NEHEMIAH 9 - Cho Bible Common Language 2016

Chang gui naw ami Katnak Ng’yu ba ci gui

^1-2 A cun ah cha a hnüüp m’ku lei phli nak ung Israel chang gui cu ami hmakat nak thüi ne ami ng’yu ba ah mawng ami m’dang nak ah ei hlawi khai gui ah ng’bum ci gui. Ngami cu akhui hei chang van ami van awn ami mät ng’pai pyi ci gui ah kyak ci. Ngami cu ami thüisei nak dang khai ah suishe sui ne, ami lu khan ah m’vut tha u ne kyak ci gui. Cun kawn ah ng’düi law u neta ami mät la ami pupa gui ah m’cheishoh ah hmakat nak gui cu ng’yu ba ci gui.

³ Bawipa ami Khanpughi ah thukhän cu nazi thum ung ami ma ah ami phat kawn ah, nazi thum bamä ung ami katnak ng’yu ba u neta, Bawipa ami Khanpughi cu khawihnah ci gui.

⁴ Levit gui ah düih nak vai ah chagä om ci, a cun ah khan ah Jeshua, Bani, Kadmiela, Shebaniah, Buni, Sherabiah, Bani la Chenani gui ng’düi ci gui. Ngami cu Bawipa ami Khanpughi ah m’lau ne taigü ci gui.

⁵ Shin ah Levit gui naw khawihnah vai ah ng’khü ci gui: Jeshua, Kadmiela, Bani, Hashabniah, Sherebiah, Hodiah, Shebaniah, la Pethahiah. Ngami naw: Ng’düi law ne, Bawipa nami Khanpughi cu m’hlümtai vä; Khonglän ung ani cu m’hlümtai vä! Hnicim chang naw m’hlümtai khin vai ah kä m’hlümtai hlawt ung phi, a bämang nak ah ming cu chang nü naw m’hlümtai sä.”

Ng’zuu ne Taigü nak

⁶ Cun kawn ah Israel chang gui cu shin ah taigü ci gui: Nang, Bawipa, nang bäng nei Bawipa; Nang naw khomik ung khankho la aisi gui cu na pyang ci. Nang naw khonglei, tuinu la acun ung om ci nü cu na pyang ci: Nang naw avan am ghin nak na pek ci. Khankho huham nak gui naw kawp ne ning khawihnah ci gui.

⁷ Nang, Bawipa Khanpughi naw Abram cu na ghü ci Babilonia ungka Ur cu nawng ne hteh sak ne; ang ming cu Abraham ah na m’thawng pe ci.

⁸ Ani cu nang ung bekhüt sei na hmuk ci, ani awn nang naw thukhän na bik ci. Nang naw shin ah khaw gui na pek khai ah shaitak na bik ci. Kanaanit khaw, Hittit khaw la Amorit khaw, Perizzit khaw, Jebusit khaw, la Kirkashit khaw, cun gui cu ani ah hta ng’shon gui ah ami om nak vai ah kyak ci. Nang cu na bekhüt ci kya ne na shaitak cu na k’pang ci.

⁹ “Kami pughipa gui Egypt khaw ah a i hlawk ah ami yaica cu nang naw na hmuk ci; Tuisen tuinu ung m’hteihtang gui vai ah ami ng’khü cu nang naw na ng’yak ci.

¹⁰ Nang naw ghangpughang hnungtuk püi ne cäi aih aih gui vai na bik ci, Abawi gui la a khaw ung chang gui phi na hnungtuk püi gui ci, a i ah kyasei ci ung ngami naw, na chang gui, a i hlawk ah ami yawshe nak cu nang naw na hmat ci. Nang naw na näng nak ah mingthang cu tuhngawi güt nang ung om ci.

¹¹ Na chang gui ah phäh ah nang naw tuinu kan ne lam na pyang ci, cun kawn ah m’dek hu ung na hteh sak gui ci. Ngami k’täm law gui cicu tui thuuk ung lut ci gui, tuinu hnawk ung lung a hniim ah mäih ah kyak ci.

