MAKUH 1 - Cho Bible Common Language 2016

Tuihnim Johan ah Thu Pyein

¹ Shin cu Khanpughi ah Htapa, Bawipa Jesuh Khrit ah a mawng Thu Ni ah kyak ci.

² Cun ah ang tün law ah mawng profet Isaiah ah caguk ung om ci cu; “Khanpughi naw, ‘Nang ah lam cu m’awng khai ah na ma ah ka ng’shächang cu ka tüi lawk khai.’

³ Bungpuk ah ng’shä cicu na ma ung ka tüi khai nei, Bawipa ah law nak vai ah lam cu pyang tham ge vä; Ani ah hteh nak vai ah lam cu düng sak ge vä’ cine pyein ci.

⁴ Cun ah kyasei Tuihnim Johan cu bungpuk ah dang law netah, tuihnim nak pe ne ng’thu ang ng’shäu law cu “Nami katnak gui ung ng’yu ba ne tuihnim yawp vä, cun ung Khanpughi naw nami katnak ning m’gein gui khai nei” ciah kyak ci.

⁵ Judea kho la Jerusalem mang gaw ungka chang akda cu law ne Johan ah thu ngai lawk ci gui, ngami cu ami katnak ung ng’yu ba u ne, Jordan tuinu ung tuihnim ci gui.

⁶ Johan cu kala-uk ah mu awn tah ah sui cu sui ne, mehvun cu m’ciu ah vawp ci. Ani ah ei awk cu khingkhighi la khoitui ah kyak ci.

⁷ Ani naw chang gui ah ma ah thu ang ng’shäu cu, “Kei ah hlüngtai pi ciah Bawipa cu kei ah hnu ah dang lawk khai nei. Kei cu ani ah phahnak gui k’phian khai a phi kä ka khin ci nei.

⁸ Kei naw nangmi cu tui awn hnim nak ka ning pe gui ci, cun ung phi ani naw Mumcha Theing awn hnim nak ning pe gui khai nei” ciah kyak ci.

Bawipa Jesuh ah Tuihnim nak La Khoshe ah Tüihtok nak

⁹ Kä shou pha sei Bawipa Jesuh cu kalile kho, Nazaret gawnu ungka law ne, Jordan tuinu ung Johan ah tuihnim nak cu lak ci.

¹⁰ Tui ungka a thawh law ba vai-am khankho m’kawt hmawng khätah Mumcha Theing cu Müm bawk ah mäih ah ak khan ah kyum law sei hmuk ci.

¹¹ Cun kawn ah khankho ah kaa k’aw cun phi, “Nang cu kam hni aih ah ka ning Htapa nei, nang ung kei ka yeikyai ci nei” ciah thang lawk ci.

¹² Acun vai-am Mumcha naw Bawipa cu bungpuk ah hteh püi ci.

¹³ Cun ah bungpuk ah khoshe naw Bawipa cu kho hnüüp phli-kip ung tüihtok ci. Cun ah bung ah kiung ciah khisa gui om ci gui, cun ung phi khanchang gui naw Bawipa cu m’hteihtang ci gui.

Bawipa Jesuh naw Nga Phak ciah Chang Singphli cu Khü Gui ci

¹⁴ Johan thawng ung ami chum kawn ah Bawipa Jesuh cu Kalile kho ah law ne Khanpughi ungka lawk ciah Thu Ni cu pyein ci.

¹⁵ Bawipa Jesuh naw, “Akhin cu küm pyi ci nei, Khanpughi ah uknak kho cu ng’et lawk ci nei, nami katnak gui nüng ung ng’yu ba ne Thu Ni cu yum tu vä” cine pyein ci.

¹⁶ Bawipa Jesuh cu Kalile tuinu kam yung ah a hteh yah ung nga shui ne ng’vai vawi ci goi ah Simon la anau Andru cu hmu goi ci.

¹⁷ Bawipa Jesuh naw, “Law nä, ka hnu ah na läk nä, nangni cu chang phak ciah ngak’pha ah ka ning pyang goi khai” cine kyak na goi ci.

¹⁸ Ngani naw acun vai-am ani ng’vai nawng shüt ni ne Bawipa ah a hnu ah läk ci goi.

¹⁹ Bawipa Jesuh cu hteit ba shäng shäng netah, Zebedee ah hta goi James la Johan cu hmu ba goi ci. Ngani cu hleiko ung ng’vai kiang ne om ci goi.

²⁰ Bawipa Jesuh naw ngani cu a hmu goi vai-am khü goi sei, ngani naw ani pa Zebedee la ak chang gui cu hleiko khan ah nawng shüt ne a hnu läk tuk ci goi.

Khoshe ah Kai ah Chang Tumat

²¹ Bawipa Jesuh la ang düihpüi gui cu Kapernaum gawnu ah gawk law u netah, kyin hnüüp ung Bawipa Jesuh naw pum im ah hteit ne m’theithang gui ci.

²² Bawipa Jesuh naw thukhän saya gui ah mäih ah kä kyak ciah, m’gäi ciah chang ah mäih ah m’theithang gui ci. Cun ah kyasei chang gui cu ang htei ah cäicat ci gui.

