NG'THU K'THUUK~ 18 - Cho Bible Common Language 2016

¹ Chang awn ka om ih thei ciah chang gui cu, ami mat bang ng’yum ci gui. Ngami naw chang van naw hman ciah akbäi cu ka yum tuk ci gui.

² Ak gu ang naw a hmuhmat ung phi, ka a hmuhmat ung phi, a i ah ka ngai ci, ani ah bi hlü avan cu ani a i hlawk ah alunglang am dang vai ah kyak ci.

³ Hmakat nak la thui ng’aa nak cu atang ah hteit ci. M’tamkhah nak amaih ung a cun ah hnun ung paphi nak om ci.

⁴ Chang ah ng’thu cu cuivai nak ah ang yung ah kya hning ci, tuinu ah maih ah thuuk ne tuihta ah maih ah cii ci.

⁵ Taga nak gah nak vai ah cheishoh cu kum ne, changnim’shung cu ka hman ciah kyak ci.

⁶ Chang gu ang cu ang vook tu ung ng’toh vai ah ng’ghuh ci.

⁷ Chang gu ang cu ang thu tu ung amat ah di nak vai ah ng’thu ci, Ani cu amat ah ng’thu ah cuun naw pha ba ci.

⁸ Ng’pyen sak cu hlim aih sei, m’hni ne mik duuk ci.

⁹ Amdam ah chang cu dishum ciah chang ah maih ah shekak ci.

¹⁰ Bawipa cu khänghtek ciah tänghän ah kyak ci. A cu ah dung ciah chang gui hteit u ne phyawng m’htein ci gui.

¹¹ Buhmang ciah chang gui naw, hlüng ne khang ciah k’pang naw mang gaw akoi ah maih ah ami khawh nawa shungvong gui ciah yum ci gui.

¹² Am’lung ka ng’neim sak ciah chang cu a u naw ka chang m’sui ci. Chang omshe gui cu ami di nak vai ah lam ung om ci gui.

¹³ Ng’thu ka na m’shan phi ung na ngaih ma vai, ka cun ung nang cu shekha nak la päipih nak na gah khai.

¹⁴ Na ghin gai nak hlü naw na natnak cu nang ci, Cun ung phi cun a maih ah a kyak ung, na ngaih u nak cu maih khai.

¹⁵ Lunglang ciah chang cu angtai sei ci gang ne ng’thei ge vai ah om ci.

¹⁶ Htingling ciah chang na hmuh hlü ung, m’cümhnah nak na thak vai, cun ung na hmu yai khai.

¹⁷ Yung ah m’kawt ung ng’thu pyen ma ciah chang cu dung ciah mäih ah a kyak ung phi, a hnungtuk pui ah chang naw tün ne ng’shi thei ci.

¹⁸ Huham mah ciah chang goi yung ah ani ng’küknet law ah a kyak ung, taga khai ah cun ah mawng cu ng’pyi sak vai.

¹⁹ Na phai nau na m’hteivai, cun ung ani naw khang ciah mang paang ah maih ah ning shungvong khai. Cun ung phi ng’thu na m’da pui ah a kyak ung ani naw nang ah lam ah m’kawt khai khai.

²⁰ Nang cu na ng’thu htau nü nü ah ciah na sui ei na ghing om khai.

²¹ Na mat ah ng’thu naw na hnun ning ngang hning ci, ka cun ung ning m’di hning ci, cun ah kyasei na ng’thu htau ah aci ah na dou thei ci.

²² Chumah ciah chang cu akni hmuk ciah kyak ci. Acun naw Bawipa naw nang ah khan ah ani nak cu m’dang ci.

²³ Dukhaih ci naw ng’coi pa ne ng’thu pyen ci, cun ung phi buhmang ci naw akghat ah m’shang ci.

²⁴ Am shah ah khawtsheng nak cu tawi aih ci, Cun ung phi teihpüi amshah cu phäi nau ah ta hläkhäm pi ci.