LUKA 7 - Cho Bible Common Language 2016

Bawipa Jesuh Naw Roman Gabawi ah Changshäm Gai Sak Ci

¹ Bawipa Jesuh cu cun ah chang gui am cäi guikawn ah Kapernaum ah hteit ba ci.

² A cu ah Roman gabawi ung beit ng’yak ciah akchangshäm om ci. Ani cu si ghep ghep ne gaw ci.

³ Gabawi naw Bawipa Jesuh ah mawng ng’ya netah law ne am gai law tu ba vai ah Judah ng’vai gui tüi ne khü sak gui ci.

⁴ Bawipa Jesuh ah gawk u netah, “Shin ah gabawi cu nang naw nam gein vai ah bä ci nei.

⁵ Ani cu keimi pakhui nam hni gui ne pum im tumat phi na cawh pe gui ci nei” cine ng’coi ng’pa ne pyein ci gui.

⁶ Bawipa Jesuh cu ngami awn a täng ah hteit tu ne, gawk law ghep ghep u khätah, gabawi naw chang gui am m’cäi law gui ne, “Bawipa, bawngbai ne kä law hnga ä, kei ah kyong khui cu nang awn kä khin ci nei,

⁷ kei ka mät phi nang ah law khin ciah chang ah kä ka kyak ci, cun ah kyasei, ‘Gai sä’ na ciah khoi ung kak chang cu gai khai nei.

⁸ Kei cu ang vai ah ak ka ung ka om ci, kei ah ka ung phi gakap gui om ci gui. Ngami ungka “Htiet ä” ka ciah chang cu hteit ci, “Law ä” ka ciah chang cu lawk ci. Ka changshäm cun phi “Shin na bi vai” ka ci ung acun cu bik ci” cine pyein ci.

⁹ Gabawi ah ng’thu ng’ya netah, Bawipa Jesuh cu cäicat ne chang gui teng gui netah, ani ah mäih ah yum ci cu, Israel chang gui ung phi kä ka hmu phak ci nei” cik ci.

¹⁰ Gabawi ah tüih gui cu im ah ami gawk law ba ung changshäm cu ana gai ba pyi sei hmuk ci gui.

Hmeinu ah Hta Ghin Ba Sak ci

¹¹ Cun kawn ah Bawipa Jesuh cu ang Düihpüi gui awn ng’khap ne chang khli naw läk sei Nain gawnu ah hteit ci.

¹² Gaw m’kawt pei ah ami gawk law yah ung chang gui naw gook kawt ne ana luh law püi u sei chang akda naw ana läk lawk ci gui. Cun cu hmeinu ah a hta tumat hta te sik ciah kyak ci.

¹³ Bawipa Jesuh naw cun ah hmeinu cu hmuh ne m’gein aih netah, “Kä kyap ä” cine pyen nak ci.

¹⁴ Cun kawn ah gook cu a kut awn tawk sei, kawt ci gui cu ng’düm ci gui. Bawipa Jesuh naw, “Phäi hta, tho ba ä” ci khätah, chang k’si cu tho ne ngoh ne ng’htau ci.

¹⁵ Cun kawn ah Bawipa Jesuh naw anu-am ap ba ci.

¹⁶ Chang gui cäicat u netah mikmi ung profet mang tumat dang law pyi ci nei, Khanpughi cu akchang gui hun khai ah law pyi ci nei” cine Khanpughi cu m’hlüngtai ci gui.

¹⁷ Bawipa Jesuh ah a mawng cu Judah khopäng la a pei leng avan ung gawk yawp ci.

Tuihnim Johan ah Chang Tüih Gui

¹⁸ Johan-am ang khahpüi gui naw, a mawng avan m’thein tu u khätah ang khahpüi sing goi khü ne,

¹⁹ Bawipa Jesuh ah tüi netah, “Nang cu kyum lawk khai cine kami gin ah Bawipa ah na kyak ci ang? Kä cun ung a hei kami ging ba khai ang?” cine ng’shi sak goi ci.

²⁰ Ngani cu Bawipa Jesuh ah om nak ah law ni netah, “Nang cu Kyum lawk khai cine Johan naw a pyein ah Bawipa ah na kyak ci ang? Kä cun ung a hei kami ging ba khai ang?’ cine ning shi vai ah Tuihnim Johan naw ana tüih law goi nei” cine m’thein ci goi.

²¹ Cun yah ung Bawipa Jesuh naw chang akda cu gawpai nak natnak gui ung gai sak gui ne, khoshe phi k’täm ci, amik m’dauh phi m’dei ba sak ci.

