NEHEMIAH 4 - Cho Bible Common Language 2016

Hnungtuk Küknet Püi nak Nehemiah naw M’khüt ci

¹ Keimi Jew naw gui paang tün ne kami cawh ba cu Sanballat naw ng’ya neta, anghtei ah m’lungshe ne na päipih gui ci.

² Apawchang gui la Samaritan gakap gui ah ma ah ani naw a pyen cu, “Ami k’tha kä om ciah shin ah Jew gui naw a i bik ci gui ah ang ami ngaih? Ngami naw mang gaw co ba khai gui ah ng’bü u ne ang? Ngami naw khawihnah ami douthak nak awn hnüüp ät ung pyi ne bi khai ah ngai u ne ma? Ngami naw im cawh nak ah lung gui cu mei ah m’khih ah ng’awt bum ung ka la ba khai gui ah ngai u ne ma?”

³ Tobiah naw a pei ah ang düih neta naw pyen ba mä ne, “Ngami naw a i ah mäih mang paang cu co khai gui ang? Ngami ah cawh läi cu saui naw phi mük hlit khai nei.

⁴ Kei ka taigü ci, “O Khanpughi! Keimi ami na m’lepse gui cu yuk ng’ya law ä! Ami m’lepse gui cu yuk ng’ya law ä! Ami m’lepse thu cu ami mät ah lu khan ah kya ba sä. Ami khawh nü gut gui u sä, pha gui ne a khaw hei ah hteh püi gui u sä.

⁵ Kami cokyang ciah keimi ami na shedam nak gui ah phäh ah akshe ami bi cu kä m’geinsei en gui ä, ami hmakat nak cu kä m’hni en pe gui ä.”

⁶ Cun ah kyasei keimi naw paang cu co ba u ne, chang gui naw k’tha na ne bi u sei, a hlüng ah a teih cu kami pyi pyi ci nei.

⁷ Sanballat, Tobiah la Arabia, Ammon, Ashdod chang gui naw Jerusalem paang bä law pi pi khai ah kami cawh ba la paang ung ak pawk gui kami m’ghu ba gui cu ng’ya u neta anghtei ah m’lungshe ci gui.

⁸ Cun ah kyasei ngami ami van law ne tu vai, Jerusalem cu tu ne, ng’go gaam khai ci vai ah k’bäi ci gui,

⁹ cun ung phi keimi Khanpughi ah taigü u ne, ngami phyawn nak vai ah chang gui amü a hnüüp kami ngäng ci.

¹⁰ Judah chang gui naw ng’äi tumat m’cu ci gui: “Phuih gih kami phuih nak kami tha ken lawk ci nei, Ng’awt sawp akda ghawh vai om ci nei. A i hawcha ah mangpaang cu tuh ngawi kami co khai ang?”

¹¹ Kami ga gui naw keimi naw kä ka mi hmu gui khai, keimi ah khan ah ngami naw ami bi law ge güt, a i ah kya te ci, ci cu kä pyen ah ngai u ne, keimi na ngawn gui ne, kami bi düm sak khai gui ah ngai ci gui nei.

¹² Cun ung phi keimi ga gui ah ng’lung ah akhin akda ung om ciah Jew chang gui naw law ne, kami ga gui naw na hnung tuk püi gui ne bi vai ami pawng püi cu na m’thein gui ci gui nei.

¹³ Cun ah kyasei kei naw chang gui cu khim ni, k’htei ni, li m’la gui law sak gui ne, kä pyi nak pha ah paang gui ah hnu ah ami pahta ciah ka ng’mah sak gui ci nei.

¹⁴ Kei naw chang gui cu ng’ä ai u sei, ka hmu gui ci, cun ah kyasei kei naw ngami, ami ng’vai gui la ami bawi gui ka pyen nak gui cu, “Mi ga gui kä nami kyih en gui vai, bawi cu a i hlawk ah dämduh ne kyih vai kyak ci cicu nami shüm ba vai nei, Nami chang paw gui, nami htanau gui, nami chu gui la nami im gui ah phäh ah nami tuk vai nei.

¹⁵ Na tuk gui khai ah ami pawng ah mawng keimi naw kami hmat ciah kami ga gui naw ng’zah u neta, ngami ah pawng püi cu Khanpughi naw hnim ciah hmat lawk ci gui. Cun kawn ah kami van k’paang kami co ba khai ah kami hteit ba ci.

¹⁶ Cun ung tün ne kei ah ka chang gui amshah naw bi sei, amshah naw m’si saphaw sui ne, k’htei ni, shawi ni, limla ni kawt ne ng’düi ne ngäng ci gui. Kami ng’vaihta gui naw paang co ba ciah chang gui cu

¹⁷ Akbe ah ng’düih püi ci gui. Cawh nak vai phui ci gui naw phi ami kut vang awn bii bi u ne, vangtäng awn likhim kawt ci gui.

¹⁸ Cokyang ci gui nü naw ami kyang ung khim k’bah ci gui. Pyukala tum khai ah chang phi keimi awn atäng ah om ci.

¹⁹ Kei naw chang gui la ami ng’vai gui, ami bawi gui ka pyen nak gui cu, “Kami bi cu ng’phiah ne ng’shawng aih ciah kya ne, bi nak ah paang ah khan ah keimi cu tumat la tumat kami ng’shawng ci.

²⁰ Pyukala nami ng’yak ung kei nami na k’bui vai. Mi Khanpughi naw mikmi ah phäh ah ng’tuk bik khai” cik ci.

²¹ Cun ah kyasei a hnüüp tä sei khaw thaih ungka naw khomü ne, aisi a luh law ung khüt ne na ngäng gui ci.

²² Cun sang ung bik bi angvai gui cu kei naw ka pyen nak ci, ngami la ngami bawm gui cicu mü ah Jerusalem ung ami om vai, cun ung mikmi naw mü ah mang gaw cu ngäng ne, hnüüp ah bii mi bi hning ci.

²³ Mü ah phi kei naw ka suisak kä ka suut ci, kapaw gui naw phi kä suut ci gui, ka changshäm gui naw phi kä suut ci gui, na ngäng ci gui naw phi kä suut ci gui. Kami van naw kami likhim cu kut ung kami kawt ci.