NG'THU K'THUUK~ 16 - Cho Bible Common Language 2016

¹ Mikmi nawa bi vai cu mi pawng pui ci, cun ung phi ak hnu ah Khanpughi naw ng’thu pyen ci.

² Nang naw na bi phung cu bämcam ciah na ngai ci, Cun ung phi Bawipa naw na m’lung kyong m’khoichak ci.

³ Bi vai na pawng pui p’hung cu Bawipa naw ak phyuhtheh vai ah na ap vai, cun ung na bi nak phung ung m’khut nang nak om khai.

⁴ Bawipa naw a tui pyan pang ung ang bu nak om ci, akshe ah ang bu nak cu dishum ci.

⁵ Chang shedam nak ci phung cu Bawipa naw thui nak ci, Ani naw m’kyuk nak ungka ka phyawn sak gui phung khai.

⁶ Hlakham ne nami bekhüt vai, Khanpughi naw nami katnak ning geinsei gui khai, Bawipa nami lak vai, nangmi ung akshe ka gawk lawk khai.

⁷ Bawipa cu nami yei nak ah a kyak ung, nami gaa cu teihpüii ah nami pyang hning khai.

⁸ Dung nak awn gah ah klhawh apihta cu, ka dung nak awn gah ah klhawh akda ah ta, ba pi ci.

⁹ Nangmi naw bi vai ah nami pawng pui ci, Cun ung phi nami hnun thawh nak ung Khanpughi naw ning m’shumthein gui ci.

¹⁰ Ghangpughang naw caciim huham awn ng’thu pyen ci. Ani ah m’hnut bai cu angta sei cang nak ah kyak ci.

¹¹ Bawipa nbaw dung ciah nan nak la khin nak cu ng’ya hlük ci. Zoih tuk phung ung ci theing nak om sä.

¹² Ghangpughang naw akshe cu kä m’gein hning ci, a i ah kyasei ci ung taga nak naw uk nak cu khüighat sak ci.

¹³ Ghangpughang naw düng nak cu ng’ya hlük ci, düng sei ng’thu cicu ani naw m’hni ci.

¹⁴ Cuivai ci naw ghangpughang a yei vai ah k’tha na ne k’pang ci, ghangpughang am lung she law ung chang tumat mat cu sik khai.

¹⁵ Ghangpughang ah yeikyai nak cu htingkhaw ah khaw aa sak ciah khongmei ah maih ah kyak ci, a cun ung ghin nak om ci.

¹⁶ Cuivai nak la lunglang nak cu ghui la ngui ah ta ba pi ci — ba pikbähih ci.

¹⁷ Lam akni ung htie ciah chang naw akshe cu hlawi hlek ci, na hteh nak ah lam cu na m’htei vai.

¹⁸ Chang ah ng’shei nak cu di nak ah kyak ci, chang yoshe nak cu shum nak ah kyak ci.

¹⁹ M’lung neim nak awn om ne dukhaih nak cu, chang yoshe nak ciah kya ne, chang ah khawh ami guh ng’pai tu ah ta ba pi ci.

²⁰ Ami ning m’theithang gui cu nami dou vai, nangmi cu nami nang khai, Bawipa ung nami ng’ap vai nangmi cu nami yeikyai khai.

²¹ Cuivaine htingling cicu a hmuhmat ah phah ah aming thang ci, Ang thu gei law pi cicu yeikyai nak om law pi ci.

²² Cuivai chang ah cuivai nak cu ghin nak tui gei ah kyak ci, Cun ung phi chang gu ang gui ah tha ne ami hmuhmat nak ah akhin cu akholä ah kyak ci.

²³ Lunglang ciah chang gui naw ka ami ng’thu pha ung ngaih tuh ma ci gui, ami ng’thu cu yum yei nak awn law püi ci gui.

²⁴ M’gein nak ah ng’thu cu khoitui awn täng ci, m’leih ung tui ci, gainak ah kyak ci.

²⁵ Dung ciah nami ngaih ah lam naw sih nak ung ning hteh pui gui khai.

²⁶ Bii bik ci naw a ei nak hlü awn k’tha na aih ci, a i ah kyasei ci ung a cawi nak cu a phu vai ah ng’ya hlük ci.

²⁷ Changshe gui naw chang ami m’di nak vai ah lam cu, shui ci gui, ami ng’thu m’gawng cu akshe mei ah dai ci.

²⁸ Ng’thu she cu changshe naw k’pui ci, Cun gui naw khüikha nak thawh sak ci gui, ng’khawt nak cu m’shet sak ci gui.

²⁹ M’ghämce ciah chang naw a teihpüi khäihleng ne beilei lam ung hteh pui ci.

³⁰ Amik muh ne am nei k’pai cicu nami geing nak vai, ngami cu akshe ngaih tuh kheng geng ci gui.

³¹ Ghin shou nak cu dung ciah chang gui m’cümhnah nak ah kyak ci, ng’pyook ciah lusam cu huham lukhu ah kyak ci.

³² M’lung sau nak cu huham mah nak ah ta ba pi ci, amat naw amat nang cicu mang gaw avan nang ciah ta ba pi ci.

³³ Chang gui naw Khanpughi ah ng’yak hlü hmat vai ah m’nüm shüm shüm ci gui, cun ung phi a khanpughi amät naw am shan nak m’dang ci.