NAHUM 1 - Cho Bible Common Language 2016

¹ Shin cu Nineveh ah mawng ng’thu m’khäh, Elkosh ah ka Nahum naw a hmuh ah muimang m’cut gui ah kyak ci.

Nineveh Hnungtuk ne Bawipa ah M’lungshe nak

² Bawipa Khanpughi naw ani ng’längna püi cicu kä M’düm ci. Ani naw ani hnungtuk püi ci cu m’kyuk ci. A m’lungshe nak awn thung ba gui ci.

³ Bawipa cu kä m’lungshe yäi ci. Cun ung phi ani cu huham mah ci, Akshe cu kä m’kyuk ah kä nawng ci. Bawipa ah hteh nak ah puikhaw khi ci; Akhaw a chaan ung khaw ng’mei m’vut ah thawk ci.

⁴ Ani naw tuinu taam sei kawi ci! ani naw tuilawng gui kawi sak ci Bashan khawbung chawng ci. Karmela khomhtung ng’haam ci. Lebanon ah cheipai gui ng’yai ci gui.

⁵ Bawipa ah ma ah khomhtung gui thüng u ne, Khawgui gui ama ah ngüm ci gui. Bawipa angdang ung khomdek thüng ne, Khomdek khan avan la ak chang avan ng’hlet ci gui.

⁶ Ani am lungshe ung a u ghing ba hning khai aw? Kyih shek ciah am lungshe nak ung a u om hning khai aw? Ani naw mei ah tawt ciah am lungshe nak am hluh Law ung kheng lung cu thüng ne ama ah m’vut ah kyak khai gui nei.

⁷ Bawipa cu nik ci; Khüikha nak a gawk law ung A chang gui cu shungshet gui ci, Ani täng ah ng’hlat lawk ci gui cu, ani naw m’htei gui ci.

⁸ Tuinu ng’güüt ne khaw akhi ah mäih ah aga gui cu m’di gui yawp ci. Ani hnungtuk püi ci gui ah khan ah ami sih nak vai yuk chah lawk ci.

⁹ Bawipa na ng’huut taap nak cu a i ang? Ani naw ning m’di gui khai nei. A u naw ani cu län ät kawn ah Kä k’taap hlawt khai nei.

¹⁰ Ng’hling chawng la htang gong chawng ah mäih ah nangmi yu nami awktat ci gui cu mei naw ning ui gui khai nei.

¹¹ Nineveh, shetkat nak awn be ne Bawipa huut taap ci cu, nang ungka lut lawk ci nei.

¹² Bawipa naw a chang gui, Israel gui cu, Shik cha ah ng’thu püi gui ci nei; “Assirian chang gui Cu k’thamah u ne, ami da pang ung phi, Ngami cu di ne maih khai gui nei. Ka chang gui aw ka ning yaica sak gui ci nei, Cun ung phi cän ah mäih ah kä ka bi ba khai nei.

¹³ Nangmi ah khan ah Assirian gui ah huham mah Nak cu, tuhbäi ka ng’pyi sak khai, Ning khit gui ciah gui phi ka pit sak khai.”

¹⁴ Shin cu Assirian gui ah khan ah Bawipa naw Am khoicha nak ah kyak ci: “Ngami ung ami ming thung khai ah htangshon kä om ba khai. Ami Taigüim ung ami khanpughi ah a gup gui cu ka m’di yawp khai. Kei naw Assirian gui ah ng’ciim hmun ka piang ci — ngami ami ghin ba vai kä khin ci!”

¹⁵ Teng vä, ng’shä chang cu khomhtung khanah ng’thuni awn law pyi ci nei! Judah chang gui mang yu sa ne, khanpughi am bä ciah nami shaitaak cu pe vä! Changshe gui naw nami khaw kä plawh ba khai gui. Ngami ami van cu di maih pyi ci gui nei!