²³ Cun yah ung pum im ah khoshe ah kai ah chang tumat om ci

²⁴ Cun ah chang naw, “Nazaret chang Jesuh Bawipa, nang naw keimi a i ah na na ci gui hlük ci ang? Keimi na nam di gui khai ah na lawk ci ang? Nang a u ah na kyak cu ka ning hmat ci nei, nang cu Khanpughi ah Theingcim ciah shä tüih ah na kyak ci nei” cine m’lau ci.

²⁵ Bawipa Jesuh naw, “kä chawkchek ne, chang ungka lut law ne a hei ah hteit ä” cine taam ci.

²⁶ Khoshe naw chang cu ng’tum ne ng’khlet khai ah ghu shüt netah, ng’shan sei m’lau ne lut law ne hteit ci.

²⁷ Chang gui cu ang htei ah cäicat u netah, “shin ah a mawng cu a i hawkcha ah ang? m’theithang nak ak thai a hei ang? Ani naw khoshe gui cu k’täm gui sei, ngami naw ang thu cu ngai ci gui nei” cine ami mät ng’cecäk ci gui.

²⁸ Acun vai-am Bawipa Jesuh ah a mawng cu Kalile kho avan ung pigaw gui yung pum ah thang lawk ci.

Bawipa Jesuh naw Gaw ciah Chang Akda Gai sak ci

²⁹ Cun kawn ah Bawipa Jesuh la ang düihpüi gui cu pum im ungka lut law ba ne Simon la Andru ah im ah hteit ci gui. James la Johan phi hteit tuk ci goi.

³⁰ Simon ah akchu ah nu cu gaw ne ih phak ung ng’yän sei, Bawipa Jesuh a gawk law vai-am a nam thein ci gui.

³¹ Bawipa Jesuh naw a pei ah hteit netah, a kut ung pang ne m’tho ne gai sak sei, cun ah hnumi naw ngami cu khin chah na gui ci.

³² Khohni sip ne khomü hun law khätah, chang gui naw gawpai ci gui la khoshe ah kai gui cu Bawipa Jesuh ah om nak ah law püi ci gui.

³³ Cun ah pigaw ungka chang gui ami van law u ne, cun ah im pei ah ng’bum lawk ci gui.

³⁴ Bawipa Jesuh naw nat nak a hlü hlü ah gaw ci gui cu gai sak gui ne, khoshe gui phi k’täm gui yawp ci. Khoshe gui naw ani cu a u ah a kyak ah hmat pyi ci gui ah kyasei, Bawipa Jesuh naw ng’thu ami pyein vai ah akhin cu kä pe gui ci.

Bawipa Jesuh naw Kalile Kho ung Thu Pyein Ci

³⁵ A ngawi ung khongawi kho thai ghi ghi sei, Bawipa Jesuh cu tho ne lut law ne, a ding gei nak ah hteit ne taigü ci.

³⁶ Cun yah ung Simon la apaw gui naw Bawipa cu shui ba ci gui.

³⁷ Shui ne hmu ba u netah, “Chang akda naw ning shui ci gui nei” cine m’thein ci gui.

³⁸ Bawipa Jesuh naw, “A shin ah pigaw k’et, pigaw gui yung ah mi hteit khai. Cun ah pigaw gui yung ah phi thu ka pyein khai, acun vai ah kei ka lawk ci” cine ang düihpüi gui-am kyak na gui ci.

³⁹ Bawipa Jesuh cu Kalile kho avan ung hteit ne, pum im gui ung thu pyein ne, khoshe gui phi k’täm gui ci.

Bawipa Jesuh naw Kheilei ung Gaw ci Gai sak ci

⁴⁰ Kheilei ung gaw ciah chang tumat cu Bawipa Jesuh ah pei ah law ne, m’khukdong netah, “Bawipa nang yak hlü a om ung kei cu na theek gai sak ä” cine ng’yoi ci.

⁴¹ Bawipa Jesuh naw m’gein netah, a kut awn nüm ne tawk ne, “Kei naw kang yak hlü om ci nei, theek ne gai ä” cik ci.

⁴² Acun vai-am a nat nak maih sei, cun ah chang cu theek ne gai ba ci.

⁴³ Acun vai-am Bawipa Jesuh naw ak yä ah a hteh ba vai ah m’cäi netah,

⁴⁴ “Shin ah a mawng cu a u-am kä nam thein-en vai, taigü ng’vai ah ang ghit ah hteit ne na pumsa cu na vam hnuh vai. Cun kawn ah na theek gai ah mawng chang gui naw ami hmat vai ah Moses ah thukhän ah mäih peitnak cu na bi vai” cine m’cäi ne tüi ba ci.

⁴⁵ Cun ah chang cu hteit ba netah, a theek gai ah mawng cu van-am m’thein ne ngak ci. Cun ah a mawng cu chang van naw yat sei, ng’ya pyi ciah kyasei, Bawipa Jesuh cu a i pigaw ah phi akdei ang dang ah kä hteit hlawt ci. Ang thuh nak pigaw k’pung lam ah hteit ne om ci ci. Cun ung phi apigaw päng ungka chang akda cu a om nak ah gawk lawk ci gui.