NG'THU K'THUUK~ 14 - Cho Bible Common Language 2016

¹ Cüivai ciah hnumi naw im co ci. Cun ung phi gu ang ci naw m’di m’shum ci.

² Nami htingling vai. Htingling ci naw Bawipa a kyih aa nak dang sak ci. Kä nami htingling ung kä nami kyih aa ciah kyak ci.

³ Ang lam cicu chang ah ng’shei ne akda ah ng’thu ci. Cüivai cicu ang thu naw phyawn sak ci.

⁴ Lai thawn nak vai seipat kä a om ung na khei ghawng khai. Cun ung phi seipat a om ung khei ung htang be khai.

⁵ Akcang pyen ciah saksi naw angtäi sei a cang pyen ci. Ka acang pyen ci naw a i a pyen vai ka om sei a hleei pyen ci.

⁶ Chang ah ng’shei cicu ka cuivai hlawt ci. Cun ung phi lunglang ci naw ayäi ah thei thang thei ci.

⁷ Chang gu ang ah pei ah ka nami ng’et vai, ngami ung ng’thei tu vai a i ka om ci.

⁸ A i ah kyasei lunglang ciah chang a vuivai ang? A i ah kyasei ci ung ani naw ai a bi vai hmat ci. A i ah kyasei ang lam ciah chang a gu ang ang? A i ah kyasei ci ung ani naw a hmat hta bang ngaih tuh ci.

⁹ Chang gu ang naw ani ah ma kat a i ah ka ngai ci. Cun ung phi chang gui naw m’geinsei vai ng’ya hlauk ci gui.

¹⁰ Na yei nak phi na mat ah kaa, na khaa nak phi na mat ah kaa, a u naw ka ning tei pai pui khai.

¹¹ Changshe ah im cu adi kawn ah phi changniah im cu ng’dui ba la khai.

¹² Dung ciah lam ah na ngaih naw sih nak ah ning hteh pui khai.

¹³ Gaih nak naw thui nak thup ci, Yeikyai nak ang pyi ung ayä nak gawk law kheng geng ci.

¹⁴ Changshe gui naw ami mat ah shetkat nak gah ci gui, Changniguio naw ami mat ah om ih awn m’cümhnah nak gah ci gui.

¹⁵ Chang anglam naw apang yum thei ci, chang langkha naw a khaw m’khaan pang m’htei ci.

¹⁶ Cuivai ciah chang naw khüikha nak phyawn nak vai ah geing na ne om ci, Cun ung phi chang anglam cu a i ka geing na ne ang ghit ah hnüntho ci.

¹⁷ M’lung she aiha ciah chang naw ak gu ang ah bii bik ci, cuivai pi cicu adüm ah om ci.

¹⁸ Chang anglam gui naw ami gu ang nak cu chaw nak ci gui, Cun ung phi langkhaa ci gui naw hmuhmat nak ah m’cümhnah gha ci gui.

¹⁹ Changshe gui cu changnigui ah ma ah kaup khai gui, ami hmai a kyang nak vai ah ng’coipa khai gui.

²⁰ Dukhaih cicu a u naw ka m’hni ci, a im ng’phei naw phi ka m’hni ci, Cun ung phi buhmang cicu a teihpüii da ci.

²¹ Nang cu na yeikyai hlü ah a kyak ung dukhaih ci na m’gein vai, chang paphi cu katnak ah kyak ci.

²² Akni na bi ah a kyak ung nang cu akbä pi na gah khai, chang naw ning chang m’sui khai, akshe na bi ah a kyak ung cheishoh nak na bik ci kyak khai.

²³ Bii bi na na hnun na m’ghin vai, ngo ne ng’htau ne na om dut ung na pyam khai.

²⁴ Cuivai ciah chang m’cümhnah nak cu khawh cham ah kyak ci, anglam cicu agu ang nak awn chang naw hmat ci.

²⁵ Ng’dung sei ng’thu ciah saksi naw hnun gui hun ci, a hleei pyen ci naw chang m’shuk chak ci.

²⁶ Bawipa kyih aa nak naw m’lung up nak la ngaih gep nak cu acun ah chang la akyong khui am pek ci.

²⁷ Sih nak na ng’phleng hlü ne ang? Bawipa kyih aa nak cu ghin nak tuikci ah kyak ci.

²⁸ Ghangpughang ah hlüngtai nak cu chang a i chu a uk ciah khan ah phung ci, a uk vai ka om cicu a kholä ah kyak ci.

²⁹ Adüm ah na om ung nang cu cuivai ciah na kyak ci, Nang cu na m’lungshe aih ung a i hlawk ah na anglam cu na m’dang ciah kyak ci.

³⁰ Dimdeeih ciah m’lung ngaih naw pumsa gaigawng sak ci, m’thüikhang nak cu kenser gaw natnak ah kyak ci.

³¹ Dukhaih ciah chang shedam nak ci cu, ani tuisho ciah Khanpughi paphi ciah kyak ci. Cun ung phi dukhaih ci m’gein cicu khawihnah nak bik ciah kyak ci.

³² Chang shekha gui naw akshe ami bi nak awn ami mät ah kyuk taat nak vai cu law pui ci gui. Cung ung phi changni gui cu ami niba nak naw shungvong gui ci.

³³ Lunglang ciah m’lung ngaih phung ung cuivainak om ci, anglam ci naw cuivai nak ah mawng ka hmat ci.

³⁴ Dung nak naw pakhui khaw hlüngtai sak ci. Katnak naw pakhui khaw thui ng’aa sak ci.

³⁵ Cuivai ciah a chang bawi cu ghangpughang naw yei nak ci, thui ng’aa nak vai bik cicu m’kyuik ci.