NG'THU K'THUUK~ 25 - Cho Bible Common Language 2016

Solomon ah ng’thu thuuk ba gui

¹ Shin cu Solomon ah thu thuuk ba gui, Judah ghangpughang Heyekiah ah yung ah saya gui naw ami ku tuba ah kyak ci.

² Khanpughi cu kami m’tam ci, am yih m’thuh ah mawng ah phäh ah, ghangpughang gui cu kami m’taam gui ci, ami cangkha ah phä ah.

³ Ghangpughang naw ai a ngaih-tüh cu nang naw kä na hmat ci, ani ah ngaih-tüh cu kä mi pha ci, khomik ah mäih ah hlüng ne tuinu ah mäih ah thuuk ci.

⁴ Ngui ungka ang eek gui cu lak yawp ah a kyak ung ngui shep ci naw akiom ah shep khai.

⁵ Akshe ah m’cumcäi thei cicu ghangpughang ungka kami k’täm khai. Aniah uknak cu ataga nak awn avan naw hmat khai.

⁶ Ghangpughang ah ma ah na ng’düih ung nak tawt vai ah kä na tha nak vai, na küikyang ciah kä na ngaih vai.

⁷ Hlüng pi ciah ngoh nak vai na k’thäh tu ah ta, küikyang tuba ciah chang am na ngoh nak na m’hnawn vai ah na pyen tu cu mä tupi ci.

⁸ Na hmuh ah mawng pyen vai ah ang ghit aih ah yung ah kä na hteh vai, a kawn ah ahei saksi naw law ne na hma ciah a pyen ung a i ah na kyak khai aw?

⁹ Nang la na im ng’phei ung ngaih kä ng’hmat ci a om ung na ni mät naw nani m’dim vai. M’yih thuh gui phung api phi kä nami m’thawh en vai.

¹⁰ Kä cun ung chang nü naw a i kä nami m’yih hlawt ciah hmat khai. Cun ung kä ng’aa ne kä nami om hlawt khai.

¹¹ Ng’htei khai ah m’dang ah ngaih-tüh nak cu ngui ung ng’lin ah ghui lawi ah mäih ah kyak ci.

¹² Ngai yak hlü ciah chang am hmuhmat nak om ciah chang ah pek ah m’shümthein nak cu, ghui kutcüp, kä ung, ghui akni awn pyan ah cünglung ngamä a phu küi pi ci.

¹³ Bä ciah ng’shä cu tüi ciah chang ah phäh ah k’tha m’thaai nak ah kyak ci, Geit khäm ah khin khaw ang ling yah ung tui gei ah mäih ah kyak ci.

¹⁴ Shaitak bi neta kä pe phung ciah chang cu, kho kä aa sak phung ciah khongmei la khokhi ah mäih ah kyak ci.

¹⁵ M’lung neim skak ne ng’ge ng’pai nak naw akhüighat pikbäih acu khep hning ci, uktu gui phi lu hnga päng sak ci.

¹⁶ Nang ung hlü ciah kawn ah m’däm ne khoitui kä na ei vai, ada aih ung ning lawk sak khai.

¹⁷ Na im ng’phei ah ashäng shäng aih kä na om tu vai. Ani cu nang ah phäh ah bawngbai neta ning gen lawk khai.

¹⁸ Kä hman ciah ng’gu k’bün nak cu sih nak ah khim ghat, htung tawn la m’la ak ghat ah mäih ah kyak ci.

¹⁹ Ang cet yah ung kä b ä ciah chang ung ng’khüi cu ha ak hnet awn htui ne ei ei ah mäih, a kho hnget ah hteh ah mäih ah kyak ci.

²⁰ Am lung thüi aih ciah chang am ng’äi m’cu cu kho am yu ah hnüüp ung ak htu suh pek awn täng ci, khei ung m’shi shum awn täng ci.

²¹ Na gaa a cawi ung ei na m’bei vai, tui agha ung tui na tu vai,

²² Nang naw ani cu ng’aa nak awn uih sak ci sei, Bawipa naw nang cu ning m’cümhnah khai.

²³ Siip khokhi naw kho k’aa a law püi ah mäiha ah chang pyensak nak naw m’lungshe nak law püi ci.

²⁴ Ng’tukvook ghüh ciah chu awn im ät ung om ah kdam ah ta im khuih ah khan ah kai ne om cu bä tuba ci.

²⁵ A sho nak kho ah kaa ngh’thu ni ng’yak cu kho hu sei tui gha neta tui ak gei awsk ah mäih ah kyak ci.

²⁶ Changnicu changshe ah mäih ah am lungsi ung m’no ciah tuihta, thuk ciah tuibüm ah mäiha ah kyak ci.

²⁷ Khoitui ada aih ah a kyak ung nang ah phäh ah kä nik ci, a cun ah mäih ah m’taam khah vai tha nak aih phi kyak ci.

²⁸ Na m’lungshe nak kä nak üüp hlawt ah a kyak ung vongpaang kä om ciah mang gaw tuk ghet vai ah auh ciah mäih ah am gein kaa ah na kyak khai.