NG'THU K'THUUK~ 13 - Cho Bible Common Language 2016

¹ Cüvai ciah htapa naw apa ah m’shungdüng cu ngai thei ci. Cun ung phi a i kä tä ciah chang naw akat nak kä ng’kiaa hlawt ci.

² Changnigui cu ami ng’thu pyen ah phi äh ah m’cümhnah nak gah ci gui, Cung ung phi chang shekha gui cu ami m’ghämce nak awn akshe bi hlü aih ci gui.

³ Na ng’thu ng’htau geing na ne, na ghin nak na shungvong vai. Kä geing nak ah ng’thu ci naw amät m’di ci.

⁴ Dam ciah chang naw a i hlawk ah ang yak hlü phi kä gah hlawt ci. Ng’khüi ne bik ci naw angyak hlü phung gah ci.

⁵ Düng ciah chang naw hleeihlak cu thüi nak ci. Cun ung phi chang shekha gui ah ng’thu cu ng’aa nak vai la thüi nak vai ah kyak ci.

⁶ Düng nak naw ni nak cu shungvong ci. Shetkat nak cu shekak ci gui ah yung kyak nak ah kyak ci.

⁷ Chang amshah cu bühmang ciah ng’shei ci, cun ung phi a i kä tak ci. Chang amshah cu pyamtham ciah ng’shei ci, cun ung phi khawh akda tak ci.

⁸ Bühmang ci naw a ngui cu a hnun hun nak vai ah mang ci, cun ung phi dukhaih cicu a u naw kä ngäng ci.

⁹ Düng ciah chang cu pyü ne ng’shü ciah akdei ah mäih ah kyak ci. Cun ung phi chang shekha cu phät lawk khai ah mei im ah mäih ah kyak ci.

¹⁰ Chang shedam nak ci naw a i kä gah ci, cun ung phi yaica ci. Chang ah m’cäi ngai cicu cüivai pi ci.

¹¹ Ayäi ah na gah ah na khawhcham cu ang ghit ah maih ba khai. K’tha na ne na shui yap ung akdäm pi na gah khai.

¹² Ngaih u nak adi shum ung m’lung m’sin dishum ci. Cun ung phi ng’yak hlü akümbe ung yei nak om ci.

¹³ Akni ah m’cäi ä nak maanak ciah chang cu khüikha nak k’thäh ciah kyak ci. Läk ciah chang cu hun nak gah ci.

¹⁴ Cüivai ciah m’theithang nak cu ghin nak ah tui khawng ah kyak ci. Na ghin nak kyihkyawk nak ung a gawk law ung, acun naw m’htei ne ning m’hlawt khai.

¹⁵ Lunglang ci naw chang m’sui nak gah ci, Cun ung phi kä ng’ap hning ci gui cu lam she ung hteit ci gui.

¹⁶ Lang kha ciah chang gui cu a i kä ami bi pha ung angtäi sei ngaih-tüh ci gui. Cun ung phi chang gu ang naw a cheishoh nak cu dang sak ci.

¹⁷ Shekak ciah chang tüih naw khüikha nak law püi ci. Cun ung phi bekhüt ci naw dimdeeih nak law püi ci.

¹⁸ A i kä ng’theithang cicu dukhaih nak la khüikha nak om ci. M’shungdüng nak ngai ciah chang cu chang m’sui nak om ci.

¹⁹ Ng’yak hlü gah cu a i hlawk ah nik ci ang? Gu ang ciah chang gui naw akshekha ng’hlah tak vai ah mak ci gui.

²⁰ Cüivai ci awn ng’khawtsheng cicu cüivai lawk ci, Chang kaa awn ng’khawtsheng cicu dishum thei ci.

²¹ Cheishoh ci gui cu khüikha nak naw a khaw päng ah läk gui ci. Cun ung phi düng ciah chang gui cu akni ah m’cümhnah nak gah khai gui.

²² Changnicu atu a hta am anawng pek shüt vai khawh om ci, Cun ung phi cheishoh ci gui ah khawh cu düng gui ah kut ung gawk khai.

²³ Kä bi man ah lo cu dukhaih ciah hmawk ah akda ah vuipai khai. Cun ung phi kä taga ciah chang ah hmak ah lo cu shum ne kä bi vai ah kyak khai.

²⁴ Na hta cu that ne kä na m’cäi ung na hta kä na m’hni ciah kyak ci. Na hta na m’hni ah a kyak ung na m’shum thein vai.

²⁵ Düng ciah chang cu ang büh nak vai ei om ci. Cun ung phi chang shekha cu angtäi sei ei cawi ci.