MATTHE 7 - Cho Bible Common Language 2016

Pawchang M’khoi m’Chaa ah Mawng

¹ ‘Pawchang kä nami m’khoi m’chaa vai, cun ung Khanpughi naw kä ning m’khoi m’chaa gui khai.

² Chang nami m’khoi chaa ah mäih ah Khanpughi naw ning m’khoi chaa gui khai. Chang nami m’khoi chaa nak ung nami bi ah mäih ah Khanpughi naw nami khan ah bi bik khai.

³ A i ah kyasei nami mät ah mik ung kaa, mik eek cu kä hmuh ah, nami phäi nau ah mik ung ng’voihta cu nami hmuh peit ang?

⁴ Na mät ah mik ungka mik eek cu nawng-en ne, a i ah kyasei na phäi nau ah mik ung kaa, ng’voihta cu, ning ghu pe vang na ci ang?

⁵ Nang thuvichang, na mät ah mik ungka mik eek cu, na ghu ma vai; cun ung vah na phäi nau ah mik ungka ng’voihta cu ang htei ah hmuh ne na ghu pe hlawt khai.

⁶ ‘Ak theingcim cu ui gui-am kä nami peit vai, cuh ah nami peit ung ng’hlat law ba ne ning htui gui khai. Ghui k’cünglung cu vawk gui ah ma ah kä nami m’shän vai, nami m’shän ung ami kho awn leh ne kai na khai gui.

Ng’yoi vä, Shui vä, K’shoh cu Khäk Vä

⁷ ‘Ng’yoi vä nami gah khai, shui vä nami hmuk khai, kshoh cu khäk vä ning hmawn pe gui khai.

⁸ Ng’yoi ci naw gah ci, shui ci naw hmuk ci, kshoh khäk ci phi hmawn pek ci.

⁹ Nangmi ung ka, a hta naw m’htut ang yoih ung lung pek khai ah chang;

¹⁰ nga ang yoih ung kphyu pek khai ah chang, om ne ang?

¹¹ Nangmi chang kaa gui hngaw naw nami hta gui-am ak ni peit vai nami hmat ung, khankho ah om ciah nami Pa naw, ama ah ng’yoi lawk ciah chang gui-am ak ni pi gui cu pek khai ah kä kya ne ang?

¹² Nami mät ung chang naw abi vai nami ng’yak hlü ah mäih ah chang ung phi nami bi vai. Cun cu Mosesah thukhän la profet gui ah m’theithang nak ah kyak ci.

Ng’hteik ciah M’kawt

¹³ ‘Ng’hteik ciah m’kawt ung lut tu vä, m’hteikho ah hteh nak ah lam la m’kawt cu ng’shawng ciah kyasei, cun ah lam ung hteit ci gui cu da ci gui.

¹⁴ Ang täi ghin nak ah lam la m’kawt cu ng’hteik ciah kyasei, cun ah lam hmuk ci gui cu ken ci gui.

Aghing La Am Theih

¹⁵ ‘Htome ah vun awn ng’hlawp ciah hngei ah mäih ah hleeihlak ne lawk ciah profet gui cu nami geing nak vai.

¹⁶ Ngahmi cu hleeihlak ciah profet ah ami kyak ah mawng cu, ami bilawh awn nami hmat khai. Ng’hling shun ung sapyit kä m’theih man ci, ng’hling ghing ung k’thei phi kä m’theih man ci.

¹⁷ A ghing nik cicu akni ah m’theih ci, a ghing shek cicu akshe ah m’theih ci.

¹⁸ A ghing nik cicu akshe ah käm theih ci, a ghing shek ci cu akni ah käm theih ci.

¹⁹ Chang gui naw akni ah käm theih ciah a ghing gui phung cu, chupit ne mei ung k’bum man ci gui.

²⁰ Cun ah kyasei hleeihlak ciah profet gui cu, ami mät ah bilawh awn nami hmat gui khai.

Nangmi Kä Ka Ning Hmat Gui Man Ci

²¹ ‘Bawipa, Bawipa,’ cine na khü ciah chang van düt, khankho ah kä lut hlawt khai, khankho ah om ciah ka Pa ah ang yak hlü ah om ciah chang bäng vah gawk hlawt khai.

²² M’khoichaa nak ah hnüüp a gawk law ung chang akda naw, ‘Bawipa, Bawipa, nang ah ming awn Khanpughi ah ng’thu cu ka pyein ci nei, nang ah ming awn khoshe khogam phi kami ktäm ci nei, nang ah ming awn cäi aih gui vai phi kami m’dang ci nei, cine kyak khai gui.

²³ Cun ung phi cun ah chang gui-am, ‘Chang she gui aw, nangmi a i yah ung phi kä ka ning hmat gui man ci nei, ka pei ah kä om ne a hei ah hteit vä!’ cine ka kyak na gui khai.

Im Co Ciah Chang Pahnih

²⁴ ‘Kei ah ng’thu cu ngai ne ng’ya ne läk ciah chang cu, lung khui shawk ne im co ciah Lunglang ciah chang awn täng ci.

²⁵ Khokhe aa ne, tuinu ng’güt ne, puikho khi ne ang tum law ung phi cun ah im cu, lung ung cawh ah kya ne kä ng’gäi hlawt ci.

²⁶ ‘Kei ah ng’thu ngai ne ng’ya lang ne, kä läk ciah chang cu bigin ung khui shawk ne im co ciah chang k’ang awn täng ci.

²⁷ Khokhe aa ne, tuinu ng’güt ne, puikho khi ne ang tum law ung, cun ah im cu ng’gäi ne maih ci. Cun ah im adi-dam nak cu nui aih aih ci nei!”

Bawipa Jesuh ah Huham

²⁸ Cun ah Bawipa Jesuh naw ng’thu a pyein kawn ah, chang gui cu ani ah m’theithang ah hmawk ah cäicat ci gui.

²⁹ A i ah kyasei ci ung ani naw thukhän saya gui ah mäih düt ah kä kyak ciah ah huham mah ne am theithang ah hmawk ah kyak ci.