NG'THU K'THUUK~ 23 - Cho Bible Common Language 2016

-6- Akchuk nak thu thuuk

¹ Bawi awn atäng sah ngo ne ei na ei law ung, ani a u ang cicu na m’lung kyong ah na hmat vai.

² Nang cu na ei aih ciah a kyak ung, na mät naw na mät na m’cäi vai.

³ Ani ah ning m’bei tu ei akni cu kä na ei hlü aih vai. Ani naw a ning m’hleei vai ah k’tha nak khai.

-7- Akchih nak thu thuuk

⁴ Bä ciah na cüivai vai. Bühmang vai ah kä na tha nak aih vai.

⁵ Na ngui cu kho lailäp ung maih hning ci. Cun cu ang phia om law ne langta ah mäih ah ahei ah yong khai.

-8- Akcheit nak thu thuuk

⁶ Sing hnaw ciah chang ah tawnglang ung kä na ei tu vai. Ani ah ning m’bei ah ei akni cu kä na ei hlü aih vai.

⁷ “Law ä, ng’khap ba ä!” cik khai, cun ung phi akcang ah kä kyak ci. Ani ah ngaih cu ahei.

⁸ Nang naw na ei tu na m’luak ba khai, nang ah ni nak phi maih yawp khai.

-9- Ako nak thu thuuk

⁹ Chang gu ang aktung ah kä na ng’htau püi vai. Ani naw ai ah kä sui khai.

-10- Agha nak thu thuuk

¹⁰ Ng’giilung phyim cu kä nami m’hnawn vai. Hmeihta ah khaw hmun cu kä nami guh pek vai.

¹¹ Bawipa cu huham mah ciah ami ng’shung nak ah kyak ci. Ani naw ngami ah mawng ung ning hnungtuk päi gui ne, ng’thu pyen khai.

-11- Agha lei ät nak thu thuuk

¹² Na saya cu na cun ngaih vai, apäng avan ani ah na ng’thei tu vai.

-12- Agha lei goi nak thu thuuk

¹³ A hmaw beit m’cäi vai ah nami kut kä a ng’giin vai. Ani tu that ne m’cäi nak naw ani kä ngawn khai.

¹⁴ A cun ah bi nak awn ani ah ghin nak cu hun ah kyak ci.

-13- Agha lei thum nak thu thuuk

¹⁵ Ka hta aw, nang na cüivai law ung kei cu ka yei aih khai.

¹⁶ Nang naw cüivai nak awn ng’thu na pyen ka ng’yak ung kei cu ka ta äh khai nei.

-14- Agha lei phli nak thu thuuk

¹⁷ Hmakat ciah chang ah khan ah kä nami vamneng vai, Bawipa kyih aa sak ne, nami ghin päi vai.

¹⁸ Cun ung nang ah ma lam ghin nak dei khang khai.

-15- Agha lei hma nak thu thuuk

¹⁹ Ngai ä! ka hta aw, Cüivai ne na ghin nak ah lam cu ak thuuk ah na ngaih-tüh vai,

²⁰ Zu akda awk ci la ei akda ei ci gui awn kä nami m’gu pawn vai.

²¹ Awktat ci la ei tat ci gui cu pyam nak pyang ciah kyak ci gui. Na bilawh phung cu ei la ih bäng ah a kyak ung nang cu tuhbäi ge suishe na sui khai.

-16- Agha lei chuk nak thu thuuk

²² Na pa na ngaih vai, ani kä a om ung nang kä na om khai. Na nu a ghi law ung ani naktung aih nak cu na m’dang vai.

²³ Düng nak, cai nak, theithang nak la m’lung ngaih ni — shin gui cu a phu käi ah hleih vai. Cun ung phi nang ah phäh ah yoih vai cu küi aih ci nei.

²⁴ Düng ciah chang ah apa cu a yeikyai nak vai ah amawng akni om ci. Nang cu cüvai ciah na hta awn na khäghah hning ci.

²⁵ Na nu la na pa cu nang awn ani khäghah vai ah na bi vai. Acun ah mäih yeikyai nak cu na nu am na pek vai.

-17- Agha lei chih nak thu thuuk

²⁶ Ka hta aw, na m’lung ngaih na na pek vai. Ka ghin nak cu na ng’thei thei vai nei.

²⁷ Pawmyau ci la lawk lak ciah hnumi cu sih nak ah cuun ah kyak ci.

²⁸ Ngami naw m’gui ei ah mäih ah ning ngäng ci gui. Chang akda kä bekhüt khai ah ngami naw bik ci gui.

-18- Agha lei cheit nak thu thuuk

^29-30 Zu akda awk ci, tha na ne shui ne akthai awk cicu na m’dang vä. Amät ah phäh ah m’lung thüi nak ayä nak bi ne, angtäi sei cümbawng nak, ng’thu m’da nak bik cicu ka ning m’dang gui khai. Ani ah mik ci si ah m’dei ci. Ani ung akyong leim nak om ci, Ani naw hlawi hlawt khai sü te,

³¹ Yu naw kä ning tüihtok en sä. Asen ah atui ung phi, khap ung avai ung phi, ng’mi müi ne a kyak ung phi,

³² A ngawi ung khaw ngawi nang cu k’phyu m’äm mah ah htuih ah mäih ah na kyak khai nei.

³³ Na mik awsn apäng päng na hmuk khai, na m’lung ngaih, na ng’thu m’gawng kä ci ng’ciim khai.

³⁴ Tuinu ah khan ah na om ciah mäih ah na ngai khai. Nik phiui khai, ng’lau ciah htinpaw htung ung akhlüng ah na ng; cuum ciah mäih ah kyak khai.

³⁵ Nang naw “Kei cu na m’ghuih khai gui, kei cu na that khai gui, cun ung phi kä ka shüm ci, A i ah kyasei kei kä ka thawh law hning? kei ka awk ba mä vai hlü ci” na cik khai.