¹² Khaw hnüüp yah ung khongmei awn lam shüm gui ne, khaw amü law ung ami lam cu mei awn na shü gui ci.

¹³ Sinai m’htung ung khankho ah ka kyum law ne; Na chang gui cu na ng’thu püi gui ci thukhän akni la m’theithang nak akbä cu na pe gui ci.

¹⁴ Na ng’chiin nak hnüüp cu theingcim khai ah ami k’pan vai ah na m’theingthang gui ci, Na ng’thukhän gui cu na changshäm Moses ung na pe gui ci.

¹⁵ “Ei ami cawi ung khankho ah ka m’htut na pe gui ci, Tui ami gha ung lungnu ungka tui na pe gui ci. Nang naw na pek gui vai ah shai na tak khaw cu ami khäm vai ah nang naw na pyen na gui ci.

¹⁶ Cun ung phi kami pupa gui cu chang ah ng’shei u ne, ami m’lung ling ci. Nang ah thumkhän läk vai ah mak ci gui.

¹⁷ Na ng’thu läk vai ah mak ci gui; nang ah bi gui avan m’hnih ci gui; Nang naw na m’dang ah cäi aih vai gui phi m’hnih ci gui. Chang ah ami ng’shei nak awn Egypt khaw ah changshäm ah kyak ba vai ah hteh püi ba gui khai ah ami ng’vai cu ghü ci gui. Cun ung phi nang cu m’geinsei ciah Khanpughi ah na kyak ci; Nang cu na m’gein ci, na m’hni ci, kä na m’lungshe yäi ci. Na chimgein nak cu dämduh ci, nang naw kä na nawng gui ci.

¹⁸ Ngami naw vantang ah a gup cu lawi ne pyang u neta, Egypt ah ka na law püi ba gui ciah Khanpughi nei cik ci gui. Bawipa, nang cu anghtei ah ning shetkat nak ci gui nei!

¹⁹ Na chimgein nak cu dämduh ci kyasei, khaw ng’gau khaw ung nang naw kä na nawng shüt gui ci. Mü la hnüüp ung lam shüm gui ciah ng’mei la khongmei cu nang naw kä na nawt heng ci.

²⁰ Na ni nak awn a i ami bi vai cu nang naw na m’thein gui ci. Nang naw mana m’htut m’bei gui ne ami awk vai tui na pe gui ci.

²¹ Kum phlikip ung bungpuk ah ami ng’yak hlü avan na pe gui ci; ami sui kä kheei phung ci, ami khaw kä na phung ci.

²² “Nang naw na näng sak gui ci, ami pakhui khaw gui, uknak khaw gui, cun ah kho gui cu ami mät ah kho ung khogii ci gui. Sihon ah uk Heshbon khaw, Og ghangpughang ah uk ah Bashan khaw gui cu ngami naw khäm ci gui.

²³ Nang naw khankho ah aisi chü hta nau na pe gui ci, ami pupa gui am na pek gui vai ah na shaitak ah khaw khäm sak gui ne, na om sak gui ci.

²⁴ Ngami naw Kanaan khaw cu khäm ci gui; a cu ah om ciah chang gui cu nang naw na hnim gui ci. Nang naw na chang gui am, Kanaan ghangpughang la chang gui ah khan ah ami bi hlü ami bi vai ah huham na pe gui ci.

²⁵ Na chang gui naw khäng ciah mang gaw gui, anglei nik ciah khaw, khawh be ciah im gui, cawh pyi ah tui shawk gui, olive sing gui, theih ciah sing gui, la sapyit dum gui cu khäm ci gui nei. Ngami cu ami ei hlü ei u ne plan lawk ci gui; nang naw na pek gui ah akni gui avan awn yeikyai ci gui.

