MIKHAH 5 - Cho Bible Common Language 2016

¹ Jerusalem chang gui, Nami gakap gui bum vä! Na khaai gui ci gui nei! Ngami naw Israel ng’vai gui cu ng’tuk püi pyi ci gui nei.

Bethlehem ah ka Uktu ah mawng Khanpughi ah shaitak

² Bawipa naw, “Bethlehem Ephrathah, nang cu Judah khaw ung ak yawpi tumat ah na kyak ci, Cun ung phi nang ungka kei naw Israel Uktu cu ka law püi khai, ani ah kyong cu cau ge tün ne dang ge ciah kyak ci” cik ci.

³ A nau poi m’neh ciah hnumi kä a hta pha ah chuih, Bawipa naw a chang gui cu ga ah kut ung nawng gui khai. Cun kawn ah omktu ah kyak ci gui ah khochang gui cu ami mät ah pakhui ah ng’bum ba khai gui.

⁴ Ani a law ung a chang gui cu Bawipa ungka lawk ciah thagui la amät Bawipa Khanpughi ah m’gäi nak awn uk khai. A chang gui cu phiawng ne om khai gui, m’dek khanchang van naw an ah dämduh nak cu m’taam khai gui.

⁵ Ani naw dimdeeih nak law püi khai. Assirian gui naw khaw ami tuk law ung, mi ng’vong chaam ami m’shet law ung, keimi naw gai pi ciah kami ng’vai gui tüi ne kami tuk sak khai.

K’phyawn nak la m’kyuk nak

⁶ Ami thagui thamah nak awn Assiria Nimrod khaw cu näng khai gui. Assirian gui naw kami khawpäng ami tuk law ung ngami naw na hun gui khai gui.

⁷ Pawih ba ciah Israel chang gui cu khui päng ah phäh ah Bawipa ah tüih law ah thai ba ciah khüi ah mäih ah a ghing gui ah khan ah kia lawk ciah khaw goh ah mäih ah kyak khai gui.

⁸ Pakhui gui ah ng’lung ah ami nawng shüt gui cu, bung hmu ah a ei vai shui ciah phongkawng ah mäih ah kyak khai gui. Ani naw htome gui ah lung ah lut ne, pah gui ne, phyit ne teek gui ci — phyawn vai ah ngaih u nak kä om ci.

⁹ Israel gui naw ami ga näng ne m’di khai gui.

¹⁰ Bawipa naw, “Cun yah ung na ng’se gui cu k’täm ne, na ng’hle gui cu ka m’di khai.

¹¹ Na khaw ungka na mang gaw gui ka m’di khai, na ng’vong khaam avan ka m’shet khai.

¹² Kei naw nami cecai nak gui ka m’di khai, pui tu kaih ci a u kä om ba khai.

¹³ Agup gui la lungsüm theing gui avan ka m’di khai, nami mät ah pyan nami khawihnah vai a i kä om ba khai.

¹⁴ Nami khaw ung om ciah khanpughi hnumi Asherah ah gup cu ka yuk chah khai. Nami mang gaw gui phi ka m’di yawp khai.

¹⁵ Dämduh ciah ka m’lungshe nak awn, kä na ngai ciah pakhui avan ah khan ah phu ka tuk khai.”