MAKUH 4 - Cho Bible Common Language 2016

M’shi Phu ci awn Am’Tumtäng Nak

¹ Bawipa Jesuh naw Kalile tuili kem ah chang gui cu m’thei thang ba gui ci, Chang khli cu a pei ah law ne ng’bum lawk ci gui. Chang gui da law aih u sei Bawipa Jesuh cu tuili kam ah hleiko ung kai ne ngok ci.

² Chang gui cu tui kem ah ng’düi ci gui. Bawipa Jesuh naw amawng alam akda cu m’tumtäng ne m’theithang gui ci.

³ Cun ah am theithang nak gui ung Bawipa Jesuh naw, “Ngai vä, hnü ät ung m’shi phu ciah chang cu m’shi phu khai ah loma ah hteit ci.

⁴ M’shi a phu law ung m’shi amshah cu lam ung kya law sei kha gui naw ei yawp ci gui.

⁵ M’shi amshah cu m’dek ng’pam ciah lung ah khan ah kya law ne, ak yang ah ang lih pyo law pang ung phi,

⁶ kho ang ling law ung a pya kä khüi ci sei ng’yai ne chawng yawp ci gui.

⁷ M’shi amshah cu ng’hling hmu ah kya law ne, ang lih pyo ung phi ng’hling naw k’düi sei kä vuipai hlawt ci.

⁸ M’shi amshah cu am dek ah ni nak ung kya law ne, akni ah ng’lih pyo ne ghing gong ne, a thumkip, ak chuk-kip, a phia ah vuipai ne m’theih tak ci” cine m’thein gui ci.

⁹ Cun kawn ah Bawipa Jesuh naw, “Ng’yak nak vai hnga om ci phung naw ng’ya sä” cik ci.

M’tumtäng nak ah Amawng

¹⁰ Bawipa Jesuh amät a om yah ung ang düigpüi chang gha-lei-goi la a hnu ah läk lawk ciah chang gui naw am tumtäng nak ah mawng cu ng’shi lawk ci gui.

¹¹ Bawipa Jesuh naw, “Nangmi naw thuuk ne kau ciah Khanpughi ah uknak kho ah mawng cu nami hmat pyi ci. Cun ah kä hmat tu hning ci gui cu m’tumtäng ne m’thein gui ah kyak ci.

¹² A i ah kyak sei ci ung; “Ngami cu teng ne phi kä hmuk ci gui, Ngai ng’ya ne phi kä hmat ci gui, Ami teng cu hmu u ne, Ami ng’yak cu hmat u ne, ami kyak vai sü ung, Khanpughi lam ah ng’hlat lawk khai sü gui te, Cun ung ngami ah katnak phi m’gein gui khai sü te, Ci ah cacim ung om ci” cine m’thein gui ci.

Bawipa Jesuh naw M’shi Phu ci awn M’tumtäng nak M’dang ne M’thein Gui ci

¹³ Bawipa Jesuh naw, “Nangmi cu shin ah m’tumtäng nak hngaw kä nami hmat ung, a i awn m’tumtäng nak nami hmat hlawt khai ang?

¹⁴ M’shi phu ci naw Khanpughi ah ng’thu m’shi cu phu ci.

¹⁵ Chang amshah gui cu lam ung kya lawk ciah geit m’shi awn täng ci gui, Khanpughi ah thu ng’ya te ci gui, cun ung phi acun vai-am khoshe naw lak pe gui yawp ci.

¹⁶ Chang amshah gui cu lung hmu ah kya lawk ciah geit m’shi awn täng ci gui, ngami cu Khanpughi ah ng’thu ami ng’yak vai-am yeikyai ne dou ci gui.

¹⁷ Cun ung phi cun ah ng’thu cu kä khäng htek ne a shäng hta bäng om ci. Acun ah ng’thu ah hmawk ah yaica nak la shedam nak ami bui awt law ung ang ghit ah ng’hlat ba ci gui.

¹⁸ Chang amshah gui cu ng’hling hmu ah kya lawk ciah m’shi awn täng ci gui, Ngami cu Khanpughi ah ng’thu ngai ng’yak ci gui.

¹⁹ Cun ung phi pumsa ah ghin nak vai ah hmawk ah ng’ä ai nak gui, ng’bühmang nak hlü gui, la a hei ng’yak nak hlü gui naw ang thu ng’yak cu shungshet ci gui. Cun ah kya ne kä m’theih tak hlawt ci.

²⁰ Chang amshah gui cu m’dek ni ung kya lawk ciah geit m’shi awn täng ci gui, ngami cu Khanpughi ah ng’thu ngai ng’ya u ne dou ci gui ah kyak ci. Ngami cu a thum-kip, ak chuk-kip, a phia ah vuipai m’theih tak ci gui” cine m’thein gui ci.

