MIKHAH 2 - Cho Bible Common Language 2016

Dukhaih ci shedam nak ciah katnak

¹ Ang yän nak ung akshe ah ngaih-tüh neta, khaw a thaih law ung a cun akcang ah bik ciah chang gui cu katnak om ci. Cun cu a i hlawk ah ng’yiin khai aw?

² Lai ami m’hni ung lai lak ci gui, im ami m’hni ung im lak ci gui, a u ah kyong khui khawh cham phi kä ng’geing ci.

³ Cun ah kyasei Bawipa naw, “Nangmi ah di nak vai ka pawng püi pyi ci, a u phi kä phyawng khai. Nangmi cu nami mät yaica nak ung nami lut ci. Lä-e ne kä nami hteit hton ba hlawt khai.

⁴ Cun ah khin a gawk law ung chang gui naw nangmi ah mawng cu di nak ah mang khai gui. Ngami naw nang ah bui awt ah mawng shin ah ng’äi m’cu khai gui; Keimi cu kami di yawp ci nei! Kami khaw phi Bawipa naw la ne tuh ne na näng gui ci gui am pe gui ci nei.”

⁵ Cun ah khaw cu Bawipa ah chang gui am a pek ba gui hnüüp ung nangmi ah ng’pai tu vai a i kä om khai nei.

⁶ Chang gui naw kei ah ma ah ng’thu ami pyen cu, “Keimi ah khan ah thu kä pyen ä, cun ah amawng gui kä pyen en ä. Khanpughi naw keimi cu kä na m’thüi gui khai nei.

⁷ Israel chang gui cu taam gui khai ah nami ngai ne ma? Bawipa ah hnimgei nak maih hning khai ma? Cun ah mäih ah ani naw akcang ah bik khai ma? Düng ciah chang gui cu m’gein ne kä ng’thu khai ma?” ciah kyak ci.

⁸ Bawipa ah m’shan nak cu, “Kei ah chang gui cu ga ah mäih ah nami tu gui ci. Chang gui cu ng’tuk nak ungka law ba u ne, im ah ngaih gep ne om vai ah ngai ci gui. Cun ung phi nangmi naw ami sui nami m’guk khai ah nami ngäng ci.

⁹ Nangmi naw ka chang hnumi gui ami m’hni ah ami im ungka nami k’täm gui ci. Ami hta gui ungka hriham phi angtäi sei nami gut gui ci.

¹⁰ Tho ne hteit vä, shin ung phyawn nak vai kä om ba ci nei. Shin ah hmun cu nak katnak naw ng’yiin sak ne di sak ci nei.

¹¹ “Cun ah chang gui naw akbe ah hleei ne thuvi ciah prophet cu ng’ya hlü u neta, ami pyen cu, ‘Kei naw ka ng’cä cu yu la awktat vai gui cu nangmi ah phäh ah long khai nei.’

¹² “Cun ung phi pawih ba ciah Israel chang avan cu ka ning bum sak gui khai. Kei naw nangmi cu ami ng’bu ah law ba ciah htome gui ah mäih ah ka ning bum ba sak gui khai. Nami khaw ci chang akda awn be ba khai.”

¹³ Bawipa naw lam pyan pe gui ne, omktu khaw ah ka lam shüm ba gui khai. Ngami naw mang m’kawt cu gäi ne hmawng ne, lut lawk khai gui. Ami ghangpughang Bawipa amät naw lam shüm gui khai.