NG'THU K'THUUK~ 15 - Cho Bible Common Language 2016

¹ Ng’awigi ciah ng’thu naw m’lung dim sak ci, thu ashe naw m’lung so sak ci.

² Cuivai chang ah ng’thu naw hmuhmat nak dang sak ci, cun ung phi chang shekha ah ng’thu cu akholä ah kyak ci.

³ Bawipa naw a hawi, a i ah kyak ci cicu hmuk ci, ani naw na ngang gui ci, akni akaa mi bi cu na teng gui gi.

⁴ Ng’awigi ciah ng’thu naw ghin nak law pui ci. M’gak ciah ng’thu naw mümcha m’di ci.

⁵ Apa ah m’thei hnu nak cicu chang gu ang ah kyak ci. Apa ah m’shumthein dou cicu cuivai ciah kyak ci.

⁶ Dung ciah chang naw a khawh kham ci, Cun ung phi khüikha nak a gawk law ung changshe naw a khawh m’di ci.

⁷ Hmuhmat nak cu cuivai chang naw ng’shawng sak ci, chang gu ang naw ka ng’shawng sak hlawt ci.

⁸ Bawipa naw changniah taigu cu ngai ci, cun ung phi chang shekha ah law pui ah khawihnah nak cu thui nak ci.

⁹ Bawipa naw changshe gui ah lam cu thui nak ci, cun ung phi dung nak bik ciah chang cu m’hni ci.

¹⁰ Nang cu cheishoh nak na bi ung akda vei m’kyuk nak na gah khai. Na mät naw na mät kä na m’shung düng ung nang cu na sik khai.

¹¹ Sih nak ah khaw ung om cicu Bawipa naw ka a hmat vai ah ka k’pang hlawt ci, a i cha ah chang naw amlung ngaih cu, Khanpughi ah ma ah thup hlawt khai aw?

¹² Amlung m’dam ci naw chang ah m’shung dung ka ng’ya hlük ci, cuivai pi ci naw m’shumthein vai ka thah ci.

¹³ Chang gui cu ami yei yah ung hmai kiang ci gui, ami thüi law ung ami hmai m’kyum ci gui.

¹⁴ Lunglang ciah chang cu theithang hlük ci, cun ung phi chang shekha gui cu ami katnak awn ng’buh ci gui.

¹⁵ Dukhaih ciah ghin nak cu cumbawng nak ah kyak ci, Cun ung phi yeikyai ciah chang cu yeikyai nak awn ghing ci.

¹⁶ Dukhaih ne phi Bawipa kyih aa cicu bühmang neta geinvai ciah ta bä tu ba ci.

¹⁷ Khawtsheng neta thui-an ei cu, ng’gen tu neta meh nga ei ah ta bä tuba ci.

¹⁸ Am lung tawi ci naw ng’tukvok m’thou ci, am lung sau ci naw geilam pyang ci.

¹⁹ Dam ciah chang gu a gawk nak phung ah khüikha ci, düng ciah chang cu geinvai nak kä om ci.

²⁰ Cüivai ciah hta naw apa yeikyai sak ci, chang awng ang naw anu päipih ci.

²¹ Chang shekha gui cu ami gu ang nak awn yeikyai ci gui, Cun ung phi cüivai ci naw dung nak bik ci.

²² M’cäi ä nak avan dou ci naw näng nak gah ci, kä dou cicu shum nak ung gawk ci.

²³ Hman ciah amawng ung cang nak thu pyen cu yeikyai nak ah kyak ci.

²⁴ Cuivai ciah chang gui cu ghin nak ah hang kai nak ah lam ung hteit ci gui, sih nak ah yu ktum nak ah lam ung kä hteit ci gui.

²⁵ Bawipa naw chang shekha ah im cu m’di khai, cun ung phi hmeinu ah khawh cu ngang pek khai.

²⁶ Bawipa naw m’lung ngaih akshe cu thui nak ci, cun ung phi teihpüii ng’thu cu yei nak ci.

²⁷ Ka dung nak awn khawh gah vai ah bik ci naw a kyong khui geinvai sak ci, ng’mu khawh ka dou cicu a ghin nak shou ci.

²⁸ Changninaw ng’thu ka am shan pha ung ngaih tuh cang ci, changshe naw ang ghit ah ng’thu m’shang ci. Cun naw khüikha nak ung gawk sak ci.

²⁹ Changni ah taigu cu Bawipa naw ngaih pek ci, cun ung phi changshe gui cu nawng gui ci.

³⁰ Hmai kiang nak naw chang yeikyai sak ci, ng’thu ni naw m’lung yei sak pi ci.

³¹ M’shungdung nak ngaih nak cicu cuivai chang ah kyak ci.

³² Theithang vai maa nak ciah chang cu amat naw amat nat sak ciah kyak ci. M’shungdung nak dou ciah chang cu cuivai law pi ci.

³³ Bawipa kyih aa nak cu hmuhmat nak ah kyak ci, m’lung neim nak ah a hnu ah m’tamkhah nak om kheng geng ci.