NEHEMIAH 8 - Cho Bible Common Language 2016

Ezra naw Thukhän cu Chang gui ah Ma ah Phat ci

¹ A cha chih nak ung Israel chang gui ami van cu gawnu gui ung khäng ne om tuk ci gui. A cun ah cha a hnüüp ät hnüüp ung ngami ami van Jerusalem ah Tui m’kawt ah akyong täng a awngnak ung ng’bum ci gui. Bawipa naw Israel gui am Moses ung a pek gui ah thukhän ca uk cu la ne a law püi vai ah taigü ah kya ne thukhän hmuhmat ciah Ezra cu k’thäh ci gui.

² Ezra naw cun cu la neta chang gui ami ng’bum nak ah hmun ah — pami, hnumi, a hmaw gui van hmat thei khai ah ng’vai ci phung;

³ cun ah m’kawt ah pei a awng nak ung, khaw thaih ung tün ne khaw hnüüp güt chang gui ah ma ah cun ah thukhän cu phat sei, chang avan naw tügüh ne ngai ci gui.

⁴ Ezra cu ng’thu pyen nak vai ah peen awn ami cawh ah chagä khan ah ng’düi ci. Shin ah chang gui cu akpat täng ah ng’düi ci gui: Mattithiah, Shema, Anaiah, Uriah, Hilkiah la Maaseiah; Malchijah, Hashum, Hashbaddanah, Zechariah, la Meshullam.

⁵ Ezra cu chang gui ah hlüng tuba ciah chagä ung ng’düi sei chang gui ami van naw m’hteih ne teng ci gui. Ani naw ca uk cu hmawng khäta ami van ng’düi lawk ci gui.

⁶ Ezra naw, “Bawipa m’hlüngtai vä, Dämduh ciah Khanpughi nei!” cik ci. Chang gui ami van naw ami kut shäng neta ami pyen cu, “Amen! Amen!” cun kawn ah ami hmai m’dek ung gawk khai ah kaawp u ne khawihnah ci gui.

⁷ Cun kawn ah ngami cu tho ng’düi law ba u khäta, shin ah Levi chang gui naw thukhän ah mawng cu m’thein tu gui ci gui: cun gui cu Jeshua, Bani, Sherebiah, Jamin, Akkub, Shabbethai, Hodiah, Maaseiah, Kelita, Azariah, Joyabad, Hanan la Pelaiah ah kyak ci.

⁸ Ngami naw Khanpughi ah thukhän cu k’phlan ne cun cu pyen u sei, chang gui naw hmat thei ci gui.

⁹ Chang gui naw thukhän ah akthäh cu ng’ya u neta, hnün aih u neta kyap ci gui. Cun ah kyasei Nehemiah uktubawi, Ezra taigü la thukhän hmuhmat ci, thukhän phlan ciah Levit gui naw chang avan am m’thein ci gui, “Tuhngawi cu Bawipa nami Khanpughi ah theingcim ciah hnüüp ah kyak ci, cun ah kyasei kä nami thüi vai, kä nami kyah vai.

¹⁰ Tuhbäi nami im ah hteit ba ne ng’ei awk vä. A ei vai kä büh ciam nami buh nami sapyit tui cu teipai tu vä. Tuhngawi cu mi Bawipa ah ma ah theingcim ci nei, cun ah kyasei kä nami thüi vai nei. Bawipa naw aning pek gui ah yeikyai nak naw nangmi cu ning khüighat sak gui khai nei.”

¹¹ Levit gui naw chang gui dimdeeih sak ne cun ah theingcim hnüüp ung kä ami thüisei vai ah m’thein gui ci gui.

¹² Chang gui ami van ami im ah hteit ba u ne yeikyai ne ei awk ci gui, chang hei gui phi teipai tu ci gui, a i ah kyasei ci ung ngami ah ma ah ami phat cu ngami naw ami hmat pyi ah phäh ah kyak ci.

Phung Tuk Pawi nak

¹³ A ngawi ung ami pahta ng’vai gui, taigü gui la Levit gui cu thukhän ah m’theithang ng’thei tuk khai gui ah Ezra ah hteit ci gui.

¹⁴ Bawipa naw Moses ung a pek gui ah thukhän naw Israel chang gui am phung tukpawi sang ung, phung shaam ung ami om vai ah ak bäi cu hmuk ci gui.

¹⁵ Cun ah kyasei Jerusalem la a hei mang gaw, gawnu gui avan ung shin ah m’shüm thein nak gui cu pe gui ci gui: “Khaw gui ah hteit u ne m’htai ah ng’ban, olive ah ng’ban, mura ng’ban, hliip ah ng’ban la a hei sing gui ah ng’ban gui cu, thukhän ung om ciah m’shüm thein nak ah mäih ah Phung gui tuk nak vai ah shui law vä.”

¹⁶ Cun ah kyasei chang gui naw sing ban gui shui u ne, ami im vailang ung, ami im pei, Taigüim pei a awng nak la tui m’kawt pei la Ephraim m’kawt pei awng nak gui ung phung sham gui tuk ci gui.

¹⁷ Ami pha nak gui ung ka law ba ciah chang gui ami van cu phung tu u ne a cun ung om ci gui. Cun cu Nun ah hta Joshua ah khin ung tün ne, ak htük bäih ah bi ah chang nü cu cäicat ne yeikyai ci gui.

¹⁸ Pawi tün nak hnüüp ung tüi ne ang pyi ung khüt sei, Khanpughi ah thukhän avang cicu a hnüüp tä phat ci gui. Ngami naw cun ah pawi cu hnüüp chih ung bik ci gui, ak hnüüp cheit hnüüp ung thukhän naw ak thäh mäih ah khüüp pawi nak bik ci gui.