MIKHAH 7 - Cho Bible Common Language 2016

Israel gui ah om ih cheishoh nak

¹ Ngaih u vai kä om ci. Kei cu sing ung am theih kä hmu ne, sapyit ung am theih kä hmu ne, ei ah cawi ciah mäih ah ka kyak ci. Am theih avan, sing theih avan bih yawp ah kyak ci.

² Khaw ung changnigui maih yawp ci gui, Khanpughi ung ng’düng ci a u kä om ci. Khaw päng ung chang ngawn vai däät ci gui, chang päng naw ami chang paw ga nak ci gui.

³ Akshe bi vai ah chang van theileh ci. Bawi gui la suki gui naw m’cümhnah nak thäh ci gui. Ang vaipi naw ang yak hlü pi thäh ci, ngami naw atäng ah bum ci gui.

⁴ Akni pi la akbä pi gui cu ng’hling ah mäih ah akholä ah kyak ci gui. Khanpughi naw ngäng ci gui ah prophet gui am thu a pyen nak ah mäih ah chang gui am kyuk nak gui vah ah hnüüp gawk lawk ci nei. Ngami cu ng’thääk yawp ci gui nei.

⁵ Na teihpüi na paw chang phi kä na yum vai. Na chu phi geing na ne na ng’thu püi vai.

⁶ Tuhchü hta gui naw ami pa akgu ah mäih ah kyak nak khai gui, hta hnumi gui naw ami nu hnungtuk püi khai gui, hta ah chu gui naw ami pighi ng’vook püi khai gui. Chang ah aga cu amät ah kyong chang ah kyak ci.

⁷ Cun ung phi kei naw Bawipa cu ka k’äih khai. M’lung theing awn Khanpughi cu ka ging khai, ani naw na hun khai, Khanpughi naw na ngaih pek khai.

Bawipa naw Hun nak law püi ci

⁸ Mi ga naw mi khan ah ami yei nak vai a i kä om ci, mikmi mi täng ci, cun ung phi mi tho ba khai, mikmi hmüp khui ah mi om ci, cun ung phi Bawipa naw akdei na pe gui khai.

⁹ Bawipa hnu na ne mi cheishoh ci, cun ah kyasei am lungshe nak ung a shäng mi yai khai. Cun ung ak hnu ah ani naw na shungvong gui ne, hma cicu hman sak khai, cun cu mikmi ah khan ah ami bi ah kyak ci. Ani naw akdei ung na hteh püi gui sei, mikmi ghing ne ana hun nak gui cu mi hmuk khai.

¹⁰ Mi ga gui naw hmu neta kä yei khai gui. “Nami Bawipa Khanpughi cu a hawi ang?” cine na ng’shi gui ciah mi ga gui naw, a cun gui cu hmu u neta, lü ng’aa khai gui. Ngami cu lam ung ng’nai ah mäih ah kai na gui ne dep gui u sei mi hmu gui khai nei.

¹¹ Jerusalem chang gui, mang gaw paang cawh ba nak vai ah a khin cu gawk lawk ci nei. Cun ah khin ung na khaw ng’shawng law pi khai nei.

¹² Khaw nü ah ka na chang gui cu nang ah law ba khai gui, hnilaw lam Assiria, htum lam Egypt, Euphratis khaw ng’lei ungka tuinu ah m’chaa, khomhtung ah shung ah ka gui law ba khai gui.

¹³ Cun ung phi khomdek khan cu om ciah chang gui ah shetkat ah hmawk ah khaw ng’gau khaw ah kyak khai.

Israel gui ah khan ah Bawipa ah chihna nak

¹⁴ Bawipa, na ghü ah na chang gui cu, htoshäm ah mäih ah m’htei ba gui ä. Ngami cu bung puk ah om pang u sei phi, khaw ng’lei ni naw koi gui ci nei. Acau ka ah mäih ah ei ada nak ah Bashan la Kilead khaw ung hteh püi gui ne tu m’bei gui ä.

¹⁵ Egypt khaw ah ka na na law püi ba gui yah ungka ah mäih ah keimi ah hmawk ah cäicat vai bi law ba ä, Bawipa!

¹⁶ Chang pakhui gui naw a cun gui cu hmu u neta, ami gai nak vaisü ung, ami tha ng’haam sei, ami m’gawng k’bawm u ne, ami hnga phi paang khai nei.

¹⁷ Ngami cu k’phyu ah mäih ah m’vut ung ng’yawi u ne, ami yai nak ungka lawk khai gui, ng’thüng ne kyik khai gui, ngami cu kyikyawk u ne Bawipa ami Khanpughi ah ng’hlat khai gui nei.

¹⁸ O, Bawipa, nang ah kawn ah ahei Khanpughi kä om ci. Om ba ciah na chang gui ah ami katnak cu na m’gein ci, nang cu angtäi sei na m’lung kä shek ci, na na m’hni nak gui dang khai ah na yeikyai nak om ci.

¹⁹ Nang naw na na chimgein ba gui khai. Kami katnak cu na khaw awn leh ne, kami cheishoh nak cu tuinu ah ng’lung ung na shum yawp khai.

²⁰ Cau kami pupa gui ung na shaitak ah na bekhüt nak la na m’hni nak cu Abraham la Jakob ah hta ng’shon, na chang gui am na m’dang khai nei.