MAKUH 3 - Cho Bible Common Language 2016

Akut Vangtäng Shuum ciah Chang Tumat

¹ Cun kawn ah Bawipa Jesuh cu pum im ah hteit ba ci. Cun ah pum im ah a kut vangtäng shum ciah chang tumat om ci.

² Cun ung om ciah chang gui naw Bawipa Jesuh ah a katnak cu hmu hlü u netah, kyin hnüüp ung cun ah a kut shuum ciah chang cu a gai sak la kä a gai sak ah teng kheng ci gui.

³ Bawipa Jesuh naw a kut shuum ci-am, “Chang gui ah ma ah law ne ng’düi ä” cine pyen nak ci.

⁴ Cun kawn ah Bawipa Jesuh naw, “mikmi ah thukhän a i ah mäih ah ang a om? kyin hnüüp ung akni bi vai ang, akshe bi vai ang? chang phiawn sak vai ang, m’di m’dap vai ang?’ cine ng’shi gui ci. Ngami cu api ah phi kä chiu ne om ci gui.

⁵ Cun ah chang gui ah shekha m’ghämce ah hmawk ah, Bawipa Jesuh cu thüi ah phi thüi ne, am lung phi she khätah, ngami lam ah ng’hlat ne teng gui netah, a kut shuum ciah chang-am, “Na kut cu hei phiäih ä” cine pyen nak ci. Ani naw a kut hei phiäih khätah a kut cu akni ah kya ba ci.

⁶ Pharisee gui cu acun vai-am lut law ba u ne, Bawipa Jesuh cu ngawn vai ah k’bäi ci gui.

Tuili Kam Pei ah Chang Khli gui

⁷ Bawipa Jesuh cu ang düihpüi gui awn a täng ah Kalile tuili pei ah hteit ba u sei, chang khli naw a hnu ah läk lawk ci gui.

⁸ Cun ah chang gui cu Kalile ah kaa gui ni, Judea ah kaa gui ni, Jerusalem ah kaa gui ni, Idumea ah kaa gui ni, Jordan tuinu ah van ga täng ah ka gui ni, Tire la Sidon ah a pei yung ah kaa gui ni ah kyak ci. Cun ah chang gui cu Bawipa Jesuh ah bilawh gui ng’ya tu u netah cun ah gawk lawk ci gui ah kyak ci.

⁹ Chang gui da aih u khätah cun ah chang gui naw Bawipa Jesuh cu kä ami müt pah-en vai ah, amät ah phäh ah hleiko ami m’shei peit ge vai ah ang düihpüi gui cu m’cäi gui ci.

¹⁰ Bawipa Jesuh naw gawipai ciah chang akda gai ba sak ci kya sei, gawpai ciah chang gui cu Bawipa Jesuh va tawn khai gui ah vang tawn vük ci gui.

¹¹ Khoshe ah kai gui ah chang gui naw Bawipa Jesuh cu hmu u netah, ama ah ng’dawkphah u ne “Nang cu Khanpughi ah ning Htapa nei” cine m’lau ci gui.

¹² Bawipa Jesuh naw mümcha she gui cu, ani a u ah a kyak ah mawng m’dang ne kä ami pyein vai ah khän ne k’bäi gui ci.

Bawipa Jesuh naw Ang Düihpüi Gha-lei-goi Ghü Gui Ci

¹³ Cun kawn ah Bawipa Jesuh cu khomhtung khan ah hang kai netah, a hnu ah läk khai ah ang yak hlü ah chang gui cu khü gui ci.

¹⁴ Ngami cu a pei ah gawk law u khätah, chang sing gha-lei-goi cu ghü gui netah, ang düihpüi gui ah ami min cu sui gui ci. Bawipa Jesuh naw, “Kei naw nangmi cu kei awn a täng ah nami om khai ah ka ningghü gui ci, thu nami pyein khai ah ka ning tüi gui khai.

¹⁵ Khoshe nami k’täm nak vai ah huham phi ka ning pe gui khai” cine m’cäi gui ci.

