NG'THU K'THUUK~ 26 - Cho Bible Common Language 2016

¹ Akgu ang m’taam cu akholä ah kyak ci, khoicha ah khoitui, geit khäm khin ung kho aa ah mäih ah kyak ci.

² Plahtaam naw kä ning kyuk khai, ngami awn kä na khinkha ung. Ngami cu kä ngo phung ne yong ciah kha awn täng ci gui.

³ Nang ung ng’se teeuh nak vai, laa kaih nak vai, chang gu ang thah nak vai om ci.

⁴ Ak ang ah ning shi cu na m’shan ah a kyak ung, nang phi ning shik ciah chang ah mäih ah na ang ciah kyak ci.

⁵ Akcang ah ng’shik cicu akcang ah m’shan vai, Cun ung ng’shik ciah chang naw ani cu amät ah ngaih hlawk ah kä lung lang ciah hmat lawk khai.

⁶ Ak gu aang am ng’thu na pyen sak ah a kyak ung, na mät naw na mät ah khaw na m’chün ciah kyak ci. Nang cu khüikha nak na k’thäh ciah kyak ci.

⁷ Chang gu aang naw ng’thu thuuk mang hning ci, a cun ah mäih ah a khaw nget ci naw a khaw mang hning ci.

⁸ Chang gu aang m’taam khah cu yaili ung lung phun ne kah ah mäih ah kyak ci.

⁹ Ak gu aang naw thu thuuk a pyen tu cu awktat ciah chang naw a kut ung shun ciah ng’hling ak kawih ba khit ah mäih ah kyak ci.

¹⁰ Ng’ghüh ciah chang naw ak gu aang ghüh ne a law püi ah a kyak ung ng’gui phaa ciah chang päng nat sak ciah kyak ci.

¹¹ Ui naw am lawk a hteh ba shi ah mäih ah chang gu aang naw akshe a bi cu bi ba mä ci.

¹² Sheka pikbäih ciah ak gu aang pang cu, amät kä cüivai mui neta, cüivai ciah ngai ciah ta bä tuba ci.

¹³ A i ah kyasei dam ciah chang cu im ah akpung ah kä luh law ah a om ang? Ani naw a i ang a kyih, phongkawng ang?

¹⁴ Chang dam cu ih phak ung ng’hleei ci, ani cu m’kawt khän ung ng’phiui cu ah m’kawt awn a i kä ng’lak nak ci.

¹⁵ Chang amshah gui cu ami shai ung buh ami hang bai vai ah phi dam ci gui,

¹⁶ Chang dam naw amät ah ngaih nik ciah amawng ama pe hning ciah chang sing chih ah ta, hmuhmat tuba pi ciah ngai ci.

¹⁷ Na mät ah mawng ah kä kyak ci lut ne na ng’cuhcan tu cu lam ung hteit neta ui ak hnga ung paang ne kaih ci awn täng ci.

^18-19 Chang akshe ung hteh püi neta, gaih vai ah ka kyak nei, cik ci cu, sik nak vai ah meili gü nak ciah ak gu awn täng ci.

²⁰ Sing kä a om ung mei sik ci, ng’pyen sak nak kä a om ung ng’tukvook maih ci.

²¹ Mei k’eh naw meicak cu ng’ai sak ci, Sing naw mei cang sak ci, Khüikha nak bik ciah chang naw ng’cuhcan nak thawh sak ci.

²² Ng’pyen sak nak cu hlim aih ci, a i hlawk ah mikmi naw mi k’düük hlük ci ang?

²³ Akcang ah na ngaih-tüh thup ciah kä ni ciah thu cu, a phu yün ciah m’dek am ah khan ah hman akni hei dak ah mäiha ah kyak ci.

²⁴ Thuvi ciah chang naw a thüi nak cu kä düng ciah ng’thu ah hnu ah ng’thup ci.

²⁵ Cun cu däm khai, cun ung phi kä nami yum vai, ai ah kyasei ci ung ani ah m’lung cu thüigen nak awn be ci.

²⁶ Ani naw a thüigen nak cu m’yih ci, Cun ung phi ani naw akshe a bi gui cu, päng naw hmuk ci.

²⁷ Chang hei ah awh nak vai ah cuun cuung ci gui cu, ami mät awk ba ci gui. Näng lawk ciah chang gui cu dishum ci gui.

²⁸ Nang naw chang tumat thüi na ne nat nak a gah vai ah na m’hleei ci. Kä nik ciah ng’thu m’gawng cu a kholä, di nak ah kyak ci.