NG'THU K'THUUK~ 19 - Cho Bible Common Language 2016

¹ Dukhaih pang ne phi dung ciah chang cu, hleehlak omshe ciah ta ba pi ci.

² Hmuhmat nak ka om ciah m’lung ah ling cu ka nik ci, m’lung ka sau nak naw yaica nak ung ning hteh pui khai.

³ Chang m’shah gui cu ami mat ah omshe nak awn, ami mat m’dishum u neta, Bawipa cu täitawk ci gui.

⁴ Buhmang ci gui naw angtai sei teihpüii thai gui hmuk ci gui. Cun ung phi dukhaih ci naw api om ci phi ka m’khan hlawt ci.

⁵ Nang cu yung ah m’kawt ung na hleei na pyen ung m’kyuk nak na gah khai. M’hlawt nak ka om khai.

⁶ A chang pang naw bawimang naw am kum vai ah k’tha nak ci, A chang pang naw m’kum nak gah ciah chang awn khawt sheng vai ah bik ci.

⁷ Dukhaih cicu amat ah phaäinau gui naw phi ka htung mang ka m’htei htang ci gui, A teihpüii phi a u ka om ci, Ani naw a i hlawk ah tha na ne phi, a i phi ka m’khut nang hlawt ci.

⁸ M’kumnak gah vai ah na mat na bi vai, na thei hning phung avan na ng’thei vai. Cun kawn ah na ng’thei cu na shum la vai. Cun ung na buhmang khai.

⁹ Yung ah m’kawt ung a hleei pyen cicu m’kyuk nak ka phyawn nak khai, Ani cu ng’yiin khai.

¹⁰ Chang gu ang cu mang pang ne ka om man ci, khleihtein naw bawimang ka uk man ci.

¹¹ Langkha ciah chang naw am lung ah sou nak cu k’uup hning ci. Na khan ah chang naw a hma law ung na ngaih pek cu dämduh ciah ni kyom nak ah kyak ci.

¹² Ghangpughang ah m’lungshe nak cu phongkawng ah m’ngaw ah maih ah kyak ci. Cun ung phi ani ah m’tamkhah nak cu khogoh tui ah maih ah kyak ci.

¹³ Gu ang ciah hta naw apa cu di nak ung hteh pui ci. M’ghämce ciah chu cu a shüm shüm ah ng’soi ciah tui ah mäih ah kyak ci.

¹⁴ Chang naw anupa ah khawh la im cu pakhui m’dung hning ci, Cun ung phi langkha ciah chu cu Bawipa bang naw pe hning ci.

¹⁵ Na yum ung dam ne om a, ip a, Cun ung phi ei ah na cawi khai nei.

¹⁶ Khanpughi ah thukhän gui cu nak pan vai, Cun ung akshou na ghing khai, na nawng dut ung lai na sik khai nei.

¹⁷ Dukhaih ciam na pek tak cu Bawipa am nak pu ah maih ah kyak ci. Bawipa naw ning thung ba khai.

¹⁸ Na hta gui cu ng’thei thei khai gui ah ami hmaw yah ung na m’shumthein gui vai, ka cun ung ami mat naw ami mat ami m’di vai ah na m’thein gui ciah kyak ci.

¹⁹ Chang tumat cu amlung a sou ah a kyak ung, acun ah a phu cu ma na sak va. Cumbawng nak ungka ani cu hnu at na khui tu ah a kyak ung, leng ba ne na m’htei tu vai nei.

²⁰ Nang naw m’cumcäii nak na ngaih ah a kyak ung, na ng’thei hlü ah a kyak ung, khaw hnüüp at ung na cuivai khai.

²¹ Chang gui naw a hlü hlü ah pawng püi ci gui. Cun ung phi Bawipa ah ng’yak hlü naw pyi phleh ci.

²² Thüisei nak cu ng’yak hlü nak aih ah kyak ci. Dukhaih ci gui cu hleei hlak ciah chang ah ta ba pi ci gui.

²³ Bawipa cu na lak vai, cun ung akshou na ghing khai, bühbei ne leigai na phyawn nak khai,

²⁴ Chang amshah gui cu ami shai ung ami hang bai vai ah phi dam ci gui.

²⁵ Chang omshe cu m’kyuk vai. Cun ung ba tuba ci. Ka hmat ciah chang naw ng’thei nak khai. Nang cu na cuivai ah a kyak ung ami ning m’shum thei ung na ng’thei thei khai.

²⁶ Thui ng’aa ne thüisei vai ah kyak ciah chang naw apa shedam na ne anu im ungka naw gawt ne k’tam ci.

²⁷ Ka hta aw, ng’theithang nak na nawng ah a kyak ung, na hmat pyi gui cu na nawng ciah kyak khai.

²⁸ Saksi ah m’hnütkbäi awn chang hnim nak ung taga nak kä om ci. Chang shekha gui naw akshe ah tuihlim nak cu m’hni ci gui.

²⁹ Chang k’om ne gu ang ci naw m’ghuih thah nak a gah vai cu ng’htei pyi ci.