NEHEMIAH 5 - Cho Bible Common Language 2016

Dukhaih ci gui Ami Shedam nak gui

¹ Api sho hta khäta, chang gui akda hnumi ni, pami ni cu tün ne ami mät Jew chang gui chiu m’da ne ng’hnung tuk lawk ci gui.

² Amshah naw, “Keimi ah kyong chang kami da ci, keimi kami ghin nak vai ah htang akda hlü ci,” cik ci gui.

³ Amshah naw, “Kami ng’büh nak htang gah ne kä kami cawi vai ah kami lo, kami sapyitdum, kami im gui cu kami kyäng ci nei” cik ci gui.

⁴ Ahei amshah gui naw, “Keimi naw kami lo la sapyitdum ah phäh ah phlam kami pek vai ah ngui kami puk ci” cik ci gui.

⁵ Keimi cu kami Jew chang paw gui ah mäih ah pakhui ät ah kami kyak ci. Keimi ah hta nau gui cu ngami ah htanau gui ah mäih ah kä bä tuk ci gui ah kya ne ang? Cun ung phi keimi naw kami htanau gui cu changshäm ah kami kyak sak gui ci nei. Kami htahnumi gui amshah cu changshäm vai ah yoih gui pyi nei. Kami lo gui la sapyitdum gui cu chang gui naw ami lak pyi ah kyasei keimi cu amgeinkaa ah kami kyak ci nei,” cik ci gui.

⁶ Cun ah chiu ami m’da cu ng’ya neta kei ka m’lungshek sei,

⁷ Ka hnüntho khai ah ka k’bäi ci. Kei naw chang gui ah ami ng’vai gui la bawi gui am ka pyen na gui ci, “Nangmi naw nami phäi nau gui nami shedam na gui ci nei!” Kei naw shin ah ng’cuhvah pyen khai ah chang khli khü neta

⁸ Ka pyen nak gui cu, “Keimi naw kami m’khüt hning hlawk ah, ami mät naw ami mät a khohei chang gui ah ami yoih gui ah Jew phäi nau gui cu kami hleih ba gui ci gui nei. Tuhbäi nami mät ah phäi nau gui cu k’tut gui u ne, nami Jew chang gui mät ah ami mät ami ng’zoih vai!” Cun ung ami ng’vai gui cu a i kä pyen ba hning ne, kyip ah om ci gui.

⁹ Cun kawn ah kei naw ka pyen cu, “Nang naw na bi cu chei ci nei! Nang naw Khanpughi na ngaih vai, düng ci na bi vai. Kami ga gui la khuihei chang gui naw ami na gaih m’gin vai ah amawng, nangmi naw a i kä nami pek en gui vai.

¹⁰ Kei naw chang gui am ngui la k’htang ka k’pu gui ci, kei ah ka paw chang gui la kei ah bii bik ci gui naw phi a cun ah bik ci gui. Tuhbäi cun ah ami pu gui cu kä mi shang ba khai nei.

¹¹ Ami pu gui avan cu nami nawng pe gui khai nei — ngui phi, htang phi, sapyit tui phi, olive tui phi. Ami lo gui, sapyitdum gui, olive-lo gui, ami im gui cu ang ghit ah mi pe ba gui khai nei!”

¹² Ami ng’vai gui naw m’shang u ne, “Na pyen ah mäih ah kami bik khai nei. Keimi naw ami khawh gui kami pe ba gui khai, ami pu phi kä kami shang ba gui khai” cik ci gui. Kei naw taigü gui cu khü gui neta, ami ma ah angvai gui naw ami pyen ah shaitak cu ami k’pan vai ah ka ng’taam sak gui ci.

¹³ Cun kawn ah kei naw ka khei pat nak cu suut ne, k’thüng neta, “Nangmi ungka a shaitak kä k’pang cicu Khanpughi naw ashik cha ah bik khai. Khanpughi naw nami im gui la nami khawh gui avan cu ashik cha ah la yawp khai, nangmi cu ak plui ah ning nawng gui khai.” Cun ung om tuk ci phung naw pyen u ne, “Amen” cik ci gui, Bawipa m’hlüngtai ci gui. Ami ng’vai gui naw ami shaitak cu k’pang ci gui.

Nehemiah naw Kä a Ng’umkyaap nak

¹⁴ Kei cu Judah kho ung uktu ah ka kyak nak kum gha lei goi ah akyong avan ung, Artaxerxes uktubawi ah akum m’ku nak ung ka naw, akum thum kip lei goi nak khüt sei, kei la ka mätyah gui naw, uktubawi ah gah vai ah ei awk cu kä kami lak ci.

¹⁵ Kei ah kä bi pha ung bik ciah uktubawi phung naw chang gui cu ami phuih gih sak gui. Ngami naw ei la awk vai ah phäh ah hnüüp ät ung, ngui phe phli kip ci k’thäh gui ci gui. Ami changshäm gui naw phi chang gui cu she na gui ci gui. Cun ung phi kei cun ah kä ka kyak ci, a i ah kyasei ci ung kei cu Khanpughi ka kyih aa ci.

¹⁶ Kei naw mangpang cawh ba nak ung ka thagui avan ka mang ci, a i khawh phi angcheng kä ka lak ci. Kei ah phäh ah bii bik ciah chang nü naw cawh ba nak ung bi law tuk ci gui.

¹⁷ Jew chang gui la ami ng’vai gui phia la hmakip la ka pei ng’leng ah pakhui gui ung ka lawk ciah chang avan cu kei naw ka tawnglang ung akphlüt ah ka m’bei gui ci.

¹⁸ A hnüüp tä sei vantang tumat, htome akni pi chuk la ai akda cu ka m’bei gui ci, hnüüp gha ung hnü ät ci sapyit tui akni phi ka tu gui ci. Chang gui ami phuih a gih cu kei naw ka hmat ci, cun ah ky asei uktubawi naw a gah tu vai gui phi kei naw kä ka k’thäh ci.

¹⁹ O Khanpughi ka taigü ci, shin ah chang gui ah phäh ah kei naw ka bi phung cu na shüm pe ne na m’shum phyuk ä.