²⁶ Cun ung phi na chang gui naw ning küknet püi u ne, na ng’thu kä ngai ci gui; Nang ah thukhän cu ng’hlah tak ci gui. Ng’thu k’bäi gui ne, nang ah ami ng’hlah law ba vai ah pyen ah gui ciah prophet gui cu ngami naw ngawn ci gui. Ngami naw leng ba ba ne ning yawshe nak ci gui,

²⁷ cun ah kyasei ngami cu ami ga gui am näng sak gui ne na uk sak gui ci. Ngami ami khüikha yah ung na m’htei gui vai ah ning thäh u sei, Khankho ah ka naw na m’shang gui ci. Dämduh ciah na chimgein nak awn ami ga ung gung gui khai ah angvai gui cu na tüih pe gui ci.

²⁸ Dimdeeih nak a gawk law ba ung, ngami cu katnak bi ba ci gui, cun ung nang naw ami ga gui am na näng ba sak gui ci. Cun ung phi ngami ng’zuu ba u ne, na hun gui vai ah ami thäh law ung, Khankho ah ka naw ng’yak pe gui ne, dämduh ciah na chimgein nak awn leng ba ba ne na gung gui ci.

²⁹ Na m’theingthang gui ami läk vai ah thu na k’bäi gui ci, cun ung phi, na thukhän k’pan cu ghin nak ah lam ah kya pang sei phi, Ngami naw chang ah ng’shei ne na thukhän cu hnungtuk ci gui. Lingkeng u ne, ami m’lung ling ne, na thu ngaih vai ah mak ci gui.

³⁰ Kum law ba kum law ba sei nang naw m’lung sau ne na m’cäi gui ci. Nang naw na prophet gui ami ng’thu vai na m’shum phyuk gui ci, cun ung phi na chang gui cu pang ci gui, cun ah kyasei nang naw a hei pakhui gui am na näng sak gui ci.

³¹ Cun ung phi na chimgein nak cu dämduh sei, nang naw kä na nawng gui ci, kä na m’di gui ci. Nang cu chihna, chimgein ciah Khanpughi ah na kyak ci!

³² “O Khanpughi, kami Khanpughi, a i hlawk ah na dämduh ci ang! A i hlawk ah kyih vai kya ne, a i hlawk ah na huham mah ci ang! Na thukhän shaitaak cu nang naw bekhüt ne na k’pang ci nei. Asirian ghanpughang gui naw ami nak shedam nak gui ungka naw, tuhngawi güt ung, a i hlawk ah keimi kami yaica ci ang! Kami ghangpughang gui, kami ng’vai gui, kami taigü gui, prophet gui, kami pupa gui, kami chang gui avan yaica ci gui. A i hlawk ah kami yaica cu na shüm gui ä!

³³ Keimi na na m’kyuk gui cu na ng’düng ci nei; Keimi katnak bi pang u ngä sei phi, nang cu na bekhüt ci nei.

³⁴ Kami pupa gui kami ghangpughang gui, kami taigü gui naw na thukhän cu kä k’pang ci gui. Nang ah thumkhän gui la na k’bäi nak gui ngami naw kä ngai ci gui.

³⁵ Nang naw na pek gui ah ng’shawng ne anglei nik ciah khaw ung ami om yah ung nang ah hriham awn ghangpughang gui naw na chang gui cu uk ci gui; Cun ung phi ngami cu katnak ungka kä ng’hlat law ba ci gui, na bii phi kä bik ci gui.

³⁶ Nang naw na na pek gui ah khaw, anglei ni ne, ei vai na pe gui ciah khaw ung, tuhbäi keimi changshäm ah kami kyak ci nei.

³⁷ Keimi ka hmakak ci kyasei, kami khaw ung theihpai ci phung cu, kami khan ung na tha ah ghangpughang gui ah gawk yawp ci nei. Keimi la kami seime ah khan ah ngami naw ami m’hni ah bik ci gui nei, cun ah kyasei keimi kami khüikha aih ci nei!”

Chang gui naw Yumnak Ca Guk ci gui

³⁸ Shin ah a kyak gui avan ah phäh ah, keimi, Israel chang gui naw, bä ciah yumnak ca gu u ngä sei, kami ng’vai gui, kami Levit gui la kami taigü gui naw m’hnütnak awm cun cu m’hnüt ci gui.