NG'THU K'THUUK~ 11 - Cho Bible Common Language 2016

¹ Kä hman ciah nän nak mang cicu Bawipa naw thüi nak ci. Hman ciah khin nak cu Bawipa naw yei nak ci.

² Chang ah ng’shei cicu tuhbäi ge thui aa nak om khai. Cüvai pi cicu bä tu pi khai.

³ Nang cu na ni ung düng nak naw lam ning m’shüm khai. Kä ng’ap hning ciah chang gui cu ami mät ah kä ng’düng nak naw m’di gui khai.

⁴ Bühmang nak naw sih nak na bui hnüüp ung kä akni ah ning kyak sak khai. Cun ung phi düng nak naw a hnun ning hun khai.

⁵ Düng nak naw changniah ghin nak cu bä sak pi ci. Cun ung phi chang shekha naw amät ah kiuk ng’tän nak vai bik ci.

⁶ Düng nak naw changnicu gung ci, cun ung phi ngaih gep vai ah kä kyak ciah chang cu amät ah m’hling ung awk ba ciah kyak ci.

⁷ Chang shekha a sih ung am lung ngaih cu sih püi ci, Akbä pi ah ang ngaih-tüh phi a kholä ah kyak ci.

⁸ Düng ciah chang gui cu khüikha nak ung shungvong gui ci. Ani ah hnün ung changshe gui hteit ci gui.

⁹ Khanpughi kä yum cah chang gui ah ng’thu awn nang cu na cümbawng khai, Cun ung phi düng ciah cüivai nak naw ning hun khai.

¹⁰ Düng ciah chang gui ah bä nak ni nak ung mang gaw cu yei ci, Changshe a sih ung yei ne m’lau nak om ci.

¹¹ Düng ciah chang gui ah phyuh theh nak awn mang gaw cu dämduh ci, Cun ung phi changshe gui ah ng’thu awn mang gaw cu dishum ci.

¹² Chang gu ang naw chang hei gui ah mawng akshe ah pyen ci, lulang ciah chang cu a düm hta ah om ci.

¹³ Ng’pyen sak ciah chang naw m’yih vai phi phleh ci, Cun ung phi bä sei ng’ap ciah chang cu ngaih gep vai kyak ci.

¹⁴ Lam shüm ci kä a om ung pakhui kho cu kya ne ng’täng ci. M’shüm thein ci ada ung lawt nak om ci.

¹⁵ Chang lam hteit ah pu thung vai ah shai na tak tu ah a kyak ung, na ng’yuu ba khai nei, nang ah om ah kä a kyakung na nawng en cu bä pi khai.

¹⁶ Bä ciah hnumi cu chang m’sui nak om ci, Nikiom nak kä om ciah hnumi cu thui ng’aa nak om ci. Dam ciah chang naw ngui kä gah ci, Cun ung phi ng’khän ciah chang cu bühmang ci.

¹⁷ Na mät nani yah ung na mät naw na mät na m’tam ci, na mät na nget yah ung na mät naw na mät na tüihtok ci.

¹⁸ Chang shekha naw akcang ah a i kä gah ci, Cun ung phi düng ciah bi na bi ah a kyak ung, nang cu m’cümhnah nak na gah khai.

¹⁹ Hman ci bi vai ah k’bäi cicu ghing khai, hma ci bi vai ah ling cicu sik khai.

²⁰ Akshe ah m’lung ngai ciah chang cu Bawipa naw thüi nak ci, Cun ung phi a hman bik cicu m’hni ci.

²¹ Ng’htei sei nami hmat vai cu, changshe gui cu m’kyuk nak om khai, düng ciah chang gui cu phyawng khai gui.

²² Lunglang nak kä om ciah kyom ciah hnumi cu, vawk ah hna khawng ung ghui m’hnaak awn täng ci.

²³ Changnigui ah ng’yak hlü cu angtäi sei akni ah kyak ci, Changshe gui naw ami ng’yak hlü ami gah ung chang päng cu m’lungshe ci.

²⁴ Chang am akda pe ta ne phi bämang law pi ci om ci, aktä ah m’cun m’sep ne phi du khaih law pi ci phi om ci.

²⁵ Nami khailang vai, khailang cicu bämang khai, chang m’hteihtang cicu chang naw m’hteihtang ba ci,

²⁶ Geit m’sep ne a phu a küi law ung a yoih vai ah gim ciah chang cu chang gui naw plah ci gui. Cun ung phi htang yoi ciah chang cu m’hlüngtai ci gui.

²⁷ Na ng’bü nak ani ung chang naw ning chang m’sui khai, Cun ung phi yaica nak na shui läi ung, acun na gah khai.

²⁸ Amät ah khawh ngaih u ciah chang cu, sing hnah chawng ah mäih ah kyak khai. Cun ung phi düng ciah chang cu khoicha khaw ah sing lim ah mäih ah bühmang khai.

²⁹ A kyong khui ung khüikha nak gawk law sak ciah chang cu, ak hnu ah akholä ma nak khai. Ang lam ciah chang cu angtäi sei cüivai ciah chang ah changshäm ah kyak khai.

³⁰ Düng nak naw ghin nak pek ci, cun ung phi ng’tukvok nak naw nawt pet yawp ci.

³¹ Changnigui cu khomdek khan ung m’cümhnah nak gah ci gui, cun ah kyasei ng’htei sei nami hmat vai cu, shang shekha gui la chang kaa gui cu m’kyuk nak gah khai gui.