NG'THU K'THUUK~ 20 - Cho Bible Common Language 2016

¹ Yu akda awk cu pyam nak la gu nak ah kyak ci. Awktat cicu gu taak ci.

² M’ngawk ciah phongkawng kyih ah maih ah m’lungshe ciah ghangpughang cu nami kyih vai. Ani m’lungshe sak cicu ng’cawh ciah kyak ci.

³ Gu k’taak ci phung naw ng’tuk vook tün hning ci. M’tamkhah nak cu ngami ah akpung ah om ci.

⁴ Lai thawn khin ung lai athawn vai ah dam ciah lai bik cicu geit akham vai ka om ci.

⁵ Chang tumat ah ngaih tuh cu thuuk ciah tuishawk ung tui ah maih ah kyak ci. Cun ung phi akyong ah om ci naw than hning khai nei.

⁶ Chang päng naw amät a i hlawk ah a hläkhäm la a bekhüt ah mawng cu pyen ci, Cun ung phi k’tha na ne nami shui vai, a u ang ak cang cu?

⁷ Dung ne om ne cang nak bi ci ami pa nak ung a hmaw gui cu ami khaw ding ci.

⁸ Ghangpughang cu ng’thumcha nak ung ngok ci, ani naw akshe cu a hmuh ung hmat ci.

⁹ A u chang naw akcang ah pyen hning khai ang? Am lung ngaih cu theingciim ci, akat nak cu ci ng’ciim ciah pyen hning khai aw?

¹⁰ Ka dung ciah khin nak la nan nak mang ciah chang cu Bawipa naw thui nak ci.

¹¹ Ak hmaw naw phi ani ah phah ah a i ah kya lawk ci, ani naw ai bik ci, cicu m’dang ci. Ani cu dung ne nik ciah a kyak ung, nang naw na hmuhmat hning ci.

¹² Bawipa naw hmuh nak vai ah mik la ng’yak nak vai ah hnga cu na pe gui ci.

¹³ Ip dut ne na khin na ng’pyi sak ung, nang cu na du khaih khai. Na bi vai ada ung na ei vai da khai.

¹⁴ Khleih ci naw a phu kui aih ci, cine chiu m’da ci, cun ung phi hteit ba neta, khleih ne a gah awn khähghah ci.

¹⁵ Nang naw na mat ah pyen ah ng’thu cu na hmat ah a kyak ung, nang ung ghui la pyülung ah a phu kui pi cicu om ciah kyak ci.

¹⁶ Chang tumat naw ang laam neta, chang lam hteit ah pu cu ka thung pek khai nei, cine shai atak ung, amat ah khawh cu thung nak vai ah a kyan vai nei,

¹⁷ Ka dung nak awn khawh na gah ung ei hlim ciah maih ah na yei khai, Cun ung phi acun vai am baw, shang hta khata baw, cun cu lung gin be ciah m’gawng ah maih ah kyak khai.

¹⁸ Nik ciah m’cumcäii nak cu na dou vai, cun ung na nang khai, kapawng htei ah ng’tuk bi nak ah ka na hteh vai.

¹⁹ Ng’pyen sak nak naw a i ka m’yih hlawt ci, Ng’thu akda ah pyen thei ci awn ng’shawng ne nami om vai.

²⁰ Na nupa na plah taam ung nang ah ghin nak cu hmup khui ung phat ciah mei im ah maih ah ng’pyi khai.

²¹ Zai pi ciah na gah ah khawh naw ken pi ciah ni nak ning pek khai.

²² Cheishoh nak cu na pek ba vai ah na mat naw ka na lak vai, Bawipa ung na ap vai, cun cu ani naw hman sak khai.

²³ Ka dung ciah nut nak la khin nak mang ciah chang gui cu, Bawipa naw thüi na gui ci.

²⁴ Bawipa naw mi hteh nak vai m’hnütbäi ci. Amat ah ghin nak ah hteh nak vai täng cu a u chang naw hmat hning khai ang?

²⁵ Khanpughi am na douthak vai ah shai kä na taak pha ung, geing na ne na ngaih-tüh vai. Akawn ah na ng’yu ba khai nei.

²⁶ Cüivai ciah ghangpughang nawa cheishoh ciah chang cu k’tä ne hmuk khai, aninaw kä m’gein ne m’kyuk khai.

²⁷ Bawipa naw m’lung la ngaih cu na pe gui ci. Mi mat naw mi mät kä mi thup hlawt khai.

²⁸ Ghangpughang cu a uk nak ung, düngnak, taga nak la nibä nak a om ah chuih huham mah ne om khai.

²⁹ Keimi naw ak hmaw chang ah thagui cu ngaih u u ne, aghi ang vai ah lu ng’pyook cu kami chang m’sui ci.

³⁰ Ak hnü ät ung natnak bui awt nak naw mi lam mi m’thawng nak vai ah na pyang gui ci.