NG'THU K'THUUK~ 17 - Cho Bible Common Language 2016

¹ Ding gei nak awn m’htut m’ka at ei cu ng’tu ng’vaw neta im ung be ciah mang ei ei ah ta ba tuba ci.

² Cuivai ciah chang sham naw ghawi pai ciah a bawi ah hta ah khan ah huham mah ne pakhui khawh amshah cu gha thei ci.

³ Ghui la ngui cu mei awn m’num ah kyak ci, chang ah m’lung kyong cu Bawipa naw m’num ci.

⁴ Changshe gui naw akshe ah mawng cu ngai ci gui, hleei hlak ci gui naw hleehlak ah mawng cu ngai ci gui.

⁵ Dukhaih ci na gaih tu ung ani tuisho ciah khanpughi na kalu nak ciah kyak ci. Chang yaica nak ung agawk ah phäh ah yeikyai ciah chang cu, m’kyuk nak gah khai nei.

⁶ Ghipa gui cu ami tu hta gui ah lukhu ah kyak ci, ak hmaw gui cu ami nupa gui ah lukhu ah kyak ci.

⁷ Chang pacawng naw a hleei ka pyen ci, chang ang ah ng’thu ung mang vai ka om ci.

⁸ Chang amshah naw ng’mu bi cu cecai ah maih ah ngai ci gui, cun naw avan bi hning khai ah ngami naw yum ci gui.

⁹ Chang naw aning m’hni vai na ng’yak hlü ung nang ung katnak bik cicu na m’geinsei vai. Shum ba laih laih ah katnak naw ng’khawt nak cu m’shet thei ci.

¹⁰ Lunglang ciah chang naw hnu at m’cai m’a nak ung ang thei ah ta changshe naw m’neh nak tumat ung phia vei ng’thei ci.

¹¹ Sih nak cu m’ghämce ciah ng’shä ah mäih ah kya ne angtäi sei leibei m’tho ciah changshe gui ah gawk lawk khai.

¹² A hta maih ciah khawm anu awn ng’hmuh cu akshe bi vai laih laih ah tawt ciah changshe awn ng’hmuh ah ta ba tuba ci.

¹³ Akshe cu akni awn na sah ung na im k’caw ung akshe ka law hteit hlawt khai.

¹⁴ Ng’vook shan nak ah ng’tun nak cu tuikbum a pawk hlü ah maih ah kyak ci. Ak dam ah ka ng’vook pha ung cun cu nawng vai.

¹⁵ Changnim’kyuk ci la changshe m’hlawt ci — ani nik hnih cu Bawipa naw thui nak ci.

¹⁶ Chang gu ang naw ca ng’thei nak vai ah phah ah ngui a mang cu ka nik ci, a i ah kyasei ci ung ani ung ng’yak hlü nak ka om ci.

¹⁷ Teihpüii gui naw angtai sei yumhni nak m’dang ci gui, Cumbawng nak ka ng’lung lak nak ung a i hawkcha ah ng’phai nau vai aw?

¹⁸ A i ka hmuhmat ciah chang naw chang tumat ah apupawng ama nak vai ah shaitak nak bi thei ci.

¹⁹ Katnak m’hni cu cumbawng nak pyan hlü nak ah kyak ci, Akphlütt ah khähghah cicu cumbawng nak k’thah ciah kyak ci.

²⁰ Akshe bang ngaih tuh ne ak she ah ng’thu ciah chang naw akni ka hmuk khai — leigai vah hmuk khai.

²¹ Akshekha bik ciah a hta ah apa cu thüisei nak la ayä nak awn om khai.

²² Yeikyai hmai kyang naw gai nak pek ci, akphlütt ah hmai m’kyum ung sih nak ng’et ci.

²³ Ka taga ciah suki naw ng’mu khawh dou ci, Ani naw taga khai ah ka bi hlawt ci.

²⁴ Lunglang ciah chang naw cuivai ne hnünthawh nak bu ci, cun ung phi chang ang naw dam ne khaw yau ci.

²⁵ Gu ang ciah hta naw apa m’thui ne anu geinvai sak ci.

²⁶ Ba ciah chang ng’lawh sak cicu ka ng’dung ciah kyak ci, Nik ciah chang m’kyuk cu taga nak plawh ah kyak ci.

²⁷ Amat ngaih gep ciah chang naw akphlütt ah ng’thu ka pyen ci. Ak kyäpnep ah om ciah chang ah m’lung kyong ung cang nak om ci.

²⁸ Cun ah kawn ah chang gu ang phi adüm ah om ne am gawng am kuup ung, cuivai ne lunglang ciah chang naw ngai ci.