NG'THU K'THUUK~ 12 - Cho Bible Common Language 2016

¹ Hmuhmat nak m’hni ciah chang naw a cheishoh ung m’cäi tu vai ng’ya hlük ci. Chang gu ang naw m’cäi ä thüinak ci.

² Bawipa naw changnicu yei nak ci, akshe bi vai ah pawng pü ci phung cu m’kyuk ci.

³ Shetkat nak naw ngaih gep nak kä be sak hlawt ci, cun ung phi düng ciah chang cu khäng sei ng’düi ci.

⁴ Hnumi akni cu acei ah ng’tamkhah nak la yeikyai nak ah kyak ci. Cun ung phi acei ah thui ng’aa nak vai ah kyak ciah hnumi naw acei ah guh kenser ah kyak sak ciah kyak ci.

⁵ Düng ciah chang gui naw hmai kiang ne ning khawt püi khai gui, changshe gui naw ning m’hleeihlak khai gui.

⁶ Changshe gui ah ng’thu cu ngawn sih nak vai kyak ci, Cun ung phi düng ciah chang ah ng’thu naw kyikyawk ci gui gung gui ci.

⁷ Changshe gui naw yungkiak nak bui ci gui, cun ung phi düng ciah kyong khui gui cu ghing ne ng’shon ci gui.

⁸ Nang cu na lulang ung m’tam nak na gah khai, na gu ang ung chang gui naw ning yuk teng khai gui.

⁹ Chang düt ah kya ne hnun m’ghin nak vai bi bi cu, bawi mang ah bi bi neta ei cawi ah ta bä pi ci.

¹⁰ Changninaw a ui ai cu akni ah m’htei ci, changshe cu m’ghämce ci.

¹¹ Khüighat ne lo bik cicu a ei vai da ci. Cun ung phi kholä ciah bi ung akhin ng’pyi sak cicu ak gu-ang ah kyak ci.

¹² Chang shekha avan naw ang yak hlü cu akshe shui ne bi vai ah kyak ci, Cun ung phi düng ciah chang cu khäng sei ng’düi ci.

¹³ Chang shekha cu amät ah ng’thu naw mät pha ba ci. Cun ung phi düng ciah chang cu khüikha nak phyawn nak ci.

¹⁴ M’cümhnah nak na gah cu mna mät ah ng’thu la na mät ah bi ungka ah kyak ci. Nang naw na mät awn khinkha cicu na gah khai.

¹⁵ Chang gu ang gui naw angtäi sei ami mät hman ciah ngai ci gui. Cüivai ci naw m’cäi ä ngai ci.

¹⁶ Chang gu ang am lung she ung ang ghhit ah ng’hmat sak ci. Lulang ciah chang naw lü ng’aa nak nawng thei ci.

¹⁷ Düng ci na pyen ung taga sei nabi ah kyak ci, hleeihlak nak naw kä taga nak gawk sak ci.

¹⁸ A i kä ngaih ah ng’thu düt naw khim awn tawk ah mäih ah nat sak ci. Cun ung phi cai ciah ng’thu naw gai nak pek ci.

¹⁹ Hleeihlak cicu a ghin nak tawi ci, ng’düng ciah ghin nak cu khong län ung om ci.

²⁰ Akshe bi vai ah pawng püi ciah chang cu, cäi vai ah shekak ci, Cun ung phi akni bik ciah chang naw yeikyai nak hmuk ci.

²¹ Chang düng gui ah khan ah akaa kä gawk lawk khai, changshe gui cu akholä ah kyak ci, cun ung phi yaica nak om khai.

²² Bawipa naw hleei cicu thüi nak ci, cun ung phi ang thu khäm cicu yei nak ci.

²³ Lunglang ciah chang cu a hmuhmat ung phi adüm ah om ci, cun ung phi chang gu ang gui naw, kä ami hmuhmat cu ahäu ne pyen ci gui.

²⁴ Khüighat ne bilawh nak naw huham pek khai, Damduh nak naw changshäm ah ning pyang khai.

²⁵ Ng’ä ai nak naw na yeikyai nak ning gut khai. Cun ung phi m’hni nak ah ng’thu naw hmai ning kiang sak khai.

²⁶ Düng ciah chang cu c teihpüi ah lam shüm ciah kyak ci. Cun ung phi changshe ah hteh nak ah lam naw lam hma sak ci.

²⁷ Dam ciah chang naw amät ah gah phi kä ei mang hlawt ci. Khüi ne ng’bik ci naw khawh gah ne bämang nak ci.

²⁸ Düng nak cu ghin nak ah lam ah kyak ci. Shetkat nak cu sih nak ah lam ah kyak ci.