MAKUH 15 - Cho Bible Common Language 2016

Bawipa Jesuh cu Pilat ah Ma ah Hteh Püi ci gui

¹ A ngawi ung khongawi htaksiik ah taigüpa gui cu, Jew chang ng’vai gui, thukhän saya gui la, kawngsi yung bawi gui awn ng’hmu ne ng’ge u netah, Bawipa Jesuh cu khit u ne Pilat bawi ah hteh püi ci gui.

² Pilat bawi naw, “Nang cu Jew chang gui ah ghangpughang akcang ah na kyak ci ma?” cine ng’shik ci. Bawipa Jesuh naw, “Nang ah pyein ah kyak ci nei” cine pyein ci.

³ Taigüpa gui naw Bawipa Jesuh cu aktung ah m’kat ne huttaap ci gui.

⁴ Cun ah kyasei Pilat bawi naw Bawipa Jesuh-am, “Nang cu a i ah phi käng thu ne na om düt ci ma? Nang cu a i hlawk ah ning m’kat ne ami ning huttaap cu na hmat khai nei” ci ne pyen nak ci.

⁵ Cun ung phi Bawipa Jesuh cu kä chiü ne a düm ah om khätah, Pilat bawi cu ang htei ah ngaihtüh khit ci.

Bawipa Jesuh cu Ngawn Vai ah K’bäi Ci Gui

⁶ Phyawn nak pawi ah a khin päng ung Pilat bawi naw, chang gui ah ng’yak hlü ah, thawng cun tumat cu m’hlawt ci man ci.

⁷ Acun yah ung Barabbas ming nak ciah chang ni, bawi gui hnungtuk püi ciah chang gui ni, m’guk-ei gui ni cu thawng ung cum ci gui.

⁸ Chang gui naw phiawn nak pawi päng ung ami thäh man ah thäh ba khai gui ah Pilat bawi ah law u khätah, Pilat bawi naw,

⁹ “Nangmi naw Jew chang gui ah ghangpughang cu m’hlawt vai ah nami ng’yak hlük ci ang?” cine ng’shi gui ci.

¹⁰ Cun ah ang shi gui ah mawng cu, taigüpa gui naw Bawipa Jesuh cu kä ng’ya hlü u netah, ani ah om nak ah law püi ne ami ap law cu hmat netah a pyein ah kyak ci.

¹¹ Taigüpa gui naw ni püi gui u sei, chang gui naw Bawipa Jesuh ah a hnün ung Barabbas cu m’hlawt vai ah k’thäh ci gui.

¹² Pilat bawi naw, “Jew chang gui ah ghangpughang nami cicu a i ah ka ci vai ang? ci ne ng’shi ba gui ci.

¹³ Ngami naw kutlam tung ung tai ne ngawn vai nei” cine m’lau ci gui.

¹⁴ Pilat naw, “Ani naw shetkat nak a i ang abi? cine ng’shi ba gui ci. Chang gui naw, “Cun ah chang cu kutlamtung ung tai ne ngawn vai nei” ci ne m’lau law piktäi ci gui.

¹⁵ Pilat naw, amät cu chang gui naw ami yum vai ng’ya hlü netah Barabbas cu k’phiawn ne Bawipa Jesuh cu tuhthat netah, kutlam tung ung tai ne ami ngawn vai ah ap gui ci.

Gakap Gui naw Bawipa Jesuh cu Päipih ci Gui

¹⁶ Gakap gui naw Bawipa Jesuh cu gawnu bawi ah im ah hteh püi u netah gakap nawng ät naw’ koi ci gui.

¹⁷ Cun kawn ah Bawipa Jesuh-am sui asen hlui bäng m’sui u ne, ng’hling lukhu k’bün u netah,

¹⁸ “Jew Chang gui ah ghangpughang ghi ne ghing sä” cine ngüm täu ne päipih ci gui.

¹⁹ Cun kawn ah alu ung htung awn that ci gui, ami m’shi awn m’thui ci gui, ama ah m’khukdoong ne kawp ne taigü ng’hlawk ci gui.

²⁰ Cun ah päipih u netah asen hlui ah sui cu suh ba sak u ne, amät ah sui te cu m’sui ba ci gui. Cun kawn ah kutlam tung ung tai ne, ngawn vai ah Bawipa Jesuh cu hteh püi ci gui.

Bawipa Jesuh cu Kutlamtung ung Tai ne Ngawn ci Gui

²¹ Cun yah ung lam ah Sairin kho ah kaa (Aleksandä la Rufus ah ani pa) Simon cu ana law sei k’pang u netah, Bawipa Jesuh ah kutlam tung cu kaw sak ci gui.

²² Cun kawn ah Bawipa Jesuh cu (Lukoi k’am) ah ming ciah Kolkotha kho hmun ah hteh püi ci gui.

²³ Ngami naw muran naw ami k’caw ah sapyit tui cu tu ci gui, cun ung phi Bawipa Jesuh naw kä awk ci.

²⁴ Cun kawn ah Bawipa Jesuh cu kutlamtung ung tai ne ngawn ci gui. A suisak gui cu chang gui naw m’shüih tawk ne ng’pai ci gui.

²⁵ Bawipa Jesuh kutlamtung ung tai ne ami ngawn nak ah khin cu, kho plang k’tai nayi kaw a khin ah kyak ci.

