NEHEMIAH 3 - Cho Bible Common Language 2016

Jerusalem Mang gaw K’pang Ami Cawh ba ah Mawng

¹ Shin cu mang gaw pang ami cawh ba ah mawng ah kyak ci. Taigüpa Eliashib la ak taigü gui naw Htome M’kawt cu co ba u ne, shoh cu a hmun ung tha ci gui. Ngami naw paang cu Kumphia Tänghän la Hananela Tänghän güt ah ap ci gui.

² Am cawt cu Jerikho chang gui naw co ci gui. Am cawt cu Imri ah hta Zakkur naw co ci.

³ Hassenaah pahta gui naw Nga m’kawt cu co ci gui. Ngami naw lawng la shohpaang gui cu a hmun ung tha u ne, shoh khai nak vai ah shoh keing shoh gaw gui phi pyang ci.

⁴ Am cawt cu Hakkoz ah tu hta Uriah ah hta Meremoth naw co ci. Am cawt cu Meshezabela ah tu, Berechiah ah hta, Meshullam naw co ci. Am cawt cu Baana ah hta Zadok naw co ci.

⁵ Am cawt cu Tekoa chang gui naw co ci gui, cun ung phi gawnu angvai gui naw, tängpang ci gui ami k’bäi pek gui ah bi vai gui cu mak ci gui.

⁶ Paseah ah hta Joiada la Besodeiah ah hta Meshullam naw Jeshanah m’kawt cu co ci goi. Ngami naw ng’lawng gui la shoh paang cu a hmun ung tha u ne, khai nak vai ah, shoh keing la shoh gaw gui phi pyang ci gui.

⁷ Am cawt cu Kibeon ah ka Melatiah, Meronoth ah ka Jadon la Kibeon chang gui la Mizpah chang gui naw Euphratis akhei täng uktubawi ah im ung khüt ne co ci gui.

⁸ Am cawt cu Hazhaiah ah hta Uzziela, ghuishep ci naw co ci. Am cawt cu tui ng’ui pyang ciah Hananiah naw paang shawng ung khüt khai ah co ci.

⁹ Am cawt cu Hura ah hta Rephaiah, Jerusalem district a teih uk ci naw co ci.

¹⁰ Am cawt cu Harumaph ah hta Jedaiah naw co ci, cun cu amät ah im awn ng’et ci. Am cawt cu Hashabneiah ah hta Hattush naw co ci.

¹¹ Am cawt la m’htut shon nak ah tänghän cu Herim ah hta Malchijah la Pahath Moab ah hta Hasshub naw co ci goi.

¹² Am cawt cu Hallohesh ah hta Shallum, Jerusalem district avang uktu naw co ci nei. (Abi nak ung a hta hnumi gui naw bawm ci gui.)

¹³ Hanun la Zanoah mang gaw ung chang gui naw Khongnawi m’kawt cu co ba ci gui. Ngami naw shohpang gui cu a hmun ung tha u ne, khai nak vai ah shohkeing la shoh gaw gui cu pyang ci gui, paang cu ng’awt ghawh nak m’kawt ung khüt ne 440 metre ng’shäi khai ah co ci gui.

¹⁴ Rehab ah hta Malchijah, Beth Haccherem district uktu naw ng’awt ghawh nak m’kawt cu co ba ci. Ani naw shohpaang gui cu a hmun ung tha ne, khai nak vai ah shohkeing la shohgaw gui phi pyang ci.

¹⁵ Kolahozeh ah hta Shallum, Mizpah district uktu naw tuilawng m’kawt cu co ba ci. Ani naw m’kawt lam cu khuih ne, shopaang cu a hmun ung tha ne, shohkeing la shohgaw gui cu pyang ci. Ani naw a hmun ung shelah tuibüm pei ah mangkhodum tawi ne, David ah mang ung kyum gaw hlaak ung khüt khai ah co ci.

¹⁶ Azbuk ah hta Nehemiah, Bethzur district a teih uk ci naw am cawt cu co ne David ah phuh hmun, tuishawk la gakapim gui ung khüt khai ah co ci.

Gawpaang Cawh nak ung Bilo ciah Levit gui

¹⁷ Shin ah Levit chang gui naw gawpaang ah angpai akda cu co ba ci gui: Bani ah hta Rehum naw am cawt co ci; Hashabiah, Keilah district a teih uk ci naw, a district chang gui ah hnün ung am cawt co ci.

¹⁸ Henadad ah hta Bavvai, Keilah district a teih uk ci naw am cawt co ci;

¹⁹ Jeshua ah hta Ezera, Mizpah uktu naw sehnget im ah ma ung am cawt cu co ne mangpaang kit ah hlah nak ah hmun ung khüt ci.

²⁰ Zabbai ah hta Baruk naw am cawt cu co ne, Taigütung Eliashib ah im ung luhnak ung khüt khai ah co ci;

²¹ Hakkoz ah tu, Uriah ah hta Meremoth naw am cawt cu co ne Eliashib ah im ah akhüt nak ung gawk ci.

Gawpaang Cawh nak ung Bilo ciah Taigü gui

²² Shin ah Taigü gui naw gawpaang ah angpai akda co ba ci gui: Jerusalem khongveing ung taigü gui naw am cawt co ci gui;

²³ Benjamin la Hasshub naw am cawt co ci goi, cun cu ami im hmai ung ah kyak ci; Ananiah ah tu, Masseiah ah hta Azariah naw am cawt co ci, cun cu a im hmai ung ah kyak ci;

²⁴ Henadad ah hta Binui naw am cawt co ci, cun cu Azariah ah im ungka naw paang ah akit ung khüt ci;

^25-26 Uzai ah hta Palal naw am cawt co ci, cun cu paang ah akit ung tün ne, akhan mang im tänghän gaw ngäng nak ah khaan ung khüt ci; Parosh ah hta Pedaiah naw am cawt co ci, cun cu m’hnüt nak ah akyang täng tui m’kawt pei la Taigüim ngäng nak ah tänghän ung khut ci. (Cun cu mang gaw ah avang Ophela ah ami pyen ah pei, Taigüim ung bii bik ci gui ah om nak ah kyak ci.)

A Hei Cokyang Tuk ci gui

²⁷ Tekoa chang gui naw a hnih vei nak ah am cawt co ci gui, Taigüim ngäng nak ah tänghän angkawm nu awn hnungtuk ciah m’hnüt nak ungka naw Ophela paang pei ung khüt ci.

²⁸ Taigü ng’bum gui naw am cawt co ci gui, ng’se gui ah m’kawt ungka naw a siiptäng ah phläi khai ah ami mät ah im hmai täng phäh phäh co ci gui.

²⁹ Immer ah hta Zadok naw am cawt co ci, cun cu amät ah im caw ah kyak ci. Shekaniah a hta Shemaih, m’kawt akyang täng ngäng ci naw am cawt co ci.

³⁰ Shelemiah ah hta Hananiah la Zalaph ah a chuk nak a hta Hanun naw am cawt co ci goi, cun cu a hnih vei nak ah kyak ci. Berekiah ah hta Meshullam naw am cawt co ci, cun cu a mät ah im malam täng ah kyak ci.

³¹ Malchijah, ghuishep ci naw am cawt co ci, cun cu Taigüim ung bii bik ci gui la sumlei ci gui ah ami mang ah im, Miphkad m’kawt ah ng’leng, paang angkit a siip-kyang ah akhan, a khaan ah pei ah kyak ci.

³² A hnu ah am cawt cu ghuishep gui la sumlei ci gui naw co ci gui, akit ung om ciah akhaan ung ka naw, htome m’kawt ung khüt ci.