NG'THU K'THUUK~ 24 - Cho Bible Common Language 2016

-19- Agha lei kaw nak thu thuuk

¹ Changshe gui kä nami vamneng nak vai, ngami awn ng’khawt vai ah phi kä nami tha nak vai.

² Khüikha nak bi vai cu angtäi ah ngami ah ngaih-tüh ah kyak ci. Akhin päng ung chang tumat mat cu nat sak vai ah ami shai m’an ci gui.

-20- Amku nak thu thuuk

³ Im cu cüivai nak la lunglang nak ung k’säm ne cawh ah kyak ci.

⁴ Avan ung hmuhmat nak be ci, Akyong ung a phu küi la nikiom ciah im khawh awn be ci.

-21- Amku lei ät nak thu thuuk

⁵ Cüivai nak cu thagui ah gai nak ah ta bä pi ci. Hmuhmat nak cu tha ghat nak ah k’tha ghaat nak ah ta küikyang pi ci.

⁶ Cun kawn ah ng’tuk kä na bi pha ung geik na ne na pawng htei vai. M’cumcä nak akni na gah pi ung na näng vai ng’hteicha pi khai.

-22- Amku lei goinak thu thuuk

⁷ Cüivai nak ng’thu cu thuuk aih ciah kyasei, chang gu ang naw kä hmat yäi ci. Küikyang aih ciah amawng gui pyen sak law ung ani naw a pyen tu vai a i kä om ci.

-23- Amku lei thum nak thu thuuk

⁸ Nang naw angtäi sei akshe bi vai ah na pawng püi ung khüikha nak bik ciah chang ah na ming thang khai.

⁹ Bilawh nak phung ung akshe ah ngaih-tüh cu katnak ah kyak ci. Amät akholä vai nak cu na gah vai, cun ung ma lam ah khaw dei khai. Ah kya ne chang a i ah kä sui cicu chang gui naw thüi nak ci gui.

-24- Amku lei phli nak ng’thu thuuk

¹⁰ Nang cu küikyang ciah akhin ung na tha aken ung akcang ah na tha ken khai.

-25- Amku leihma nak thu thuuk

¹¹ Kä taga ciah sih nak m’kyuk nak gah ciah chang cu, gun tu vai ah kä nami ng’giin vai.

¹² Nangmi naw nami bi vai ah kyak ciah kä nami ngai khai. Cun ung phi Khanpughi naw nami m’lung ngaih cu hmat ne m’khoichak ci. Ani naw k’pang ne ning ngäng gui ci, ning hmat gui ci. Ani naw nami bi ah ciah ning m’cümhnah gui khai.

-26- Amku lei chuk nak thu thuuk

¹³ Ka hta aw, khoitui ei ä, cun cu nik ci. Khoi phiai ungka khoitui ah mäih phi m’lei ung tui ci.

¹⁴ Nang naw na ngaih gep khai, Cüivai nak cu mümcha ah ni nak ah kyak ci. Cüivai nak cu na gah vai. Cun ung ma lam ah khaw dei khai.

-27- Am ku lei chih nak thu thuuk

¹⁵ Chang shekha ah mäih ah kä na kyak vai, ani naw düng ciah chang gut tep ne, ami im ungka ahei ah hteh püi ci.

¹⁶ Düng ciah chang cu a i chü vei a kyuk ung phi a i ah kä kyak ci. Angtäi sei tho ba ci, cun ung phi chang shekha cu leigai naw m’di ci.

-28- Am ku lei cheit nak thu thuuk

¹⁷ Na ga naw hungsai a bui awt law ung kä na yei vai, ang vawn tam ung kä na yeikyai vai.

¹⁸ Nang naw yei ne na teng cu Bawipa naw hmat khai, Kä m'hni khai. Ani naw kä m’kyuk khai.

-29- Am ku lei kaw nak thu thuuk

¹⁹ Chang shekha gui naw kä ning ng’ä ai sak en u sä! Kä na vam neng en nak gui vai.

²⁰ Chang shekha cu ama lam ah ka vai a i kä om ci — Ma lam ah a hmuh nak thei vai a i kä om ci.

-30- A thumkip nak thu thuuk

²¹ Ka hta aw, Bawipa cu na kyih aa vai, Ghangpughang cu na m’tam khah vai. Ngami hnungtuk püi gui ciah chang awn nami bi ghawm vai a i kä om ci.

²² Cun ah mäih chang cu a shänghta dishum khai. Na ngaih-tüh ne ang? Khanpughi kä cun ung ghangpughang naw leigai kyak sak hning ci, ci cu?

Thu thuuk gui hteh

²³ Cüivai ci naw shin cha ah phi thu pyen ci; vangtäng kumtu ne m’khoichak ciah suki cu hma ci.

²⁴ Changkaa cu changni nei cine ani naw a shäi ah a kyak ung, Ani cu chang päng naw plah tam ne thüi nak khai.

²⁵ Changkaa m’kyuk ciah suki cu a i ah kyasei phi bämang ne, akni ah aming thang khai.

²⁶ Düng ciah m’shan nak cu teihpüi akcang ah m’hnüt nak ah kyak ci.

²⁷ Im kä na cawh cang vai, kyong khui kä na pyan cang vai, na khaw ma loma ng’htei khai ah, na mät naw na hnun na m’ghin hning ciah ng’htei khai ah na bi tu cang vai.

²⁸ Cang nak ah amawng kä om ciah chang tumat hnungtuk püi ne, kä na saksi vai, ani ah mawng kä akni ah kä na pyen vai.

²⁹ “Kei ah khan ah a bi ah mäih ah ani ah khan ah ka bi tuba khai, a bi ah mäiha ah ka thung ba khai” cine kä na pyen vai.

³⁰ Dam ne gu ang ciah lo la sapyit lo sun pah ne kä ka hteit ci.

³¹ Cun cu ng’hling plum awn be ci, m’ghaw bäng ah kyak ci. Lung paang cu piawn ne kya lawk ci.

³² Kei naw cun cu teng ne ka ngai ci, ng’thei nak tumat ka gah ci.

³³ Na ng’yak hlü ung na gam vai, na ih vai, Na kut kep ne ashäng na ng’düm vai.

³⁴ Cun ung phi nang na ih yah ung dukhaih nak naw m’guk ei ah likhim ah mäih ah ning näng khai.