MIKHAH 6 - Cho Bible Common Language 2016

Israel gui Hnungtuk püi ciah Khanpughi ah Thushai

¹ Israel hnungtuk püi ciah Bawipa ah thushai cu ngai vä! Tho law, O Bawipa, na thushai cu m’dang ä. Khomhtung gui, khogui gui am a i na pyen cu ng’yak sak gui ä.

² Nangmi khomhtung gui, nangmi m’dek ah khongtäi ciah a phung gui, Bawipa ah thushai cu ngai vä! Bawipa naw a chang gui hnungtuk püi ne thushai ci nei. Ani naw Israel gui hnungtuk ne m’kyuk nak gui vai law püi ci nei.

³ Bawipa naw, “Ka chang gui aw, a i ang ka ning bi pek gui man, a i ah ka ning khüikha sak gui man? Na m’shang vä.

⁴ Egypt khaw ungka ka ning law püi ba gui ci, khleihtein ungka ka ning gung gui ci, ning chuisaw gui khai ah Moses, Aaron la Miriam ka ning tüih law gui ci.”

⁵ Ka chang gui aw, shüm ba vä. Moab ghangpughang Balak naw nangmi ah khan ah a i bi vai ah a pawng, Beor ah hta Ballam naw a i ah am shan, Akacia ah phung la Kilkal ah ng’lak ung, a i ah kyak ci, cicu shüm ba vä. Cun gui nami shüm ba ung kei naw a i cha ah ka ning hun gui cu nami hmat khai nei” cik ci.

Bawipa ah ng’yak hlü a i ang?

⁶ Khankho Khanpughi khawihnah vai ah lam ung a i nimä ka law püi kaw? Akbä pi seipat hta cu mei ung m’khih ne ap vai ah ka law püi vai aw?

⁷ Htome phya khak la kä ng’pyi hlawt ciah olive situi ka law püi ung Bawipa cu yei khai aw? Ka cheishoh ka thung nak vai ah ka hta htük cu ka pek khai ma?

⁸ “Kä cun ung Bawipa naw mikmi am a i nik ciah na m’thein gui ci nei. Ani naw mikmi ung angyak hlü cu shin ah kyak ci: düng ci bi vai, m’hni nak m’dang vai, la m’lung neim nak awn mi Khanpughi ung ghin vai, gui ah kyak ci.

⁹ Cüivai ci naw Bawipa cu kyih aa ci. Ani naw mang gaw khü ne, ngai vä, nami mang gaw ung ng’bum ci gui nei!

¹⁰ Changshe gui ah im kyong ah ami khawh cu kä akni ah ami gah ah kyak ci. Ngami naw kä hman ciah nütnak cu mang ci gui, cun cu kei naw ka m’thüi nak ci.

¹¹ Kä be khai ah nän ci la kä be khai ah khin ci cu, a i cha ah kei naw ka m’gein khai aw?

¹² Bühmang ciah nami chang gui, chang pyaam lei ei ci gui, chang avan cu nami hleeihlak ci.

¹³ Nami cheishoh ah hmawk ah nami shet nak vai la nami di nak vai cu kei naw ka tün pyi ci.

¹⁴ Nami ei ung phi kä nami phü khai, akcang ah nami cawi lä khai. Nami khawh nami m’kawn khai, cun ung phi kä nami phiawn püi khai. Nami phiawn püi ung phi ng’tuk nak ung kei naw ka m’di khai.

¹⁵ Htang nami phu khai, cun ung phi kä nami khäm ba khai. Olive situi nami neen khai, kä nami mang khai. Sapyit tui nami piang khai, kä nami awk khai.

¹⁶ Shin gui ah a kyak law cu ghangpughang Omri la ahta Ahab ah omshe nami läk ah phäh ah kyak ci. Ngami ah bi cu nami läk lä ung di nak ung ka ning hteh püi gui khai. Chang van naw ning päipih khai, khaw nü ah chang naw nin m’kyuk khai gui” cik ci.