¹⁶ Bawipa Jesuh naw a ghü gui ah chang sing gha-lei-goi ah ami ming cu; Simon (Bawipa Jesuh naw Peter ah ang ming asui),

¹⁷ James la anau Johan, Zebedee ah hta goi (Bawipa Jesuh naw Boanerake ah ani ming a sui goi, kho hmum chang ciah ming ci);

¹⁸ Andru, Philip, Bartholome, Matthe, Thomas, James (Alphaeus ah hta), Thaddaeus, Simon (küi khän nak om ci), la

¹⁹ Bawipa Jesuh ga kut ung ap ciah Judas Iskariot ni gui ah kyak ci.

Bawipa Jesuh la Beelyebul

²⁰ Cun kawn ah Bawipa Jesuh cu im ah hteit ba ci. Chang gui akda ng’bum law ba u sei, Bawipa Jesuh la ang düihpüi gui cu ei ami ei nak vai phi akhin kä gah ci gui.

²¹ Chang gui naw, Bawipa Jesuh-am, “Gu lawk ci nei” cine kya u sei ng’ya u netah, Bawipa Jesuh ah ak kyong ungka gui cu, ani m’hteihtang khai gui ah a pei ah lawk ci gui.

²² Jerusalem ah kaa lawk ciah thukhän saya amshah gui naw, “Ani cu Beelyebul naw a kai nei, ani cu khoshe gui ah ng’vai pi ah kyasei a cun ah ming awn khoshe gui cu m’khütnäng ci nei” cine pyein ci gui.

²³ Bawipa Jesuh naw ngami cu khü gui netah, m’tumtäng nak awn “A i hawkcha ah khoshe naw khoshe cu k’täm hning khai ang?

²⁴ Chang gui ami m’lung ngaih ng’pai sei ami küüt-neet nak ah kho cu a hei hei ah ng’pai yawp khai nei.

²⁵ Kyong khui ät ung chang gui ami m’lung ngaih ng’pai sei ami küüt-neet ung ami kyong khui cu ng’pai yawp khai nei.

²⁶ A cun ah mäih khoshe gui cun phi ami ng’pai ah a kyak ung, ami kho ng’pyi sei maih khai gui ah kyak ci nei.

²⁷ M’gäi ciah chang cu khit ne pawng cang ci naw vah, a im ung lut ne a khawh cu gut hlawt khai, kä cun ung a u naw kä gut hlawt khai.

²⁸ Kei naw akcang ka pyein cu, chang gui cu ami mät ah katnak ah khan ah phi bäi, Khanpughi kat na ne ami thu chiu ah khan ah phi bäi, m’geinsei nak om ci.

²⁹ Cun ung phi Mumcha Theing katnak ciah chang ah khan ah m’geinsei nak kä om ci. A i ah kyasei ci ung ani cu angtäi ah katnak bik ciah chang ah kyak ci,” cine kyak na gui ci.

³⁰ Cun ah Bawipa Jesuh naw a pyein ah mawng cu, chang amshah naw “Ani cu khoshe ah kai nei” cine ami kyak nak ah hmawk ah kyak ci.

Bawipa Jesuh ah Anu la Anau Gui

³¹ Bawipa Jesuh ah anu la anau gui cu gawk law u ne, im ah ak pung ah düi u netah, Bawipa Jesuh cu va khü sak gui ci gui.

³² Chang gui naw, Bawipa Jesuh cu k’bui ne ngok ci gui. Ang khü lawk ci gui naw, “Na nu la na nau gui naw, ak pung ah düi ne ning khü ci gui nei” cine m’thein ci gui.

³³ Bawipa Jesuh naw, “Kei ah kanu la kanau gui cu a u gui ang?” cine kyak na gui ne, k’bui ne ngok ci gui cu teng gui netah,

³⁴ “Kei ah kanu la kanau gui cu a shin gui nei!

³⁵ Khanpughi ah ang yak hlü ah bilo ciah chang phung cu, kei ah nau, kei ah be, kei ah nu ah kyak ci nei” cine kyak na gui ci.