NG'THU K'THUUK~ 10 - Cho Bible Common Language 2016

Solomon Ah Thuthuuk

¹ Shin gui cu Solomon ah thuthuuk gui ah kyak ci: Cüivai ciah hta nau naw apa yei sak ci. Gu-ang ciah hta nau naw anu thüi sak ci.

² Kä düng ci bi na gah ah khawh naw kä akni ah ning kyak sak khai. Cun ung phi düng ci naw hnun gui hun ci.

³ Bawipa naw changnicu ei kä cawi sak ci. Cun ung phi changshe gui ah ng’yak hlü cu sheet sak ci.

⁴ Damduh cicu dukhaih ci, khüighat cicu bühmang ci.

⁵ Lunglang ciah chang naw geit a hmin sang ung khäm ci, geit khäm yah ung ip cicu thüisei nak om ci.

⁶ Changninaw hriham gah ci, changshe ah ng’thu ung shaishe ng’thup ci.

⁷ Changnigui cu shüm gui vai. Cun cu phyuhtheh nak ah kyak ci, changshe gui cu ang ghit ah m’hnih gui vai kyak ci.

⁸ Lunglang ci naw chang ah m’cäi dou ci. Ak u ang ah ng’thu cicu dishum ci.

⁹ Düng ciah chang cu phyawng ci, ngaih gep ci, cun ung phi kä düng cicu phak khai gui.

¹⁰ Düng nak hnu nak cicu cümbawng ci, bi ah mawng ang dang ah pyen cicu dimdeeih nak bik ciah kyak ci.

¹¹ Changt ni ah ng’thu cu ghin nak ah tui khawng ah kyak ci, Cun ung phi changshe ah ng’thu ung shaishe ng’thup ci.

¹² Thüigen nak naw khüikha nak thawh sak ci, M’hni nak naw apäng avan m’gein ci.

¹³ Lunglang cicu akbä ah ng’thu ci, gu ang ci naw m’kyuk nak gah ci.

¹⁴ Cüivai ci gui naw ami hmuh ng’yak avan khäm ci gui, gu ang ciah ng’thu ung dishum nak ng’et ci.

¹⁵ Khawhcham naw bühmang cicu shungvong ci, ghawipyam nak naw dukhaih cicu m’di ci.

¹⁶ Akni bi sah a phu cu ghin nak ah kyak ci, katnak naw katnak pi ah lam shüm ci.

¹⁷ Chang ah m’cäi ngai ciah chang cu ghing khai, a cheishoh nak kä ng’yu ciah chang cu, kyihkyawk nak ung gawk khai.

¹⁸ A thüigen nak thup ciah chang cu hleei ciah kyak ci, ng’pyen sak ciah chang cu gu ang ciah kyak ci.

¹⁹ Akda ah ng’thu ung katnak om ci, cüvai ciah chang cu adüm ah om ci.

²⁰ Changni ah ng’thu cu ngui k’cüm ah mäih ah kyak ci. Cun ung phi gu ang cicu amät ng’ngawn ci.

²¹ Changni ah ng’thu naw chang akda bä sak ci, cun ung phi gu-ang cicu amät ngawn ci.

²² Bawipa ah hriham naw bämang nak ning pek ci, Cun ah bämang nak ung thüisei nak kä ng’caw ci.

²³ Changshe cu cheishoh nak bi ne yeikyai ci, Lunglang ciah chang cu cüivai nak ung yeikyai ci.

²⁴ Düng ciah chang naw ang’yak hlü gah ci. Chang shekha naw a kyih pikbäih gah ci.

²⁵ Pui kho akhi law ung changshe gui cu yon gui ci, Cun ung phi changnicvu angtäi sei phyawng ci.

²⁶ Dam aih ciah chang cu kä na ghüh sawh en vai, ani cu haa ung thui a kawh ah mäih ah, meikhu naw mik a khu ah mäih ah kyak khai.

²⁷ Bawipa läk cicu akshou ghing ci, changshe cu akhin kä gawk pha sei sik ci.

²⁸ Changnigui ah ngaih u nak naw yeikyai nak ah lam shüm ci, changshe gui cu a kholä ma na ne mang ci gui.

²⁹ Bawipa naw düng ciah chang cu shungvong ci, cheishoh cicu m’dishum ci.

³⁰ Düng ciah chang gui cu angtäi sei m’lung üp khai gui, Cun ung phi changshe gui cu khaw ung kä k’pawih ba khai gui.

³¹ Düng ciah chang gui cu cüivai ne ng’thu ci gui, Cun ung phi akshe ah ng’thu ciah m’lei cu maih khai.

³² Düng ciah chang gui naw akni ah ami ng’thu vai hmat ci gui, Cun ung phi changshe gui cu angtäi sei akshekha ah ng’thu ci gui.