MAKUH 2 - Cho Bible Common Language 2016

Shuum ciah Chang Gai Sak Ci

¹ Hnüüp api shou hta khätah, Bawipa Jesuh cu Kapernaum gawnu ah gawk law ba ne om sei, ‘Im ah gawk law ba ne om ci’ cicu chang gui naw ng’yak ci gui.

² Cun ah kyasei chang gui ng’bum law u ne, im kyong ung m’kawt law ah khüt khai ah be ci gui. Bawipa Jesuh naw cun ah chang gui-am Thu Ni cu m’thein gui ci.

³ Cun yah ung chang phli naw shuum ciah chang tumat cu kawt law ci gui.

⁴ Chang da aih sei kä luh law püi hlawt u netah, im khan ah kai püi ne m’dikcih kaih pawk netah, Bawipa Jesuh ah ma ah gui shawn ne yuk chah ci gui.

⁵ Bawipa Jesuh naw ngami ah yum nak a i hlawk ah a däm cu hmu netah, shuum ciah chang-am, “Ka hta, na katnak cu ning phiawn sak pyi nei” cik ci.

⁶ Cun ung phi cun ung om tuk ci gui ah thukhän saya gui naw, “A i ah kyasei shin ah chang naw, shikcha ah a pyein ang?

⁷ Ani naw Khanpughi cu kat na pyi ci nei. Khanpughi bäng naw vah chang ah katnak cu phiawn sak hning ci” cine ngaih-tüh ci gui.

⁸ Bawipa Jesuh naw cun ami ngaih-tüh cu hmat netah, “Nangmi a i ah kyasei, cän ah nami ngaih-tüh ang?

⁹ Shuum ciah chang-am, ‘Na katnak cu ning k’phiawn nei ci ang a yäi tu ba kaw? Kä cung ‘Tho law ne na ih phak look ne hteit ä’ ci ang a yäi tu ba kaw’?

¹⁰ “Chang ah Htapa naw khomdek khan ung katnak ak phiawn hning ah mawng cu ka ning hmuh sak gui khai” ci netah; a kut kho shuum ci-am,

¹¹ “Tho law ne, na ih phak look ne im ah hteit ba ä” cine pyen nak ci.

¹² Chang khli ah ma ah cun ah chang cu tho law ne, a ih phak kawt ne hteit ba ci. Cun ah tho law ne a hteh ba cu hmu u netah, chang gui cu ang htei ah cäicat ci gui. “Shin ah mäih cu a i yah ung phi kä hmuh ng, yak man nei” cine Khanpughi cu m’hlüngtai ci gui.

Bawipa Jesuh naw Levi cu Khü ci

¹³ Bawipa Jesuh cu Kalile tuinu kam yung ah a htehhton ba yah ung, chang khli cu a om nak ah law u sei m’theithang gui ci.

¹⁴ Cun kawn ah Bawipa Jesuh naw a hteh nak ba ah khon ami loh nak ah yung ung ngok ciah Alphaeus ah hta Levi cu hmu netah, “Ka hnu ah na läk ä” cine khü khätah, Levi naw ng’düi law ne a hnu ah läk ci.

¹⁵ Bawipa Jesuh cu Levi ah im ah ei a ei tu sangung khan look ci gui la changshe ah ami khoikhei gui ah chang khli naw läk law u ne, amshah gui cu amät la ang düihpüi gui awn a täng ah ei an tuk ci gui.

¹⁶ Acun ah khon look ci gui la changshe ah ami khoikhei gui awn a täng ah ami ei awk cu pharisee ah kyak ci gui ah thukhän saya gui naw hmu u netah, “A i ah kyasei shin ah changshe gui awn a täng ah a ei awk ang” cine ang düihpüi gui cu ng’shi gui ci gui.

¹⁷ Cun ah ami ng’shi gui cu Bawipa Jesuh naw ng’ya gui netah, “Gai ciah hmawk ah sei bawi kä hlü ci, gaw ciah hmawk ah hlü ci, Kei cu chang k’ni gui ka khü gui khai ah ka lawk ciah kä kyak ci, changshe gui ka khü gui khai ah ka lawk ci” cine kyak na gui ci.

Ei Hlawi ah Mawng Ami Ng’shi nak

¹⁸ Kho hnüüp ät ung Johan ah khahpüi gui la pharisee gui cu ei hlawi ci gui. Chang amshah gui cu Bawiapa Jesuh ah law u netah, “Tuihnim Johan ah ang khahpüi gui la pharisee gui cu ei hlawi ci gui, a i ah kyasei nang ah düihpüi gui naw ei kä ami hlawi tu ang?” cine ng’shik ci gui.

¹⁹ Bawipa Jesuh naw, “Chumah ciah pamihta ah akhin gui cu, amät awn a täng ah ami om yah ung ei hlawi hning khai gui ang? Chumah ciah pamihta a om ah chuih ei kä hlawi khai gui nei.

²⁰ Cun ung phi ngami ung kaa, cun ah pamihta ng’pai ne a hteh nak ba vai ah hnüüp a gawk law ung, ngami cu ei hlawi khai gui nei.

²¹ “A u naw phi sui akheei teek ci cu, tahsa akthai awn kä k’dawn man ci. Cun ah dawn ung sui kheei cu yün ne teek na pi ci.

²² Acun ah mäih ah sapyit tui asü cu um she ung u naw kä than man ci. Um she ung tha ung sapyit tui asü naw um she cu k’poh teek sei sapyit tui la um avan di yawp khai. Sapyit tui asü cu um akthai ung than vai” cine kyak na gui ci.

Kyin Hnüüp ah Mawng Ami Ng’shi nak

²³ Kyin hnüüp ung Bawipa Jesuh cu ang düihpüi gui awn a täng ah htanglo gui sun pah ne ami hteh nak ah, ang düihpüi gui naw htang vui gui cu dü ne shui ci gui.

²⁴ Cun hmuk ci gui ah pharisee gui naw, “Teng ä, nang düihpüi gui naw thukhän awn hnungtuk khai ah kyin hnüüp ung bi bik ci gui nei” cine Bawipa Jesuh cu kyak nak ci gui.

²⁵ Bawipa Jesuh naw, “David naw amät la ak chang gui cawigha law aih u netah a bilawh ah mawng cu kä nami hmat tu man ne ma?

²⁶ Taigütung Abiatha a om yah ung David cu Khanpughi ah pum im ah lut ne, Khanpughi ami khawihnah nak ah, taigütung bäng naw a ei man ah m’htut cu, amät naw ei ne, ak chang gui-am phi m’bei gui ci ah kä kya ne ang?” cine pyen na gui ci.

²⁷ Cun kawn ah Bawipa Jesuh naw akhnu ah, “Chang ah ni nak vai ah hmawk ah kyin nak hnüüp cu m’hnüt ah kyak ci, kyin nak hnüüp ah hmawk ah chang cu tüisho ah kä kyak ci.

²⁸ Cun ah kyasei chang ah Htapa cu kyin nak hnüüp ah Bawipa ah kyak ci” cine kyak na gui ci.