NG'THU K'THUUK~ 27 - Cho Bible Common Language 2016

¹ Ngawi ung ah phä ah kä khähghah vai, heng ung ngawi ung a i ah akyak vai cu nang naw kä na hmat ci.

² Chang hei gui naw ning m’taam u sä — chang khuihei gui naw phi ning m’taam u sä, na mät naw na mät kä na m’taam vai.

³ Lung la laigin ah gih cu, chang gu ang naw a bi hning ah khüikha nak awn m’täng vai ah kä kyak ci. P

⁴ M’lungshe nak cu nget ngawng nak la dishum nak ah kyak ci, Cun ung phi m’thüikhang nak cu cun ah ta sheka pi ci.

⁵ Chang a i ah kä sui tu ah ang dang ah m’cäi m’ä tu cu bä pi ci.

⁶ Nang khai ah aning bi ung phi teihpü cu khäng htek ci, Cun ung phi gaa läi naw na phleing khan ah a kut a taih ung phi — na geing nak vai.

⁷ Na phü yah ung khoitui phi kä na m’hni khai, cun ung phi na cawi yah ung ei akha phi tuihlim khai.

⁸ A im kä m’tho ba ciah chang cu ang bu nawng ciah kha awn täng ci.

⁹ Tui ng’ui la tui ng’ui tui naw nami m’lung ning yei sak gui ci, Cun ung phi khüikha nak naw ding gei nak cu m’shet ci.

¹⁰ Na teihpüi la napa ah teihpüi cu kä na m’hnih vai, khüikha nak ung na gawk law ung, ning m’htei khai ah na phäi nau kä na k’thäh vai, nani ng’shawng ciah na phäi nau ah ta, na pei ah om ciah na im ng’phei naw, ning m’htei tuba hning khai.

¹¹ Ka hta aw, na cüvai vai, cun ung kei ka yei khai, a u naw a na täitawk ung phi, kei ung ka m’shan nak vai om khai.

¹² Ng’langkha ciah chang naw khüikha nak a gawk law cu, hmu ne hlawi ci. Cun ung phi a i kä ngaih-tüh thei ciah chang cu acun ah ng’lung ah hteit ne lut ci, akawn ah ng’yuu ba ci.

¹³ Ang ciah chang tumat naw kä a hmat man ah chang ah pu ka ning thung pek khai cine shai atak ung amät ah khawh awn athung vai ah pek vai cu a kyän vai nei.

¹⁴ Nang naw na teihpüi cu khongawi htasiik ung m’tho ne, m’lau ne hriham na pek cu, na plahtaam ah mäih ah kyak ci.

¹⁵ Ng’thushai ciah chu cu kho a aa hnüüp ung bek bek ah hteeu ciah tui awn täng ci.

¹⁶ Düm ah om khai ah a i hawkcha ah na m’shümthein khai aw? Khokhi cu k’tha na ne na ng’düm sak hlawt khai aw? Na kut ung be ciah situi cu tha na ne nak pang hlawt khai aw?

¹⁷ Chang gui cu tumat la tumat ng’thei theng tuk ci gui, m’sii awn m’sii k’tah ah mäih ah kyak ci.

¹⁸ Thei ghing cu na m; htei ung thei na ei vai om khai, A bawi m’hteihtang ciah changshäm cu m’taamkhah nak om ci.

¹⁹ Tui ung dang sei na hmuh cu na mät sah hmai ah kyak ci. Na mät ah na m’lung hmuh sak cicu na mät ah kyak ci.

²⁰ Chang ah ng’yak hlü gui cu sih nak khaw ah mäih ah kyak ci, angtäi sei akhan om ba hnga mä ci.

²¹ Ghui la ngui cu mei awn m’nüm ah kyak ci, chang ah ming thang phi acun ah mäih ah m’nüm vai kyak ci.

²² Nang naw chang a gu ang a sih ü awng güt na m’ghuih ung phi, ani ah gu ang nak cu ani ungka maih khai ah kä na m’ghuih hlawt khai.

²³ Na sei la na me cu na m’khüt hning hlawk ah na m’htei vai,

²⁴ A i ah kyasei ci ung khawh cu kä ng’täi ci, changpakhui gui phi ng’täi ne kä om ci gui.

²⁵ Nang naw m’htung ng’nawi yung ah khu k’paai ne m’ghaw nak paai ci, Cun ah yah ung ahei khu gui tho bi ci.

²⁶ Nang naw na htome mu awn suisak na pyang hning ci, na me gui amshah yoi ne na gah ah ngui awn khaw na thong hning ci.

²⁷ Pawih ba ciah me gui ungka me suuk cu nang la na kyong ungka ah phäh ah kyak khai, na changshäm hnumi hta gui ah phäh ah phi kyak khai.