NG'THU K'THUUK~ 1 - Cho Bible Common Language 2016

Ng’Thu K’Thuuk ah Küikyang Nak

¹ Israel ghangpughang, David ah htapa, Solomon ah ng’thu k’thuuk gui ah kyak ci.

² Shin ah thu thuuk gui naw cüivai nak, m’hnüt bäi nak, nik ciah m’cumcäi nak, thu thuuk gui thuk kau khai ah hmuhmat nak hning gui cu m’shümthein khai nei.

³ Acun gui naw a i hawkcha ah lulang ne om vai, a i hawkcha ah düng vai, taga vai, hmai kyang vai, gui cu ning m’thein gui khai.

⁴ Acun gui naw kä hmu ng’ya thei ciah chang cu ng’langkha khai ah pyan u ne, chang nong gui cu a i hawkcha tungpa vai cu m’thein gui ci.

⁵ Shin ah thu thuuk gui naw cüivai ciah chang ah hmuhmat nak cu m’shung hlawi ne tatlah cicu m’shümthein ci.

⁶ Cun ah kyasei ng’thup ciah thu thuuk ah mawng la cüivai chang gui ung dang lawk ciah cuhcan nak gui cu, ngami naw hmat hning ci gui.

Chang Nong Gui M’cäi ä Nak

⁷ Bawipa kyih aa nak cu hmuhmat nak ah a phung ah kyak ci, gu-ang ciah chang naw cüivai nak cu a i ah kä ngai ne, kä m’thei thang hlük ci.

⁸ Ka hta, napa la na nu ah ning m’cäi cu geing na ne na ngaih vai.

⁹ Cun ah m’theithang nak gui cu, na lu ung kyom ciah lukhu ah kya ne na hnü ung ning müi sak ciah äh awi ah kyak ci.

¹⁰ Ka hta, cheishoh ciah chang gui naw ami ning tüihtok ung kä na ng’kiaa en vai.

¹¹ Avaisü ah ngami naw, “law ä, chang shui ne mi ngawn kaw! Changni cu gaih vai ah ming’tuk püi kaw!

¹² Mi hmuh gui yah ung ngami cu ghing gai khai gui, cun ung phi mi ng’tuk püi gui ung ngami cu sik khai gui nei.

¹³ Mikmi naw khawhcham avan mi hmuk khai, mi gut tep ah khawh awn mi im mi be sak khai.

¹⁴ Keimi ah law ne ng’dawn law tu vä, mi m’gu ne mi van naw mi ng’pai khai nei’ cik khai gui.”

¹⁵ Ka hta aw cun ah mäih chang cu kä na läk tu vai. Cun gui awn ng’shawng ne na m vai.

¹⁶ Ngami cu akshe bi vai ah kä ng’giin ci gui. Chang ngawn vai ah patyaang ci gui.

¹⁷ Kha pha vai ah ngäng ne cuun yah ung ng’vai phüi cu kä nik ci.

¹⁸ Cun ung phi cun ah mäih chang gui cu ami mät ah phäh ah m’hling baang ciah kyak ci gui. Ami sih nak vai cuun cuung ci gui.

¹⁹ Gut tep ah khawh naw gut tep ci gui ah ghin nak cu m’dang ci. A cun naw gut tep cicu m’sih ci.

²⁰ Ngai vä! cüivai nak cu lamtung ung ng’khü ci nei.

²¹ Mang gaw m’kawt ung m’lau ne ng’khü ne, chang ah ng’bum nak ung ng’shäu ci nei.

²² “Chang gu k’ang gui! A i güt nami gu ang khai ang? A i güt hmuhmat nak cu m’lepse ne nami yeikyai khai ang? kä nami ng’thei thang phung khai ma?

²³ Kei naw ka ning huttaap gui cu ngai vä! Kei naw akni ah ka ning m’cäi gui khai, ka hmuhmat nak ka ning k’pai gui khai.

²⁴ Kai naw ka ning khü gui pyi ci, nami law vai ah ka ming la gui ci. Cun ung phi kä nami na ngai ci. Kei cu a i ah kä nami na sui ci.

²⁵ Kei ah ning m’cäi gui avan nami nawng ci. Ka ning m’shung hlawi gui kä nami ng’ya hlük ci.

²⁶ Cun ah kyasei khüikha nak ung ka ning gaih tu gui khai. Akyihshe naw a ning kyak shi law gui ung,

²⁷ Akyihshe cu khinu ah mäih ah a law ung khüikha nak vai ah akhi law ung nangmi nami m’neh m’awh geinvai law ung, kei naw ka ning m’lep na gui khai.

²⁸ Cun ung nangmi naw cüivai nak cu nami khü khai, cun ung phi kä ka ning m’shang gui khai, nangmi naw khaw nü ung nami na shui khai, cun ung phi kä nami na hmuk khai.

²⁹ Nangmi naw hmuhmat nak cu kä na mi mang man ci, Bawipa cu kä nami kyih aa phung ci.

³⁰ Ka ning m’shung hlawi gui kä nami yum ci.

³¹ Cun ah kyasei nami mät ah geit ah am theih cu nami ei ba khai. Nami mät ah bi naw ning gaw pyam sak gui khai.

³² Kä hmu ng’ya thei ciah chang gui cu sik ci gui, a i ah kyasei ci ung ngakmi naw cüvai nak hnu nak ci gui. Changshe gui cu ami mät ah bi awn dishum ci gui.

³³ Cun ung phi kei na ngai ciah chang cu am lung üp khai. Anii cu phyawng khai kyih vai ah mawng kä om khai.