NEHEMIAH 13 - Cho Bible Common Language 2016

Khuihei Chang gui awn Ami Ng’pai nak

¹ Moses ah thukhän cu chang gui ah ma ah m’lau ne ami phat law ung cun ung chang gui gawk ne Ammonit gui la Moabit gui cu a i sang ung phi Khanpughi ah chang gui ung kä ng’dawn tuk khai gui, kä pe gui lawk ci.

² Cun cu a i ah kyasei ci ung Israel chang gui Egypt khaw ah ka ami law ba lam ah Ammon la Moab chang gui naw tui ei kä ami peit tu gui ah phäh ah kyak ci. Ngami naw Balaam am ngui pe ne Israel gui cu taam sak gui ci gui. Cun ung phi kami Khanpughi naw taam nak cu hriham ah lat ci.

³ Israel chang gui naw cun ah thukhän ami phat cu ng’ya u neta, khuihei chang gui ami van ami changbum ung ka k’täm ci gui.

Nehemiah ah Pyan M’tham ba nak

⁴ Taigü Eliashib cu Taigüim khei ung angvai ah kyak ci, ani cu Tobiah awn ashou akni ah ng’khawt ci goi.

⁵ Ani naw akhan akdäm tumat Tobiah am khah tuk ci, cun cu ami douthak law ah pümhta, la tui ng’ui gui, Taigüim ung htungmang gui; taigü gui ah phäh ah douthak ak gui, Levit gui, Taigüim ung ng’äi awm ci gui, Taigüim ngäng ci gui ah phäh ah pümhta ni, sapyit tui ni, oliv-situi ni ah bum gha bum ät gui ami tha nak ah kyak ci.

⁶ Shin gui ah akyak yahung, kei cu Jerusalem ah kä ka om a i ah kyasei ci ung Artaxerxes ah Babilon ghangpughang ah akyak nak akum thumkip lei goi a law nak ung ani am ng’thu ka m’thein khai ah kei cu ka hteit ci. Cun kawn ah ani ah zumtu nak cu gah neta,

⁷ Jerusalem ah ka law ba ci. Taigü kyong ah akhan tumat amang Eliashib naw Tobiah am hei tu cu hmu neta kei cu ka cäicat ci.

⁸ Kei cu m’lungshe aih neta Tobiah ah khaw cham gui avan ka ghawt ci.

⁹ Kei naw cun ah akhan gui cu thungyo man ah ami theingthap sak vai ah k’bäi gui neta, Taigüim khawcham gui, htang-douthak gui, la tui ng’ui gui ami tha ba vai ah ka pyen ci.

¹⁰ Cun kawn ah kei naw ka hmuh cu Taigüim ung ng’äi awm ci gui la a hei Levit gui Jerusalem hteh ta u ne ami lo ah hteit ba ci gui, a i ah kyasei ci ung chang gui naw ami ng’büh nak vai ah kä ami pek ah phäh ah kyak ci.

¹¹ Taigüim nawng vai ah tängpang ciah ami bawi gui cu kei naw ka k’she na gui ci. Cun kawn ah Levit gui la ng’äi awm ci gui cu Taigüim ah law püi ba gui ne, bii ka bi ba sak gui ci.

¹² Cun kawn ah Israel chang gui ami van naw tün ba ne, pümhta, sapyit tui la oliv-situi gui ah bum gha bum ät cu Taigüim khei ah law püi ba ci gui.

¹³ Kei naw shin ah chang gui cu Taigüim khei ngäng ne m’htei khai gui ah ka tha gui ci: Taigü Shelemiah, Thukhän hmat ciah Zadok, la Levit chang Pedaiah, Hanan, Zakkur ah hta, Mattaniah ah tu cu ngami thawi gui ci. Shin ah chang gui naw ami bii k’bi paw gui am ng’düng nak awn petak teipai gui khai gui ciah kei naw ka ngaih gep gui ci.

¹⁴ Shüm ä, Ka Khanpughi, shin gui avan cu na Taigüim la a cun ung khawihnah nak vai ah kei naw ka bi ah kyak ci nei.

¹⁵ Cun sang ung Judah ung chang gui naw kyin hnüüp ung sapyit theih neen u ne, pümhta, sapyit tui, sapyit theih, thei, la ahei gui cu ng’sela ung taih ne Jerusalem ah hteh püi u sei ka k’bäi gui ci.

¹⁶ Tire mang gaw ung ka Jerusalem ah om tuk ciah chang amshah gui naw nga la khawh a hlü hlü cu mang gaw kyong ah law püi ne, kyiin hnüüp ung mi chang gui am yawih na gui ci gui.

