MIKHAH 1 - Cho Bible Common Language 2016

¹ Judah khaw ung Jotham, Ahaz la Hezekiah ni cu ghangpughang ah ami kyak yah ung, Moresheth gawnu ungka Mikhah am Bawipa naw ng’thu pek ci. Samaria La Jerusalem ah amawng gui avan cu Khanpughi naw Mikhah ung thu am than ah kyak ci.

Samaria la Jerusalem ah mawng ng’äikyah

² Chang pakhui avan naw shin cu ng’ya vä; m’dek khan ung om ciah chang avan naw shin cu ngai vä! Uktu Bawipa naw ning hnu na gui ne saksi khai nei. Ngai vä! A khankho im ung ka naw thu pyen ci nei.

³ Bawipa cu a hmun theing ungka naw lawk ci nei; Ani cu law ne khomhtung lai gui ung hteit hton khai nei.

⁴ Mei ung khoi chap ah mäih ah khomhtung gui aka ah piawn khai gui; Khomhtung ung lut lawk ciah tui ah mäih ah ngami cu khaw ng’nawi ung pyäu ne long khai gui.

⁵ Israel chang gui cheishoh u ne, Khanpughi ami hnungtuk püi ah phäh ah shin gui cu akcang ah kia lawk khai nei. Israel ah hnungtuk nak ung m’kyuk vai cu a u ang? Samaria mang gaw amät nei. Judah khaw ung chei cicu a u ang? Jerusalem amät nei.

⁶ Cun ah kyasei Bawipa naw, “Samaria cu ng’leido ung m’dek ng’plum ah mäih ah shek khai, Sapyit geit nak ah khomdek ah mäih ah ka kyak sak khai. Mang gaw im ng’ki gui cu khaw nawi ah ng’dawn sak gui ne, mang gaw lungtung cu ka auh sak khai nei.

⁷ Amiktung nak ah agup avan khuui khai ah sheiuh yawp vai, m’gu plet ne ami pum im ah ami pektak phung mei awn m’khih vai. Agup gui avan cu a u naw kä a hmuh hlü vai ah kyak khai. Samaria naw shin gui cu am guk plet awn a gah ah kyak ci, tuhbäi a ga gui naw hteh püi ne a khawhei ah m’guk plet pum im ung m’hluh ci gui.”

⁸ Cun kawn ah Mikhah naw, “A cun ah hmawk ah kei cu kyap ne ka m’lau khai, ka thüi ka m’dang nak ah ka khaw m’dawng awn ka ng’vaak khai. Kei cu sa ui ah mäih ah m’ou ne kha ah mäih ah ka ng’ging khai.

⁹ Samaria cu a leim kä khan hlawt ci, Judah phi a cun ah mäih ah geinvai ci. Di nak naw ka chang gui ah om nak Jerusalem m’kawt cu pha lawk ci nei.”

Ga naw Jerusalem pha lawk ci

¹⁰ Mi di ah mawng cu Kath pigaw ung mi ga gui am kä nami m’thein gui vai. Ami ning hmuh gui ah kä nami kyah en vai. Beth Leaphrah chang gui m’vut ung ng’tah ne, nami thüi cu m’dang vä.

¹¹ Shaphi chang gui nami k’plui ah lü ng’a ne dawng vä, Zaanan chang gui kä luh law ah kyap ne pigaw kyong ah nami om vai, Betheyela chang gui ah kyah nami ng’yak ung yii vai kä om ciah nami hmat vai.

¹² Maroth chang gui phi phiawng hlü ne ngäng ci gui. Cun ung phi Bawipa naw di nak cu law püi sei, Jerusalem ung gawk law pyi ci nei.

¹³ Lachish chang gui ng’se cu ng’hle ung khit vä. Nang naw Israel ah cheishoh nak cu thei tu ne Jerusalem cu na cheishoh sak ci nei.

¹⁴ Tuhbäi ung Judah chang gui naw, Moresheth Kath gawnu cu gidam ci gui. Israel ghangpughang gui naw Akyip pigaw ungka a i kä gah ba khai gui nei.

¹⁵ Mareshah chang gui, Bawipa naw nami gaw tuk ciah ga am ning ap gui khai nei. Israel chang vai gui cu Adullam lung khui ung htiet ne ng’thup khai gui.

¹⁶ Judah chang gui, nami m’hni ah nami hta gui ah hmawk ah nami thüi nak ah nami lu k’plut vä. Nami hta gui cu omktu khaw ah hteh püi gui khai gui kyasei langta ah mäih ah nami lu plut vä.