²⁶ Bawipa Jesuh ami m’kat nak ah kutlamtung ung gu ne ami tai ah ca cu, “Jew Chang gui ah Ghangpughang” ciah kyak ci.

²⁷ Bawipa Jesuh awn a täng ah m’guk-ei pahnih cun phi akpat lam ah tumat ak eng lam ah tumat ah kutlamtung ung tai ne ngawn tuk ci gui.

²⁸ (Acun gui naw, ‘Bawipa cu katnak bik ciah ng’louh sak ci gui’ ciah cacim ung om cicu küm sak ci.)

²⁹ Lam ung hteit hton ciah chang gui naw Bawipa Jesuh cu m’hai ne dan u netah, “Pum im cu gäi netah hnüüp thum ung co ba khai ah chang can ah maw!

³⁰ Kutlamtung ungka kyum law ba ä, na mät naw na mät hun law shüm ä” cine päihpih ci gui.

³¹ Acun ah mäih ah taigüpa gui la thukhän saya gui naw phi päihpih u ne, “Shin ah chang cu chang a hei gui läi hun gui hning ci, cun ung phi amät naw amät läi kä hun hning ci nei.

³² Israel Ghangpughang, Messiah Bawipa, kutlamtung ungka kyum law ba sä, cun kami hmuh ung kami yum khai nei” cine kyak nak ci gui. Bawipa Jesuh awn a täng ah kutlamtung ung ami ngawn goi naw phi Bawipa Jesuh cu päipih ci goi.

Bawipa Jesuh ah Hnun Apit Nak

³³ Kho hnüüp lunglai ung tün ne kho k’awi nayi thum güt ung khomdek khan avan cu mü ne hmüp yawp ci.

³⁴ Kho k’awi nayi thum ah khin ung Bawipa Jesuh cu, “Eloi, Eloi, lema sabachthani?” cine m’lau ci. Cun cu, “Ka Khanpughi, Ka Khanpughi, a i ah kyasei kei na na nawng nei” a ciah kyak ci.

³⁵ Apei ah ng’düi ci gui naw cun ah ng’thu cu ng’ya u netah, “Ngai tu vä, Elijah khü ci nei” cine kyak ci gui.

³⁶ Cun yah ung chang tumat cu dawng law ne, sapyit tui pyeng ci cu, m’yak awn sook ne, ng’lawi ung m’sawi ne, han tu netah, “Ani la lawk khai ah Elijah a law la kä a law ah mi teng shüm kaw” cine kyak ci gui.

³⁷ Bawipa Jesuh cu shalawng khai ah m’lau netah kät lawk ci.

³⁸ Acun vai-am pum im kyong ah ami yai ah yih cu vang mawng ah kaa vang mawng ah khüt khai ah hnih ah teek ne ng’chak ci.

³⁹ Bawipa Jesuh ah sih nak ah ma ah ng’düi ciah gakap bawi naw, Bawipa Jesuh asih law cu hmu netah, “shin ah chang cu akcang ah Khanpughi ah Htapa ah kyak ci nei” cine pyein ci.

⁴⁰ Hnumi amshah gui naw ng’shawng pipi netah Bawipa Jesuh cu teng ci gui. Cun ah chang gui cu, Mari Makdalene, Ak hmaw ba James la Josef ah nu Mari la Salome ni gui ah kyak ci.

⁴¹ Ngami cu Bawipa Jesuh Kalile kho ah a om yah ge ung tün ne, a hnu ah läk ne m’hteihtang ci gui ah kyak ci. Ngami ah kawn ah Bawipa Jesuh awn a täng ah Jerusalem ah kaa ng’läk law tuk ciah hnumi gui phi om ci gui.

Bawipa Jesuh Ami M’cim ah Mawng

^42-43 Acun ah hnüüp mühun lam ah Arimathea ah kaa, Josef ming nak ciah chang tumat cu gawk lawk ci. Ani cu chang ah kyih aa tu ah bawimang chang vai ah kyak ci. Ani cu Khanpughi ah uknak kho a gawk law vai cu yum ne ngäng ciah kyak ci. (Cu hnüüp cu a ngawi ung kyin vai kyasei ami pawng m’hteim nak ah kyak ci.) Acun ah chang naw Pilat ah ang ghit ah va hteit ne Bawipa Jesuh ah a gook cu htüm vai ah vak thäh ci.

⁴⁴ Pilat naw Bawipa Jesuh a kät pyi cu ng’ya ne cäicat netah, gakap bawi cu khü ne Bawipa Jesuh a kät nak a i güt a lüng law ah ng’shik ci.

⁴⁵ Ani naw gakap bawi ah m’thein ba ang yak kawn ah Josef am a gook cu htüm vai ah ap ci.

⁴⁶ Josef naw Bawipa Jesuh ah a gook cu kutlamtung ung kaa, chang ba netah yih bawk awn hlawp ne k’tom ci. Cun kawn ah lung ami shawk ah ng’cim hmun khui ung k’phuh netah, khui m’kawt cu lungnu m’hlat ne khai shüt ci.

⁴⁷ Cun ah ami khai cu Mari Makdalene la Josef ah nu Mari naw hmu tuk ci goi.