NEHEMIAH 10 - Cho Bible Common Language 2016

¹ Ak htük bäi ung m’hnüt nak guk cicu uktubawi, Hakaliah ah hta Nehemiah, cun kawn ah Zedekiah naw guk ci. Cun kawn ah shin gui naw phi guk ci gui: Seraiah, Azariah, Jeremiah, Pashhur, Amariah, Malchijah, Hattush, Shebaniah, Malluch, Harim, Meremoth, Obadiah, Daniel, Kinnethon, Baruch, Meshullam, Abijah, Mijamin, Maaziah, Bilkai, and Shemaiah, Azariah ah hta Jeshua, Henadad pahta Binnui, Kadmiel, Shebaniah, Hodiah, Kelita, Pelaiah, Hanan, Mika, Rehob, Hashabiah, Zakkur, Sherebiah, Shebaniah, Hodiah, Bani, la Beninu. Parosh, Pahath, Moab, Elam, Zattu, Bani, Bunni, Azkad, Bebai, Adonijah, Bikvai, Adin, Ater, Hezekiah, Azzur, Hodiah, Hashum, Bezai, Hariph, Anathoth, Nebai, Makpiash, Meshullam, Hezir, Meshezabela, Zadok, Jaddua, Pelatiah, Hanan, Anaiah, Hoshea, Hananiah, Hasshub, Hallohesh, Pilha, Shobek, Rehum, Hashabnah, Maaseiah, Ahiah, Hanan, Anan, Malluch, Harim and Baanah.

Taigü gui: Levit gui: Chang gui ah ng’vaihta gui: Ami Yum ät nak

²⁸ Keimi Israel chang gui, taigü gui, Levit gui, Taigüim ngäng ci gui, Taigüim ung ng’äi lam ci gui, Taigüim ung bik bi gui, la Khanpughi ah thukhän läk ci gui avan cu kami khaw ung om ciah akhawhei chang gui awn ng’pai ne kami mät kami om ci, kami chu gui la hmuhmat khai ah ng’vai pyi ciah kami hta gui avan awn atäng ah, shin ung,

²⁹ kami ng’vai gui awn ng’dawn u ne kami ng’khän ci, cun ah ka ung plah tam nak kami bik ci, cun cu kami m’shet ung ka vai ah Khanpughi naw a changshäm Moses ung a pek ah Khanpughi ah thukhän ah mäih ah kami om khai; Bawipa, kami bawipa ah ang thumkhän avan cu kami läk khai; cun kawn ah ang thukhän avan la a k’thähchah nak gui cu keimi naw kami läk khai.

³⁰ Kami khaw ung om tuk ciah khuihei chang gui awn kä kami ng’chungla khai.

³¹ Khawhei chang gui naw htang phi kä cung a i phi, law püi ne, kyin nak hnüüp kä cung a i hnüüp phi theingcim ciah hnüüp ung keimi naw ngami ah kä kami hleih khai. Kum chih abe päng ung keimi naw khaw lo phi kä kami bik khai, ng’pu hnih avan phi kami nawng pek khai.

³² Keimi tumat ci naw akum tä sei ngui karam ak hma ci kami pek ci, Taigüim ung mang vai ah bawm nak pek ah kyak ci.

³³ Taigüim khawihnah nak ung mang vai ah shin gui cu kami pek khai: m’htut theing, a hnüüp tä htang-douthak nak, a hnüüp tä seime gui m’khih ne khawihnah nak, kyin hnüüp ah phäh ah theing ciah douthak nak, cha theei pawi, ahei pawi gui a hei theingcim ciah douthak nak, Israel gui ah katnak nawt heng nak ah douthak nak, gui la a hei Taigüim ung hlü ci phung ah kyak ci.

³⁴ Bawipa mi Khanpughi am thukhän naw a thäh ah khawihnah douthak cu m’khih nak vai ah sing cu, a u ni pahta naw pe lawk khai ci cu, hmat vai ah keimi, chang gui, taigü gui la Levit gui naw a kum tä sei m’shüih kami tawk khai.

³⁵ Keimi naw kami khäm law htük ah pümhta la up law htük ciah kami sing theih cu akum tä sei Taigüim ah kami hteh püi khai.

³⁶ Keimi achang sing naw kami hta htük cu Taigüim ah taigü ah kami hteh püi khai, thukhän naw akthäh ah mäih ah Khanpughi am kami ap khai. Kami seipat gui ah a hta htük gui, kami htome gui la me gui ah a hta htük gui phi kami ap khai.

³⁷ Akum tä sei khäm law htük ah pümhta awn pyan ah m’htut, douthak vai ah sapyitui, oliv situi la aktheih akhtük cu Taigüim ah taigü gui am kami thak khai. Kami lo-pigaw gui ah bum gha bum ät look ciah Levit gui am, kami khaw ung m’thawk ciah geit ah bumgha bum ät cu kami thak gui khai.

³⁸ Bumgha bum ät loh yah ung Aaron ah hta ng’shon taigü gui cu Levit gui awn atäng ah om khai gui. Levit gui naw bumgha bum ät ami gah avan ah bum gha bum ät ba cu, Taigüim ung mang vai ah, Taigüim gimkaw nak kyong ah law püi khai gui.

³⁹ Israel chang gui la Levit gui naw ami pektak ah pumhta, sapyittui, oliv-situi gui cu, gimnak khan gui ung hteh püi ci gui, cun ung Taigüim ung mang vai gui tha ci gui, cun ung bii bik ciah taigü gui, Taigüim ngäng gui, Taigüim choir m’cu ci gui ah om nak om ci. Keimi naw kami Khanpughi ah im cu kä kami nawng khai nei.