NEHEMIAH 6 - Cho Bible Common Language 2016

Nehemiah Hnungtuk ne Ami Bi gui

¹ Keimi naw mangpaang co ba ne pyi u ne, akpawk gui kami nawng a i kä om ci, cun ung phi m’kawt gui ung shohpaang käkami pyan pha ci, cun cu, Sanballat, Tobaih, Keshem la kami ga gui avan naw ng’yak ci gui.

² Cun ah kyasei Sanballat la Keshem naw Ono khodou ah, pigaw tumat ung hteit ne ka hmuh gui vai ng’thu m’khäh lawk ci gui. Cun cu kei ami na hnim vai ah ami theileh ah kyak ci.

³ Kei naw chang ghüh ne ng’thu ka m’shäk ba ci, “Kei ka bi aküikyang om ci kyasei, kä ka hteit hlawt khai. Nangmi law ne ka ning hmuh gui vai ah phäh ah kei naw ka bii kä ka nawng khai.”

⁴ Ngami naw a cun ah ng’thu bä cu phli vei na m’khäh lawk ci gui, a cun päng ung kei naw a cun ah ng’thu bä ka m’khäh ba gui ci.

⁵ Cun kawn ah Sanballat naw a changshäm tumat cu kei ah tüi law ne, ak hmaa nak thu m’khäh lawk ci, cun cu kä m’hnüt ah ca ah kyak ci.

⁶ Cun ah ca ung: “Nang la Jew chang gui naw, mangpaang nami cawh ba cu, nami ng’küknet nak vai ah nami pawng ah pyen ne, peileng ung chang gui naw ami pyen ah thumgawng om ci, Keshem naw kei am na m’thein ci. Ani naw a pyen ba mä cu, na mät ghangpughang ah na kyak khai ah na pawng htein,

⁷ Nang Judah ghangpughang ah na kyak law ah mawng, Jerusalem ung ng’shäu khai ah prophet gui cu na pawng püi pyi ci. Abawi mang naw shin ah amawng cu ng’ya ci nei, cun ah kyasei, kei la nang naw shin ah mawng, ng’hmu ne ni pyen khai nei.”

⁸ Kei naw m’hlan ne ka tüi ba ci, “Nang ah na pyen gui a i phi kä hman ci, shin gui avan namät ah ngaih na pyen ah kyak ci.”

⁹ Keimi kami bii kami m’düm vai ah ngami naw k’tha na ne na m’kyih gui ci gui, “Cun ung phi tuhbäi, Khanpughi aw na thamah sak ba ä” cine ka taigü ci!”

¹⁰ A cun ah khin ung kei cu Mehetabela ah tu, Delaiah ah hta Shemaiah ah ka va om tuk ci, ani cu a im ung ka, kä lut law hlawt ci. Ani naw, “Nang la kei cu Taigüim ah hteit ne atheing ciim hmun ung atäng ah ni ng’thup khai, shoh ni khai khai, a i ah kyasei ci ung nang ning ngawn khai gui ah ngami cu lawk khai gui nei. A i mü phih ngami law ne nang ning ngawn khai gui nei.”

¹¹ Kei naw m’shang ne, “Kei cu dawng ci la ng’thup ciah chang ah ng’khaw ah kä ka kyak ci. Kei cu Taigüim ah ng’thup ne ka hnun ka k’phiawn khai ah na ngai ne ma? Cun ah kä ka kyak khai.”

¹² Kei naw cun ka ngaih-tüh ung, Khanpughi naw Shemaiah ang htau püi ah kä kyak ci, Sanballat la Tobiah naw ng’mü khawh pe ni khäta, shin ah thumkyih ana pek ah kyak ci, cicu ka hmat ci.

¹³ Kei cu katnak ung na luh sak khai ah ani ami ghüh ah kyak ci, cun ung kabi cu m’di ne kamät phi na hmim khai gui.

¹⁴ Kei ka taigü ci, “Khanpughi aw, Tobiah la Sanballat ah bilawh cu shüm gui ä, m’kyuk gui ä. Kei k’tha na ne na m’kyih ci gui ah hnumi Noadiah la prophet gui avan cu shüm gui ä.”

Bii bi Pyi phleh nak

¹⁵ Elul cha a hnüüp m’ku lei hma nak, ami bi nak a hnüüp hma kip lei goi nak ung mangpang avan cawh ba cu pyi ci gui.

¹⁶ Kami pei ng’leng pakhui kho gui ung ka, kami ga gui naw acun ah mawng am hteihtang nak awn bii bi ang pyi cu chang nü naw hmat ci gui.

¹⁷ Shin ah khin akyong ung Jew ami ng’vai gui cu Tobiah awn ca ng’pe tuk ci gui.

¹⁸ Judah chang akda cu ani täng ah kya tuk ci gui, a i ah kyasei ci ung, ani ah a chu ah pa, Shekaniah, Arah a hta cu Jew chang ah akyak ah phäh ah kyak ci. Cun kawn ah a hta Jehohanan naw phi Berechiah ah hta Meshullam ah hta hnumi chu nak ci.

¹⁹ Tobiah ah ni nak abi gui avan cu chang gui naw kei ah ma ah pyen lawk ci gui, kei ah ka pyen phung phi ani am m’thein ba ci gui. Ani naw tha na ne ana m’kyih nak ah ca cu na pe lawk gäk gäk ci.