MATTHE 18 - Cho Bible Common Language 2016

Hlüngtai Pibäih cicu A u ang?

¹ Cun kawn ah ang düihpüi gui cu Bawipa Jesuh ah pei ah hteit u netah, “Khankho uknak ung ak hlüngtai pibäih cu a u ang?” ci ne ng’shik ci gui.

² Bawipa Jesuh naw ak hmaw hta tumat cu khü ne ama ah m’düih netah,

³ “Kei naw akcang ka pyein cu, nangmi cu ak hmawhta ah mäih ah nami m’lung kä nami m’thawng ung, khankho uknak ung kä nami gawk khai.

⁴ Shin ah ak hmaw ah mäih ah am lung thawng ne neim sak ciah chang cu khankho uknak ung ak hlüngtai pibäih ah kyak ci.

⁵ Kei ah ming awn shin ah mäih ah ak hmawhta dou ciah chang cu, kei na dou ciah kyak ci.

Cheishoh nak ah Tüihtok Nak

⁶ “Kei na yum ciah ak hmaw tumat a yum nak maih khai ah bik ciah chang cu, a gawn ung gawtlung khit ne m’awi netah, tuili thuuk ung shum ung ani ah phäh ah bä tuh ba khai.

⁷ Chang gui ah yum nak dimaih sak ciah a mawng ama gui om sei, chang gui ung thüi sei nak om ci. Zum nak dimaih sak cicu akcang ah om khai, cun ung phi yum nak dimaih sak ciah chang cu ang htei ah thüi sei nak om khai.

⁸ “Na kut naw phi bäi, na kho naw phi bäi na yum nak a dimaih sak ung, acun ah kut kho cu m’chün ne na ghawh vai, kut kho küm sei m’htei mei ung luh ak dam, kutkho kä küm sei khankho ah kai cu nang ah hmawk ah bä pi ci.

⁹ Na mik ui naw na yum nak a dimaih sak ung cun ah mik cu kawih ne na ghawh vai, mik ui küm sei m’htei mei ung luh akdam, mik ui vangtäng m’dauh sei khankho ah kai cu, nang ah hmawk ah bä pi ci.

Maih ciah Htome awn Am tumtäng nak

¹⁰ “Nangmi naw a u ak hmaw hta phi kä nami yoshe nak vai. Kei naw ka ning m’thein gui cu, ngami ah khankho chang gui cu, khankho kapa Khanpughi ah ma ah angtäi sei om ci gui.

¹¹ (Chang ah Htapa cu maih ciah chang gui hun khai ah lawk ci.)

¹² “Nangmi naw a i cha ah ang nami ngaih: chang tumat naw htome phia a vuh ung kaa, tumat a maih ung ani naw ko-kip-lei-kaw cu khongnawi khu li hmu ah nawng shüt netah, maih ciah htome cu shui ba ci.

¹³ Maih ciah htome cu shui ne hmu ba netah, kä maih tuk ciah kokip lei-kaw ah mä, maih ciah tumat ah hmawk ah yeikyai pi ci nei, ci cu akcang ah ka pyein ci.

¹⁴ Acun ah mäih ah khankho ah nami Pa naw phi ak hmaw hta tumat lam hma ne a dimaih vai cu käng ya hlük ci.

Katnak Bik ciah Phäinau

¹⁵ Na phäi nau naw a ning katnak ung, katnak am dang thei vai ah a om nak ah na hteh vai. Nani mät ng’hmu ni ne na ning lak mah nak cu naning ge nak vai. Na thu ang ngaih ung naning gei ba khai.

¹⁶ Cun ung phi ani naw nang ah thu kä ang ngaih ah a kyak ung, na thu pyein ang düng vai ah cacim ung om ciah mäih ah, saksi tuk khai chang hnih thum na khü tu vai.

¹⁷ Ngami ah thu mä kä ang ngaih ah a kyak ung, a mawng ama avan pyein ne pum im ung nami ap vai. Cun ung phi m’cäi kä ang ngaih ah a kyak ung, ak hnu bäih ah Khanpughi kä yum ciah chang khawn look ciah chang ah mäih ah namik bäi vai.

