NEHEMIAH 11 - Cho Bible Common Language 2016

Jerusalem ung Om ciah Chang gui

¹ Angvai gui cu Jerusalem ung om tuk ci gui, k’pawih ba ciah chang gui cu im tung gha ung ka tung ät ci, theingcim mang gaw Jerusalem ung om tuk khai ah m’shüih tawk ci gui, apawih ba gui cu a hei mang gaw gui la gawnu gui ung om tuk ci gui.

² Jerusalem ung amät ah hmat ah om tuk ci gui cu chang gui naw m’tam ci gui.

³ Ahei gawnu gui la mang gaw gui ung Israel chang gui, taigü gui, Levit gui, Taigüim ung bii bik ci gui, Solomon ah changshäm ah ang shon gui cu ami mät ah khawh awn, ami mät ah gawnu ung om ci gui. Shin cu Judah khopäng, Jerusalem ung om ciah ng’vai ciah ng’leimah gui tän gui ah kyak ci. Athaiah, Zekhariah ah tu Uzziah ah hta. Ahei ani ah a pupa gui cu Amariah, Shephatiah, la Mahalalela Judah ah hta Perez ah hta ng’shon gui.

Judah pakhui ungka gui:

⁵ Maaseiah Kolhezeh ah tu Baruk ah hta, Ani ah ahei a pupa gui cu Hazaiah, Adaiah, Joiarib, la Zekhariah, Judah ah hta Shelah ah hta ng’shon.

⁶ Perez ah hta ng’shon gui ung ka, chang m’gäi 468 cu Jerusalem ung om ci gui. Sallu, Joed ah tu Meshullam ah hta. Ani ah ahei a pupa gui cu Pedaiah, Kolaiah, Maaseiah, Ithiela, la Jeshaiah.

Benjamin pakhui ungka gui:

⁸ Kabbai la Sallai cu Sallu ah mätyah ng’een goi ah kyak ci. Benjamin chang ami van 928 cu Jerusalem ung om ci gui.

⁹ Zichri ah hta Joel cu ami ng’vai ah kyak ci. Hassenuah ah hta Judah cu mang gaw ung ak hnih nak bawi ah kyak ci. Joiarib ah hta Jedaiah, la Jachin,

Taigü gui:

¹¹ Seraiah, Meshullam ah tu, Hilkiah ah hta. Ani ah pupa gui cu Zadok, Meraioth, la Ahitub, taigütung ah kyak ci.

¹² Shin ah pahta ung chang 822 ami van naw Taigüim ung bii bik ci gui. Adaiah Pelaliah ah tu Jeroham hta. Ani ah pupa gui cu Amzi, Zekhariah, Pashur, la Malchijah.

¹³ Avan ah shin ah pahta ung chang 242 cu kyongkhui ung ami ng’vai gui ah kyak ci gui. Amashsai, Ahzai ah tu Azarela ah hta. Ani ah pupa gui cu Meshillemoth, la Immer.

¹⁴ Cun ah pahta ung ka 128 cu m’gäi ciah gakap ah kyak ci gui: ami ng’vai cu Zabdiela, ng’vaihta ciah kyong khui ung ka tumat ah kyak ci. Shemiah, Azrikam ah tu Hasshub ah hta. Ani ah pupa gui cu Hashabiah la Bunni.

Levit gui:

¹⁶ Shabbethai la Joyabad, mingthang Levit chang gui Taigüim ah akpung täng ah bi nak ung tängpang ci gui.

¹⁷ Mattaniah, Zabdi ah tu Mika ah hta, Asaph ah hta ng’shon. Ani naw Taigüim choir m’cu ne, taigü m’hlüngtai nak ung tängpang ci. Bakbukiah, ani cu Mathaniah thawi ne bii bik ci. Abda, Kalala ah tu Shammua ah tu, Jeduthun ah hta ng’shon.

¹⁸ Ami van 284 Levit gui cu theingcim mang gaw Jerusalem ung om ci gui. Akkub, Talmon, la ami mätyah gui ami van 172.

Taigüim ngäng gui:

²⁰ Pawih ba ciah Israel chang gui la om ba ciah taigü gui la Levit gui cu Judah khaw ahei gawnu gui la mang gaw gui ung ami mät ah im khawh awn om ci gui.

²¹ Taigüim ung bii bik ci gui cu Jerusalem ah vangtäng Ophela ami ci ung om u ne, Ziha la Kishpa ah m’shüm thein nak ah aka ung bik ci gui.

²² M’shümthein gui cicu Jerusalem ung om ciah Levit gui Hashabiah ah tu, Bani ah hta Uzzi ah kyak ci. Ani ah a pupa gui cu Mattaniah la Mikamah ah kyak ci, ani cu Asaph pahta ah kyak ci, acun ah pahta naw Taigüim khawihnah nak ung ng’äi ng’awm tängpang ci gui.

²³ A hnüüp tä sei Taigüim ng’äi awm nak ung tängpang ciah pahta gui naw a i cha akhin lak khai gui cicu ghangpughang ah k’bäi nak om ci.

²⁴ Pethahiah, Meshezabela ah hta, Zerah pahta, Judah pakhui naw Persian mang im Israel chang gui ah mawng pyen ci.

Ahei Gawnu gui la Mang gaw gui ung Chang gui

²⁵ Chang akda cu ami lo pei ah gawnu gui ung om ci gui. Judah pakhui chang gui cu, shin om Kiriah Arba, Dibon, Jekabzeela la acun ah mang gui ah pei gawhta gui ung om ci gui.

²⁶ Ngami cu Jeshua, Moladah, la Bethpelet mang gaw gui ung phi om ci gui,

²⁷ Hazorshuala, la Beersheba a pei yung pigawhta gui ung om ci gui.

²⁸ Ngami cu mang gaw Ziklak, Mekonah ah a pigaw hta gui ung om ci gui.

²⁹ Enrimmon ung, Zorah ung, Jarmuth ung,

³⁰ Zanoah ung, Adullam ung, la shin ah gawnu gui ah pei gawhta gui ung om ci gui. Ngami cu Lachish la lo ah pei zung, Azekah la acun ah gawhta gui ung om ci gui. Cun ah kyasei Judah chang gui cu a htum täng ah Beersheba khopäng ah ng’lak, a siiptäng ah Hinnom khaw nawi ung khüt sei om ci gui, ah pyen vai kyak ci.

³¹ Benjamin pakhui chang gui cu Keba, Michmash, Ai, Bethela a pei yung pigaw gui,

³² Anathoth, Nob, Ananiah,

³³ Hazor, Ramah, Kittaim,

³⁴ Hadid, Zeboim, Neballat,

³⁵ Lod, Ono, la phisak ci gui ah khongnawi ung khüt ci.

³⁶ Levit amshah gui cu Judah khopäng ung om man ci gui Benjamin chang gui awn atäng ah ami om sak gui ah kyak ci.