NAHUM 3 - Cho Bible Common Language 20161 Ngawn sih nak ah mang gaw cu Ziin ah mü ci nei. Be ciah khawh cu m’guk khai gui, Gut tep khai gui! 2 Ngai ä! htung awn thah a k’aw, Ng’hle ping ah ng’kyeet k’aw gui, Ng’se gui ah yon phäi gui, yatha gui ah dawng ah k’aw gui, 3 Ng’se ng’cum ciah gakap gui kai lawk ci gui, Tui ciah khim, pyü ciah k’htei kawt ci. Gook gui a hlüng ahng’pum ci, Chang si gui kä khei tai vai ah ng’yaih ci. Cun gui ah khan ah chang gui naw kai nak ci gui. 4 Pawmyau ciah Nineveh naw m’kyuk nak gah ci. Ani cu chang hleeip thei ne, Sih nak awn be ci. Chang pakhui gui pluhplang gui ne, Kleihtein ah piang gui ci. 5 Ahlüngtai säih Bawipa naw, “Nineveh, nang cu ka ning m’kyuk khai! Nang cu na k’plui ah ka ning om sak khai, Chang pakhui gui naw ning teng khai gui, Na thu ng’aa nak avan ning teng khai gui. 6 Nang cu gup shoh nak ning pe ne, Thüi nak awn ka ning uk khai. Chang gui naw ning shemshai ne ning päipih Khai gui. 7 Ning hmuk ci gui phung Ng’thüng ne ng’hlat khai gui. Ngami naw Nineveh cu “Di ne ng’yän pyi ci nei” Cik khai gui. Ani m’gein khai a u om khai ang? Ani m’htei khai a u om khai ang? 8 Nineveh, nang cu Egypt mang gaw Thebes ah Na bä pi ne ang? Ani ung phi k’paang ah mäih ah A yii vai tuinu om ci — Nile tuinu cu ang shung Nak ah kyak ci. 9 Ani naw Sudan la Egypt khaw cu uk ci, Ani ah huham ung k’büüp nak kä om ci, Libia phi ani ah kaa ah om ci. 10 Cunung phi Thebes chang gui cu khaw ah Ak pung ah ami hteh püi gui nei. Lam m’hlawng päng ung ami hta gui cu sik khai ah ami thah gui nei. Ami ng’vai gui pha ne khit u sei Pha gui ci cui ah ng’lung ah püi pyang ci gui. 11 Nineveh, nang phi tui kha li ng’lung ung na lut khai. Nang phi na ga gui ah kut ung na phiawn vai ah Na k’tha nak khai. 12 Na im gaw gi cu am theih up ciah thei ghing ah mäih ah kyak khai gui a ghing na k’hnün ung ang theih Na shai ung kya lawk khai! 13 Na gakap gui cu hnumi ah mäih ah kyak khai gui, Na khaw lei phi a u naw kä ngäng sei, na ga gui ah ma ah na m’kawt khaai nak gui cu mei naw m’khih yawp khai. 14 Mei ngäng ne pyan nak vai tuina than vai, Na im gaw na khüikhong sak vai. Uk ah pyan vai m’dek na mhnüm vai, m’hnüm ah uk na gah ge vai. 15 A i na bi ung phi kä ni law k’sai khai, nang cu na sik khai ah mei naw ning ui khai, ng’tuk nak ung ning ngawn khai gui. Nang cu geit khanpeh naw a ei ah mäih ah ning güp khai gui. Nang cu khanpeh ah mäih ah na pungkhei khai. 16 Khankho aisi ah da pi ciah sumlei chang gui cu nak püi gui ci! Cun ung phi cun gui cu hteit pyi ci gui. Ami ng’phya ng’phyaat sei yawng yawp ci gui ah khanpeh gui ah mäih ah püi yawp ci gui. 17 Na bawi gui cu khaw akhiing yah ung k’paang ung ng’khoop ciah khanpeh ng’hlom ah mäih ah kyak ci gui. Cun ung phi khawhni ang ling law ung yong yawp ci gui. A hawi ami hteh a u naw kä hmat ci. 18 Assirian ghangpughang, na bawi gui cu sik ci gui, na mang gui cu kä tho ba ne ip ci gui, na chang gui cu khomhtung ah püi yawp ci gui, ngami ami im ah law püi ba gui khai a u kä om ci. 19 Na khei m’tui nak vai a i kä om ci, na hmaleim phi kä khan hlawt ci. Nang ah di ah mawng ng’yak ciah chang avan naw, ami m’ya k’phyawk ne yeikyai ci gui. Kä ng’pyi hlawt ciah nang ah shetkat nak k’phyawn hning khai a u kä om ne ang? |
Cho Bible Common Language © Bible Society of Myanmar, 2016.
Bible Society of Myanmar