Khihpawn Nak La Chah Nak

¹⁸ “Kei naw akcang ka pyein cu khomdek khan ung nami khihpawn cu khankho ah khihpawn nak om khai, khomdek khan ung nami chah cu Khankho ah chah nak om khai.

¹⁹ “Kei naw akcang ka pyein cu khomdek khan ung chang hnih hta naw phi yum ne, a täng ah nami taigü ung khankho ah om ciah Kapa naw nami ng’yoih phung cu ning pe gui khai.

²⁰ A i ah kyasei ci ung chang hnih thum hta phi kei ah ming awn ami bum ah a kyak ung ngami awn a täng ah kei cu ka om ci,” ci ne m’cäi gui ci.

M’geinnak Kä Om ciah Changshäm awn M’umtängnak

²¹ Cun kawn ah Peter naw a pei ah law netah, “Bawipa, ka phäi nau naw ana katnak ung a i chü vei kam gein vai ang? chih vei m’gein vai ang!” cine ng’shik ci.

²² Bawipa Jesuh naw, “Chih vei bäng m’gein vai ah kä kyak ci, chih-kip chih vei m’gein vai ah kyak ci.

²³ A i ah kyasei ci ung khankho uknak cu shin awn täng ci; Kho hnüüp ät ung ghangpughang tumat cu ak changshäm gui täih kiang gui khai k’bäi ci.

²⁴ Ani naw tün ne k’tä gui netah ngui tämkäp phiaa khak a pu om ciah chang cu khü sak gui ci.

²⁵ Ani naw a pu cu kä thung hlawt khätah, amät la ak chu a hta ni, a khawh cham ni avan cu yoi ne a thung vai ah ghangpughang naw k’bäi ci.

²⁶ Cun ah kya khätah cun ah chang cu ghangpughang ah ma ah m’khukdong ne kawp netah, ‘Kei ah khan ah na ngaih peä, ka pu cu avan ka thung hlawt vai ah ka tha nak khai nei,’ cine ng’hui paa nak ci.

²⁷ Ghangpughang naw ani cu m’gein netah, a pu avan nawng pe ne amät phi phiawn ci.

²⁸ “Cun ung phi ani cu phyawng ne a hteh ba kawn ah, lam ah ngui api ak pu tu ah ak changshäm paw cu hmu ne, a gawn ung pha ne k’pang netah, ‘Ka ngui na pu tu cu a tuhbäi na thung law ba ä,’ ci ne k’ceet ci.

²⁹ Cun ah chang cu m’khuukdong netah, ‘Kei ah khan ah na ngaih peä,’ ka pu avan ka ning thung khai nei,” cine ng’hui paa nak ci.

³⁰ Cun ung phi ani naw kä ngaih pe ne, a pu avan kä a thung pha ah chuih a kium vai ah thawng ung chum ci.

³¹ Cun gui cu ami changshäm a paw gui naw hmu ng’ya u netah, ang htei ah m’lung she ci gui. Cun ah kyasei ghangpughang ah hteit u ne a mawng avan cu m’thein ba ci gui.

³² Cun kawn ah ghangpughang naw cun ah changshäm cu khü netah, ‘Nang chang shekha, nang naw kei nang paa nak ci sei, na na thung vai om ciah na pu avan cu ning nawng pe ne, ka ning k’phiawn ci.

³³ Kei naw nang ka ning m’gein ah mäih ah na chang paw kä nam gein tu ba ci ma? cine,

³⁴ ghangpughang cu m’lung she netah, cun ah chang cu a pu kä a thung yawp pha ah chuih kium khai ah thawng ung chum ci.

³⁵ Cun ah kyasei nangmi cu phäi nau gui nami mät, tumat ah kat nak cu tumat naw, akcang ah kä nam m’gein tu ah a kyak ung, khankho ah kapa naw nami katnak cu kä ning m’gein gui khai nei,” cine m’cäi gui ci.