NAHUM 2 - Cho Bible Common Language 2016

Nineveh ah di nak

¹ Nineveh, nang cu ning tu law pyi ci gui nei! Nang ning k’paai khai ah a huham cu gawk law pyi ci Ga k’täm nak vai pyang ä! Lam gui phi ngäng ä! Ng’tuk bi vai ah pawng ä!

² (Israel gui ah bämang nak cu, ga naw kä ah guh tep pha ung Bawipa naw gim khai ah pawng pyi ci nei.)

³ Gakap gui cu shawi a sen kawt u ne, Kä täng ciah sui sen sui ci gui. Ngami cu ng’tuk vai ah pawng ci gui! Ami ng’hlee gui cu mei ah khang u ne, Ami ng’se gui cu hlui caang ci gui.

⁴ Ami ng’hlee gui cu lam pang ung ng’phäi law u ne, Ng’güüt ne htiet hton u ne, mang gaw k’täih ne veing ci gui. M’htai k’däi ah mäih ah ng’shü u ne, Khaw lailäp ah mäih ah ng’phäi ci gui.

⁵ Ami bawi gui cu ng’hawh shaak u ne, Ma lam ah ng’phäi ne ng’vawn ci gui. Ng’tuk bik ci gui naw k’pang phye u ne, Shawi k’hleek ne ana ang tu vük ci gui.

⁶ Tui kam ung m’kawt ng’pät ne ng’hmawng ci, Mang im kyong cu kyih nak awn be ci.

⁷ Mangnu pha ne saw u sei, a chang shäm gui cu Mümkha ah mäih ah ngüük ci gui. Ngami cu thüi ne ami ng’kyang k’beeih ci gui.

⁸ Tui büi nak hlawng ne ng’gäi sei, tui ang güüt ah Mäih ah, Nineveh chang gui lam ng’gut ne dawng ci gui! “Ng’düi vä! ng’düi vä! cine kyap m’lau sei phi, A u kä va ng’hlat ba ci.

⁹ Ngui phi ng’yäi ci! Ghui phi ng’phyang ci! Mang gaw ung khawh be ci!

¹⁰ Nineveh cu di ci, shum ci, shiu ci! M’lung avan kyi ne ng’tum ci, M’khuuk phi ng’hlet ci, Thagui avan maih ci, Hmai phi thui ne ng’aa ci.

¹¹ Tuhbäi ung mang gaw a hawi ang? Ani cu phongkawng ah chaam ah mäih ah kyak ci, Phongkawng anong gui ami vuh nak ah mäih ah kyak ci. Phongkawng akhik gui la a hla gui ah ami lum nak, Ngami ah hta yüüt cu phyawng khai.

¹² Phongkawng naw a hta lo ne, Anu la ahta yüt ah phäh ah htui ne phyit ci, Ani naw a chaam cu kawng meh awn be sak ci.

¹³ M’gäi ciah Bawipa naw, “Kei cu na na ga nei! Ng’hlee gui cu mei awn ka m’khih khai, na gakap gui ng’tuk nak ung ngawn gui yawp khai gui, chang ah kaa nami lak gui avan la ne ka ghawt yawp khai. Nangmi ung ng’shä gui ah k’thäh cu a u naw kä ng’ya ba khai nei.”