Dawn awn Uk ah Meidäi

²¹ Bawipa Jesuh naw, “Meidäi cu dawn awn uk vai ah kä kyak ci ih phak ah kaa ah thoi vai ah phi kä kyak ci. Meidäi cu lungk’pei ah khan ah m’däi vai ah kä kya ne ma?

²² Thuh phung dang yawp khai, küm phung cu ng’hmawng yawp khai.

²³ Ng’yak nak vai ah hnga om ci phung naw ng’ya sä” ci ne kiak na gui ci.

²⁴ Cun kawn ah bawipa Jesuh naw, “Nami ng’yak cu ng’htei khai ah ngai vä! Nangmi naw chang-am nän ne nami peit nak ung, Khanpughi naw nangmi-am nän ne ning pe ba gui khai; Cun ah däm pi khai ah phi nän ne ning k’bäi pe gui khai.

²⁵ Khawh mah ci-am län ne k’be pek khai, a i kä om ciah kaa ak om hta phi lak pe yawp khai.

Geit Ang Gho-sau Law awn Am Tumtäng nak

²⁶ Cun kawn ah mä Bawipa Jesuh naw, “Khanpughi ah uknak kho cu shin ah mäih ah kyak ci,

²⁷ Chang tumat cu loma ah m’shi geit ci. A geit kawn ah mü ah ip ne, hnüüp ah om ne a kyak yah ung, geit m’shi cu m’set law ne ng’lih pyo lawk ci. A i hawkcha ah ang lih pyo law cu ani naw kä hmat ci.

²⁸ Khomdek amät naw ng’lih pyo sak ne vuipai sak ci. Ak htük ung m’guh sak ci, cun kawn ah vuipai sak ci, Cun kawn ah ak htang ah phü ne dang lawk ci.

²⁹ Htang vui a hmin law ung, htang ah vai ah akhin gawk lawk ciah kyasei, chang naw tün ne aat ge ci” cine m’thein gui ci.

Anhta Ui awn M’tumtäng nak

³⁰ Cun kawn ah Bawipa Jesuh naw, “Khanpughi ah uknak kho cu a i awn m’tumtäng vai ang? A i awn m’tumtäng ne m’dang vai ang?

³¹ Khanpughi ah uknak kho cu anhta ui awn täng ci. Anhta ui cu m’dek ung geit yah ung geit m’shi gui nüng ah yaw pi bäih ci.

³² Geit ung a ghing ghong law kawn ah a hei sing-ghing aläm gui avan ah däm pi ci. Ang ban gui akda ah pang law sei, kha gui naw phi ng’bu tu ne ami ng’yi nak hmuh lawk khai kyak ci” ci ne m’thein gui ci.

³³ A shin ah mäih ah Bawipa Jesuh naw, chang gui naw ami hmat yäi vai awn m’tumtäng ne Khanpughi ah ng’thu cu m’theithang gui ci.

³⁴ Kä m’tumtäng ah a i phi kä m’theithang gui ci. Cun ung phi ami mät ami om yah ung ang düih püi gui-am a päng avan cu m’dang ne m’thein gui ci.

Bawipa Jesuh naw Puikho Khi Düm Sak ci

³⁵ A cu hnüüp khomü hun lam ah Bawipa Jesuh naw ang düihpüi gui-am, “Tuili ah vantäng ga ah mi vang kat khai” cine kyak na gui ci.

³⁶ Ang düihpüi gui cu chang gui nawng shüt u ne, Bawipa Jesuh ah ngoh nak ah hleiko ung kai law tu u sei, vang ga ah vang kat vük ci gui.

³⁷ A hei hleilo gui phi hteit tuk ci gui. Cun yah ung ak ten ah puikho khi ne tuinu ng’hnawk law sei, hleiko ung tui be law hlük ci.

³⁸ Bawipa Jesuh cu hleiko ah a hnu lam ah aknep ah khum ne ip ci. Ang düihpüi gui naw Bawipa Jesuh cu m’tho ba u netah, “Bawipa, mikmi tui ung lut ne mi si lawk khai kyak ci nei kä na hmat tuk ci ma?” cine ng’shik ci gui.

³⁹ Bawipa Jesuh cu tho ne ng’düi law netah, “Khokhi aw ng’düm ä, tui hnawk aw kyeim ä” cine khämtam ne pyein ci. Acun vai-am kho khi cu ng’düm ne, tui hnawk cun phi kyeim ci.

⁴⁰ Cun kawn ah Bawipa Jesuh naw ang düihpüi gui-am, “A i ah kia sei shin hlawk ah nami kyihkyawk ang? Tuhbäi güt ung nangmi naw, kei cu nami na yum nak kä om ne ma?” cine ng’shi gui ci.

⁴¹ Cun yah ung ngami cu ang htei ah kyikyawk u netah, “Shin ah chang cu a u ah mäih chang ang? Khokhi la tui hnawk naw phi ani ah ng’thu cu ngai ci gui nei” cine ami mät gui ng’htau ci gui.