MIKHAH 3 - Cho Bible Common Language 2016

Israel ng’vaihta gui Mikhah naw Shäu gui ci

¹ Ngai vä, nangmi Israel Uktu gui! Nangmi cu taga ciah bi nak nami hmat ciah kya lang ne,

² akni cu thüi na ne, akshe cu nami m’hni ci nei. Ka chang gui ah ak ghing ah vun nami lim ci, ami guh ung kawp ciah sa phi nami sei ci nei.

³ Ka chang gui cu nami ei gui ci. Ami vun nami lim ci, ami guh nami chawm ci, shon vai ah meh ah mäih ah nami m’sa gui ci.

⁴ Bawipa ah nami ng’paa nak vai ah a khin gawk lawk ci, cun ung phi ani naw kä ning m’shang gui khai. Akshe nami bik ci kyasei nami taigü cu kä ngai khai.

⁵ Ka chang gui cu prophet gui naw m’hleei gui ci gui, petak gui ci am dimdeeih nak shaitak pek ci gui. Kä petak gui ci am ng’tuk nak awn m’kyih ci gui. Bawipa naw, cun ah prophet gui am,

⁶ “Prophet gui aw, nami hnüüp ng’pyi ci nei, nami khan ah khohni so ci nei. A i ah kyasei ci ung, ka chang gui lam nami hma sak gui ci, nangmi ung muimang kä om ba khai, kä nami ng’cäbang ba hlawt khai.”

⁷ Ma lam ah mawng ng’cä ba cicu a pyen kä bä sei thüi khai. Khanpughi naw kä m’shang sei ami van yung kyak khai gui.

⁸ Cun ung phi kei cu Bawipa naw a mümcha la ahuham awn nakbe ne, taga nak ah mawng la Israel gui ah katnak m’thein nak gui vai ah thagui na pek ci.

⁹ Israel uktu gui, na ngai vä! nangmi cu taga ci thüi ne u ne, ahman cu ahma ah nami lat ci.

¹⁰ Nangmi naw Khanpughi ah mang gaw, Jerusalem cu ngawn sih nak la kä taga ciah khan ung nami co ci.

¹¹ Mang gaw uktu gui naw, khawh la ne uk ci gui, taigü gui naw pek vai ah thukhän m’than ci gui, prophet gui naw ngui ami gah vai ah phäh ah cängbang ci gui — cun ung phi ami van Bawipa naw om püi gui ciah pyen ci gui. Ngami naw, “Akshe keimi ung kä gawk lawk khai, Bawipa keimi awn om ci” cik ci gui.

¹² Cun ah nangmi ah om ah, Zion cu lai ah mäih ah thawn khai gui, Jerusalem ci di nak ah m’dek ng’plum ah kyak khai. Taigüim m’htung cu bung ah ng’lat khai.