ami mät cüivai ci gui ah ngai ci gui.

¹² Changninaw huhmam agah law ung chang päng naw mtaam ngak ci, Cun ung phi changshe naw a uk law ah a kyak ung chang gui thup ne om püi gui ci.

¹³ Na hmakat nak cu k’tha na ne na thuh ah a kyak ung, na ghin nak ung ngawi ah phi ka na naing khai. Na ng’kiaa yawp vai na nawng yawp vai: cun ung Khanpughi naw ning m’gein khai.

¹⁴ Angtai sei Bawipa na lak vai, cun ung na yei khai. Na m’lung aliing ung na shum khai.

¹⁵ Dukhaih ci gui cu uktu gi naw hnu na gui u sei amgein kaa ah kyak ci gui. Ani cu m’ngawk ciah kawng la khawm ah maih ah kyih vai ah kyak ci.

¹⁶ Am lung ngaih ka nik ciah uktu cu m’ghämce ci, Ng’dung nak ka om ciah uktu naw ak shou uk ci.

¹⁷ Chang ngawn ciah chang cu angphuh hmun tha na ne co ciah kyak ci. Kä nami maa nak vai.

¹⁸ Düng ne na om vai, cun ung na phyawng khai. Kana dung ung ang ghit ah nang kyak khai.

¹⁹ Ng’khui ne ng’bik ciah chang cu a ei vai da ci, akhin maih sak düt cicu ang tai sei dukhaih ci.

²⁰ Düng ciah chang naw akbe ah yei nak ah ghin nak hmuk ci. Cun ung phi ang ghit ah na mang hlü ung m’kyuk nak na gah khai.

²¹ M’thuikhang nak cu chei ci. Cun ung phi m’taga khai ah chang cu apihta ah ng’shei nak a om ung chei ci.

²² Amät bäng ang bühmang vai tha nak ciah chang naw dukhaih nak naw a thah law vai cu kä hmat ci.

²³ Chang cu nam shung tu vai, cun ung ani naw ning chang m’sui law pi khai.

²⁴ Nupa ah khawh m’guk cu ka hma ciah ngai ciah chang cu ahei m’guk ei gui ah ta kaa pia ci.

²⁵ Mäthnga kä ngaih nak naw yaica nak law pui ci. Nang cu Bawipa ngaih gep ne na om ung ba pi khai.

²⁶ Na mat ah ngaih ba ah na om cu na gu ang ah kyak ci. Na phyawn nak vai ah cuivai ba pi ciah m’theithang cu na lak vai.

²⁷ Dukhaih ciam na pektak vai, nang ung a i ka hlü ba khai. Dukhaih ciah ma ah na mik nam shin ung chang gui naw ning plahtam khai gui.

²⁸ Chang omshe a huham mah law ung chang gui ng’thup ci gui. Cun ung phi ngami ah huham ang kyak ba ung chang dung gui naw uk ba khai gui.