NG'THU K'THUUK~ 21 - Cho Bible Common Language 2016

¹ Bawipa naw ghangpughang ah m’lung cu k’pang ci. Tui hta lawng alon sak ah mäih ah ani naw ayäi ah m’shum thein ci.

² Nang naw na bi avan cu hman ciah na ngai ci. Cun ung phi Bawipa naw na m’lung ngaih ning m’khoichak ci, cicu na shüm vai.

³ Düng ci, bä cicu na bi vai, cun naw khawihnah nak law püi ah ta Bawipa cu yei sak pi ci.

⁴ Chang shekha gui cu chang om nak la yoshe nak naw k’pang gui ci. Cun cu katnak ah kyak ci.

⁵ Ngaih na ne na pawng htein vai nang cu na bämang khai. Ak yaangkhai aih ah na hnünthawh ung kä na bühbei hlawt khai.

⁶ Kä düng nak awn na gah ah bühmang nak cu angghit ah maih ba khai. Acun naw sih nak ah m’kawt ung ning hteh püi khai.

⁷ Chang shekha gui cu ami mät ah sohai nak naw ng’yiin püi gui ci, ngami naw hman ci bi vai cu kä ng’ya hlük ci gui.

⁸ Cheishoh ciah chang gui cu lam she ung hteit ci gui, katnak kä om ci gui naw hman ci bik ci gui.

⁹ Thushai aih ciah chu awn im kyong ah om ah k’dam, im khuih nak ah khan ah hteit ne om cu bä tuba ci.

¹⁰ Chang shekha gui cu angtäi sei akshe bi vai ah cawi gha ci gui. Ngami naw au phi kä m’gein ci gui.

¹¹ Chang k’om ciah chang tumat naw m’kyuk nak gah ci. A i ah kä yuk ngai lawk ciah chang naw ng’thei nak ci. Cüivai ciah chang tumat cu ami m’thei phung ung ng’thei thei ci.

¹² Düng ciah Khanpughi naw chang shekha ah im kyong ung a i ah kyak ci, cicu hmat ci. Ani naw chang shekha gui cu dishum nak ung hteh püi gui ci.

¹³ Dukhaih ciah chang ah kyah kä na ngaih hlü ah a kyak ung, ami ning m’htei vai ah na mät naw kyap ne na ng’yoih cu a u naw kä ng’yak khai.

¹⁴ Chang tumat naw na khan ah am lung law ah a kyak ung, adüm ah m’cümhnah nak peit nak naw dim gei sak khai.

¹⁵ Taga nak bi kawn ah changnigui cu yeikyai ci gui, changshe gui cu omshe ci gui.

¹⁶ Nikiom nak hteh ta ne ng’vak shüi ci gui cu sih nak naw ngäng gui ci.

¹⁷ Läma nak, yu awk nak, mang ei ung hlim tui nak gui naw kä ning bühmang sak hlawt khai.

¹⁸ Chang shekha gui naw ami mät ah khan ah ami law püi ah yaica nak cu changnigui ung tha na ne ami bi hlü te ah kyak ci.

¹⁹ NG’thushai e ng’tukvook ghüh ciah chu awn om ah k’dam ah ta, bungpuk ah om cu bä tuba ci.

²⁰ Cüivai ci gui cu bühmang ne, läma ne om ci gui. Cun ung phi chang ang laam gui naw, ami ngui cu ami gah vai am mang yawp ci gui.

²¹ M’gein nak la düng nak awn na om ung, nang cu akshou na ghing khai, Chang hei gui naw ning chang m’sui u ne bä sei ning bawihmau khai gui.

²² Ng’ghiin ciah gabawi naw gai pi ciah chang gui naw ami ngäng ah mang gaw cu näng ci. Ami ngaih u ah paang cu m’di ci.

²³ Cümbawng nak kä om khai ah na om hlü ung geing na ne ng’thu na pyen vai.

²⁴ Chang k’om cicu na na m’nuh vai, yoshe nak ci, chang ah ng’shei ci, kho kä tä cicu ka ning m’hnuh khai.

²⁵ Dam ciah chang bii bi vai ah mak ciah chang cu, amät naw amät ngawn ciah kyak ci.

²⁶ Ami bi gui avan cu ami mät ah bi hlü ah ami bi ah kyak ci. Düng ciah chang naw ai ah a kyak ung phi pe hning ci, kä ng’vang ne pek ci.

²⁷ Chang shekha gui naw khawihnah nak ami dou thak cu, Bawipa naw thüi nak ci. Aktung pi ah akshe ah m’lung ngaih cu thüi nak ci.

²⁸ Hleei ne saksi cu yum vai kä kyak ci. Cun ung phi chang tumat mat naw ngaih-tüh nata ang thu cu dou ah kyak ci.

²⁹ Düng cisah chang gui naw ami mät naw ami mät ngaih gep ci gui.

³⁰ Chang ah cüivai nak hmuhmat nak, ngaih-tüh nak, Cun gui cu Bawipa naw a hnungtuk püi ung akholä ah kyak ci.

³¹ Nangmi naw ng’tuk bi nak vai ng’se nami gah ge khai, cun ung phi näng nak pek cicu Bawipa ah kyak ci.