NG'THU K'THUUK~ 22 - Cho Bible Common Language 2016

¹ Nang naw na ghü law ung nik ciah ming thang nak la bä ciah bühmang nak ungka nik ciah ming thang nak cu na ghü vai nei.

² Bühmang ci la du khaih ci ung a shin cu atäng ah om ci, ani nik hnih cu Bawipa naw atüipian ah kyak ci.

³ Langkha ciah chang naw khüikha nak a gawk law cu hmu ne hlawi ci. Cun ung phi a i kä ngaih-tüh thei ciah chang cu acun ah ng’lung ah hteit ne lut ci, akawn ah ng’yu ba ci.

⁴ Bawipa cu läk äm’lung neim sak ä, cun ung na bühmang khai, m’tamkhah nak na gah khai, akshou na ghing khai.

⁵ Na hnun gui na m’hni ah a kyak ung alam päng ung changshe gui phak ciah cuun awn ng’shawng khai ah na om vai nei.

⁶ A hmaw cu a i cha ah a ghin vai ah m’theithang vä, cun ung a ni naw aghin nak chuih shüm ba khai nei.

⁷ Dukhaih ci gui cu bühmang ciah changshäm ah kyak ci gui, ngui na pu ung nang cu ngui ng’pu ciah changshäm ah na kyak ci.

⁸ Kä taga ciah geit m’shi na phu ah a kyak ung leigai ah tho lawk khai, chang na shedam nak phi ng’pyi khai.

⁹ Dukhaih ciam ng’khailang ne na ei nak pai tu vai, A cun ah phäh ah phyuhtheh nak na gah khai.

¹⁰ Chang omshe gui cu nami nawt heng vai, Cun kawn ah ng’cuh vah nak, ng’vokshan nak, ming m’shet nak gui kä om ba khai.

¹¹ Nang naw theingcim ciah m’lung la bä ciah ng’thu cu na m’hni ah a kyak ung, ghangpughang cu na teihpüi ah kyak khai.

¹² Bawipa naw amdang nak cu hleei ciah ng’thu kä k’bäi nak awn düng nak khän sak ah kyak ci.

¹³ Chang dam cu im ah om ci, k’pung ah ka luh law ung phongkawng naw na lo khai, cik ci.

¹⁴ Pletbeng nak cu cun ah kyak ci — Acun naw Khanpughi naw am lungshe nak ah chang cu phak ci.

¹⁵ Ak hmaw hta gui cu ami ng’tüi püi ah hmü hma thei ci gui, a i kä geing na thei ci gui. Cun ung phi akni ah that ne m’cä ung, a i cha ah ami ghin om vai m’thein ah kyak ci.

¹⁶ Bühmang ci am m’cümhnah pe ne, kä cung bühmang vai ah dukhaih ci na yawshe nak ah a kyak ung, na mät cu na pyam lawk khai nei.

Cüvai ng’thu thumkip

¹⁷ Ngai vä! keinaw cüivai ciah chang ah ng’thu ka ning m’thein gui khai. Ngami ah m’theithang cu nami ng’thei vai nei.

¹⁸ Cun nami shüm ba ung nami yeikyai khai. Mang ah phi nami mang khai nei.

¹⁹ Bawipa ung nami yum nak a htek vai cu kei naw ka ng’ya hlük ci nei, Cun cu keinaw nang mi am tuhbäi ka ning m’thein gui hlü ah kyak ci.

²⁰ Kei naw nangmi ah phäh ah ng’thu thuuk thumkip ka guk ci nei. A cun ung hmuhmat nak la nik ciah m’cumcä nak om ci.

²¹ Cun kawn ah ng’düng nak akcang cu ka ning m’thein gui khai. Shin nami shui khai ah ning tüih gui ung, nangmi naw hman ciah m’shan nak cu nami law püi ba khai.

-1- Atumat nak thu thuuk

²² Dukhaih ciah chang ah hawh cu na bi nak hning awn kä na lak pek vai. Am gein kaa ah yung ah m’kawt ung düi ciah khawh kä na lak pek vai.

²³ Bawipa naw ngami ah mawng ma cu pyen pe gui khai. Ngami m’kyihkyawk gui ciah ghin nak cu m’kyihkyawk khai.

-2- Akhnihnak thu thuuk

²⁴ Am lung so ci, sohai m’lungshe ci awn kä nami khawt sheng vai.

²⁵ Nangmi naw ngami ah om ih düt ng’thei tu u ne kä nami ng’thawng ba hlawt khai.

-3- Akthum nak thu thuuk

²⁶ Chang tumat mat ah pu ah phäh ah kei naw ka thung khai cine shai kä nami taak tu vai,

²⁷ Kä nami peit law hlawt ung nami ih phak phi la ne hteh püi khai gui.

-4- Akphli nak thu thuuk

²⁸ Nami pupa gui naw ami ng’lin ah ng’giilung phyim cu kä nami m’hnawn vai.

-5- Akhma nak thu thuuk

²⁹ Bii akni ah bik cicu na m’hnuh vä, Ghangpughang ah chang gui ung päipih ci lani pi ciah ta, bä pi cicu ka ning m’hnuh gui khai nei.