NEHEMIAH 1 - Cho Bible Common Language 2016

¹ Shin cu Hakaliah ah hta Nehemiah ah bilawh ah mawng ah kyak ci.

Jerusalem ah Phäh ah Nehemiah ah Ng’ä ai nak

² Ka phäi gui ungka tumat ah kyak ciah Hanani cu a hei chang bum gui khah püi ne Judah ah kaa gawk law ba sei, Jerusalem ah mawng la Babilonia omktu khaw ah kaa law ba ci gui ah kami Jew chang paw gui ah mawng cu kei naw ka ng’shi gui ci.

³ Ghing ne k’pawih ba ne ng’dükhaw ah law ba ci gui cu ang htei ah khüikhaa u ne, ami pei ng’leng ah om ciah khuihei chang gui naw yawkshe na gui ci gui, cine na m’thein ci gui. Ngami naw ami na m’thein ba cu, Jerusalem mang pang gui cu tuhbäi shekha lä ci nei, m’kawt gui phi mei naw a uih kawn ah a u naw kä a pyan ba nei.

⁴ Cun ng’ya neta kei cu ngo ne ka kyap ci. Kei cu khaw hnüüp akda ung thüisei ne, ei kä ka ei ci, Khanpughi ah ka taigü ci.

⁵ “Bawipa, khankho Khanpughi! Nang cu na dämduh ci, keimi naw kami ning kyih aa ci. Nang ning m’hni ne na thumkhän ah mäih ah bik ci gui ah khan ah thukhän cu bekhüt ne na k’paang ci.

⁶ Bawipa, na teng ä, ka taigü nangaih peä, na changshäm gui Israel chang gui ah phäh ah a mü a hnüüp ka taigü ci nei. Keimi Israel chang gui naw katnak kami bik ci kyasei ka ning paa nak ci nei.

⁷ Keimi naw nang ning hnungtuk püi ne hnüntho u ne, nang ah thumkhän phi kä kami bik ci nei. Na changshäm Moses ung na na pek gui ah thukhän gui phi kä kami k’pang ci nei.

⁸ Moses a pyen nak cu tuhbäi shüm ba vä, ‘Nangmi Israel chang gui kei ung kä nami bekhüt ah a kyak ung changpakhui hei gui ah ng’lung ah ka ning püipyang sak gui khai.

⁹ Cun ung phi nanghmi cu kei ah ng’hlat law ba u ne, nangmi ung ka thumkhän cu nami bi ah a kyak ung, nangmi cu khomdek ah ak cawi ah khüt ne, nami püi pyang ung phi, kei nami na khawihnah nak vai ah kei naw ka ghü ah hmun ung, kei naw ka ning law püi ba gui khai nei.’

¹⁰ “Bawipa, shin gui cu nang ah chang gui nei, namät ah chang gui nei. Nang naw dämduh ciah na huham la k’thagui awn na gun gui nei.

¹¹ Tuhbäi kei ah taigü na ngaih pe ä, nang ning m’tamkhah hlük ciah a hei na chang gui ami van ah taigü phi ngaih peä. Tuhngawi kei ung näng nak na yuk pe lawä, uktu bawi am kei cu na chimgein sak ä.” Cun yah ung kei cu uktu bawi am sapyit tui thak ciah ka kyak ci nei.