NEHEMIAH 2 - Cho Bible Common Language 2016

Nehemiah cu Jerusalem ah Hteit ci

¹ Cha phli a lung kawn ah hnüüp ät ung uktubawi Artaserxes naw mü ei a ei yah ung kei naw sapyit tui ka thak ci. Ani naw a yanä kei ka hmai m’kyum ngä sei kä na hmuh man ci.

² Cun ah kyasei ani naw na ng’shik ci, “Nang a i ah kyasei na hmai na m’kyum ang? Nang kä na pyam ci, nang kä na yei ciah kyak ci” cik ci. Kei naw cäicat neta,

³ Ka m’shan cu, “Ka bawimang aw, khaw ng’län ung ghing ä! Kei naw ka hmai kä m’kyum ne a i hawkcha ka on hlawt khai aw? Ka pupa gui ah ng’phuh nak ah mang gaw cu she ne di ci, m’kawt gui phi mei naw ui ne m’di ci nei.

⁴ Uktubawi naw, “Cun ung nang naw a i ang na ng’yak hlü?” Kei naw khankhaw Khanpughi ah ma ah taigü neta,

⁵ uktu bawi ah ma ah ka pyen cu, “Nang ka bawimang naw kei cu na yei na ne, ka ng’yoih thäh cu na ng’yak hlü ah a kyak ung, ka pupa gui naw ami ng’phuh nak ah Judah khaw ah na hteh sak ä, cun ung kei naw mang gaw ka co ba hning khai nei” cik ci.

⁶ Uktubawi ah akchu a pei ah ngok ci naw kei ah k’thäh cu na k’cang nak ci. Ani naw a i güt na ding khai, a i yah ung na law ba khai, cine na ng’ shi sei, kei naw ka m’thein ci.

⁷ Cun kawn ah Euphratis akhei täng uktu gui am, Judah ah kei ka hteh ung ami na m’htei tu vai ah am cäi nak gui ah ca a guk gui vai ah ka thäh ci.

⁸ Mang ah khawbung m’htei ciah Asaph am, Taigüim ngäng nak vai ah m’kawt gui pyan nak vai ah sing gui, mang gaw k’paang gui la kei ah om nak vai im cawh nak vai ah sing gui ana pek tu vai ah m’cäi nak ah ca a guk vai ah ka thäh ci. Uktubawi naw ka k’thäh avan na pek ci, a i ah kyasei ci ung kei cu Khanpughi naw na om püi ci.

⁹ Uktubawi naw gakap bawi gui la ng’se ng’cuum gakap gui cu na tüih law sei, kei cu Euphratis ah akhei täng ah ka hteit ci. A cu ah kei naw uktu bawi ah ca cu uktu gui am ka pe gui ci.

¹⁰ Cun ung phi Beth Horon gawnu ungka Sanballat la Ammon khawpäng bawi Tobiah naw, Israel chang gui ah ni nak vai bik khai ah chang tumat lawk ci, cicu ng’ya ni neta ang htei ah m’lungshe ci goi.

¹¹ Kei cu Jerusalem ah hteit ne hnüüp thum ka om ci.

¹² Kei naw Jerusalem ah phäh ah ka bi vai ah Khanpughi naw ana m’shumphyuk cu, kei naw a u am kä ka m’thein ci. Khomü cawih ah tho law ne ka chang gui api khah püi gui ne akpung ah ka hteit ci. Kei ah ng’cuum nak ka laa tumat bäng kami hteh püi ci.

¹³ Mang gaw ungka kami luh law yah ung khaw hmüp sang ci, akhei täng khaw ng’nawi m’kawt ungka naw, a htum täng k’phyunu tuilawng ungka naw ng’awt m’kawt ung kami hteit ci. Cun ah hteit neta ng’phyek ciah mang gaw k’paang gui, mei ah uih ah m’kawt gui cu kei naw ka teng ci.

¹⁴ Cun ungka naw mang gaw akyang täng tui hta lawng m’kawt la ghangpughang ah tui shawk güt ah ka hteit ci. Kei naw ka ng’cuum nak ah laa naw lung la uk hnget gui bäng ah kyasei lam kä hmu khäta,

¹⁵ Kidron khaw ng’nawi täng ah yu kyum ne, laa ng’cuum ne k’pang cu ka teng ci. Cun kawn ah ka law nak täng ung ng’hlat ba neta, khaw ng’nawi m’kawt ungka taigü naw mang gaw kyong ah ka lut ba ci.

¹⁶ Kei a hawi hteit ne, a i ka bi cu, cun ung om ciah bawi a u naw phi kä hmat ci. Cun cu ka Jew paw chang gui — taigü gui, angvai hta gui, bii bi tuk ci tumat am phi tu ä kä ka m’thein tuk ci.

¹⁷ Cun ung phi tuhbäi kei naw ka pyen nak gui cu, “Teng vä, Jerusalem cu ng’phye ne, m’kawt gui cu di sei, mikmi khüikha ne mi om ci nei! Mikmi naw mang gaw k’paang cu co ba ne, mi thui hmai nak cu mi ng’pyi sak khai nei.”

¹⁸ Cun kawn ah Khanpughi naw a i cha ah ana om püi, ana m’hteihtang la, uktu bawi naw a i ah ana pyen nak cu ka m’thein gui ci. Ngami naw na m’shang u ne, “Tün ne mi co khai nei” ci u ne ngami cu bi lawh ge vai ah om ci gui.

¹⁹ Keimi naw cun ah kami pawng püi cu, Sanballat, Tobiah la Keshen ming nak ciah Arab naw ng’ya u neta, na gaih tu gui ne ami pyen cu, “Nangmi naw a i bi vai ang nami pawng püi? Nangmi naw uktu bawi hnung tuk vai ah nami pawng ne ma?” cik ci gui.

²⁰ Kei naw m’shang gui ne, “Khankhaw Khanpughi naw näng nak na pe gui khai. Keimi cu ani ah na changshäm gui, keimi naw tuhbäi ung tün ne kami cokyang lawk khai. Cun ung Jerusalem ung nang ah chaw tu vai a i khawh phi kä om ci, na ng’pai tu vai ah thungyo phi kä om ci.”