¹⁷ Kei naw Jew chang vai gui k’ceet ne ka pyen nak gui cu, “Nami bi ah akshe gui cu teng vä! Nangmi naw kyiin hnüüp cu kä nami theingcim sak ci.

¹⁸ Cun ah kyasei Khanpughi naw akcang ah nami pupa gui am kyuk nak gui ah shin ah mang gaw cu amdi ah kyak ci. Cun ah kya pang sei phi nangmi naw kyiin hnüüp Shemshai sak u ne, Israel gui ah khan ah Khanpughi ah m’lungshe nak däm law pi khai ah nami bik khai ma.”

¹⁹ Cun ah kyasei kei naw thu ka k’bäi gui cu, kyiin hnüüp päng ung angtün nak ah mühun ung tün ne m’kawt gui cu nami khai vai, kyiin nak kä angpyi pha ah chuih kä nami hmawn ba vai. Kyiin hnüüp ung mang gaw kyong ah a i phi kä ami law en püi vai a hmat phyat nak vai ah ka chang gui am m’kawt ka ngäng sak gui ci.

²⁰ Hnü ät, hnih vei, khawh apäng avan yawi ciah sumlei chang gui cu mang gawpaang ah akpung ah ak hnüüp hma mü ip ci gui.

²¹ Kei naw thu ka k’bäi gui ci, “Nangmi naw khaw thaih güt akpung ah nami ngäng ung phi akholä vai nei. A shi cha ah nami bi ba ung, kei naw ak ghuih ah ka ning gawt gui khai.” Cun kawn ah ngami cu kyiin hnüüp kä law ba ci gui.

²² Kei naw Levit gui ka k’bäi gui cu, ami mät naw ami mät theingthap sak u neta, hteit ne kyiin hnüüp theingcim sak hning vai ah m’kawt gui cu ami ngäng vai. Na shüm ä, O Khanpughi, na m’gein ä, a i ah kyasei ci ung na m’hni nak cu dämduh aih ci nei.

²³ A cun ah khin ung Jew chang gui akda naw Ashdod, Ammon, la Moab ung hnumi gui cu chu na u sei ka hmuk ci nei.

²⁴ Ami hmaw gui ateih cu Ashdod ng’thu, kä cung a hei ng’thu ah ng’thu u ne, kami ng’thu ah kä ng’thu thei ci gui.

²⁵ Kei naw chang gui cu khü gui ne, plah tam gui ne, that gui ne, ami lu k’thut gui ne ka ci gui ci. Cun kawn ah ngami la ami hta nau gui cu api ah phi a khaw hei chang gui awn kä ami ng’chungla ba vai ah, Khanpughi ah angming awn ka ng’phyun sak gui ci.

²⁶ Ghangpughang Solomon katnak bi sak cicu akhawhei hnumi ah kyak ci. Ani cu changpakhui gui ah ghangpughang gui päng ah dämduh pi ciah chang tumat ah kyak ci. Ani shin ah katnak ung gawk pang sei phi, ani cu Khanpughi naw m’hni ne, Israel khaw avan ah khan ah ghangpughang ah kyak sak ci.

²⁷ Keimi naw nangmi cu ning theingbang tu u ne, akhawhei chang hnumi chu na ne, kami Khanpughi kä läk ne kami om khai ma?

²⁸ Joiada cu Taigütung Eliashib ah hta ah kyak ci, Joiada ah hta gui ung ka tumat naw Beth Horon gawnu ung ka Sanballat ah hta hnumi chu na sei, Joiada cu kei naw Jerusalem ung ka k’täm ci.

²⁹ Shüm ä, O Khanpughi, cun ah chang gui naw taigü gui ah zung, taigü gui la Levit gui awn nang naw na bi ah thukhän cu m’shuk chak ci gui nei.

³⁰ Kei naw chang gui cu akhawhei chang ah mawng ung ka phung ka theingthap sak gui ci; kei naw taigü gui la Levit gui naw ami läk vai ah thu cu ka pyan pe gui ci, cun ah kyasei ak chang nü naw a bi vai hmat ci.

³¹ M’khih ne douthak nak vai ah sing gui, kä akhin ung ami law püi nak vai ala chang gui naw hmin htük ciah pümhta la am theih üp ma ci gui ami douthak vai ah ami law püi vai ah kei naw ka pyan pe gui ci. O Khanpughi, shin gui avan shüm ne, kei ah khan ah ng’lawn nak na yuk pe ä.