NG'THU K'THUUK~ 2 - Cho Bible Common Language 2016

Cüivai nak ah ang chuh

¹ Ka hta aw, ka ning m’thei cu na ng’thei vai. Ka ning m’thei cu ka na m’hnih phung vai.

² Cüivai nak cu na ngaih vai, hmat hning vai ah na k’tha nak vai.

³ Hmuhmat nak cu akcang ah na ng’yoih vai. Akyong awn na ng’paa vai.

⁴ Cüivai nak cu ngui ghui ah mäiha ah na shui vai. Thuh ah khawh yap ah mäih ah na yap vai.

⁵ Cun ung Bawipa kyih aa nak ah mawng cu na hmat khai.

⁶ Bawipa naw cüivai nak cu pek ci, hmuhmat nak la langkha nak cu ani ungka lawk ci.

⁷ Ani naw chang veih, changnicu shungvong nak pek ci.

⁸ Ani naw akni ah om püi ciah chang cu ngäng ne ani ung bekhüt ciah chang ah hteh nak cu üp oi sak ci.

⁹ Kei na na ngaih ah a kyak ung düng nak, taga nak la hmai kyang nak cu na hmat khai. Ai na bi vai cu na hmat khai.

¹⁰ Cüivai nak cu nang ung om khai, na hmuhmat nak naw ning yeikyai sak khai.

¹¹ M’lung kyong la na ng’langkha nak naw ning shungvong khai.

¹² Akshe bi nak ung ning shungshet khai. Khüikha nak thawh let sak ne ng’thu ciah chang gui ah lam ungka ning k’pang khai.

¹³ Cun ah chang gui cu düng ciah ghin nak nawng u ne, katnak ah khawmü ung om ci gui ah kyak ci.

¹⁴ Ngami cu cheishoh nak bi ne yeikyai nak shui u ne, akshe kha ung hüi thaw ci gui ah kyak ci.

¹⁵ Kä chang man, yum nak kä om hlawt ciah chang gui ah kyak ci.

¹⁶ Ng’awi ng’gi khai ah ng’thu ne ning m’yawih khai ah k’tha nak c iah kä hnumi man ah kut ungka ning phyawn khai.

¹⁷ Ani cu amät ah cei ung kä bekhüt ne ng’ciim ciah ang thukhän m’hnih ciah kyak ci.

¹⁸ A cun ah im ung nang na hteh ah a kyak ung nang cu sih nak ah lam ung na hteit ciah kyak ci. A cun ah hteh cu sih nak ah khaw k’et nak ah kyak ci.

¹⁹ Ani ah hteit ciah chang phung kä law ba ci. Ghin nak ah lam ung kä ng’hlat law ba ci.

²⁰ Cun ah kyasei nang cu changniläk ne düng ciah ghin nak awn na ghin vai.

²¹ Düng cih chang gui — kümbe ci gui — cu shin ah mi khaw ung om khai gui.

²² Cun ung phi changshe gui cu Khanpughi naw shin ah khaw ungka pheng gui khai. Chang kaa gui cu m’ghaw mawih ah mäih ah mawi gui khai.