²² Bawipa Jesuh naw Johan ah tüih law gui-am, “Hteit ba ne nami hmuh nami ng’yak cu Johan-am m’thein ba vä; amik m’dauh ci gui m’dei ba ci gui, akho ng’khem ci gui hteit ba thei ci gui, kheilei ung gaw ci gui theek ba ci gui, ak hnga pang ci gui ng’ya ba ci gui, sik ci gui ghing ba ci gui, dukhaih ciah chang gui naw ng’Thu Ni ng’ya pyi ci gui nei.

²³ Kei ah khan ah ang ngaih gep cicu yeikyai nak akda om ci nei” cine m’thein goi ci.

²⁴ Johan ah tüih law goi ani hteh ba kawn ah Bawipa Jesuh naw chang gui-am Johan ah mawng am thein gui cu, “A i nami teng khai ah ang, Johan ah om nak k’pya lün ah nami hteh? kho khi sei hnün ciah m’long kyai gui nami teng khai ma?

²⁵ Kä cun ung akni sui sa ne ng’bilawh ci gui nami teng khai ma? Akni sui ei ci gui cu bawimang ah im ung om ci gui nei.

²⁶ Kä cun ung profet nami teng khai ma? Akcang ah profet ah bä pi cicu nami hmuk khai nei.

²⁷ Cacim theing ung Khanpughi naw, “Na law nak vai ah lam ung ma lawk khai ah ka ng’shä ka tüi lawk khai nei” a cicu Johan ah kyak ci nei.

²⁸ ‘Anu ah puk ung ng’tüi lawk ciah chang gui nüng ung, Johan ah bämang pi cicu a u kä om ci nei” cine ka ning m’thein gui ci. Cun ung phi Khanpughi ah Uknak kho ung akyaw pi k’bäih cu Johan na mä bämang ba pi ci nei” cine m’thein gui ci.

²⁹ Khanpughi ah ng’thu ngai ne Johan ah tuihnim nak gah ci gui ah akhawn look ci gui la chang akda cu, acun ah ng’thu ng’ya u netah yeikyai ci gui nei.

³⁰ Cun ung phi Pharisee gui la ng’thukhän hmat ci gui läi cu, Khanpughi ah ng’yak hlü nawng ci gui ah kya ne, Johan ah tuihnim nak cu maa nak ci gui.

³¹ Bawipa Jesuh naw, “Tuhchü chang gui cu a i awn ka m’tumtäng gui khai ang? Ngami cu a i awn täng ci gui ang?

³² Ngami cu sumlei lam ung ngoh u neh, ‘Akni ah tum ung kä nami ng’lam ci, thüi kyah nak ng’äi m’cu ung phi kä nami thüi kyap ci’ cine ng’htau ci gui ah ak hmawhta gui awn täng ci gui.

³³ A i ah kyasei ci ung Tuihnim Johan law ne, ei kä ei ne, sapyit tui kä aw ne om sei, ‘Ani ung khoshe om ci nei’ nami cik ci.

³⁴ Chang ah Htapa law ne, ei ne aw sei, ‘ei aw aih ci, changshe gui la akhawn look ci gui ng’khawtsheng püi gui ci’ nami cik ci.

³⁵ Cun ung phi Khanpughi ah hmuhmat nak gah pyi ci gui naw, cun ang düng ah mawng cu dang sak ci gui nei” cine pyein ci.

Pharisee Simon ah Im ah Bawipa Jesuh Om Tuk ci

³⁶ Pharisee Simon naw Bawipa Jesuh cu mü-ei am bei tu vai ah khü sei, Bawipa Jesuh cu Simon ah im ah hteit ne ei ei vai ah ngo tuk ci.

³⁷ Cun ah gawnu ung katnak bik ciah hnumi tumat om ci. Ani cu Pharisee ah im ah Bawipa Jesuh ei ei tu ne a om tu ng’ya netah, tuing’ui um ät law püi ne, Bawipa Jesuh ah kho pei ah kyap ne ng’düi ci.

³⁸ Ang phli tui gui cu Bawipa Jesuh ah kho khan ah yu hteu khätah, alu sam awn ghu ba ci. Cun kawn ah a khaw cu ng’ui netah tuing’ui awn hluk pek ci.

³⁹ Pharisee Simon naw cun cu hmu netah, “Shin ah chang shi profet akcang ah a kyak läi ung, a khaw k’pan pek ciah hnumi cu a u ah a kiak, a i katnak bik ciah a kyak ah hmat khai süte” cine ngai ci.

⁴⁰ Cun yah ung Bawipa Jesuh naw ani-am, “Simon, ka ning m’thein vai om ci nei” cine pyein ci. Simon naw, “Bawipa nam thein ä” cik ci.

⁴¹ Bawipa Jesuh naw, “Ngui ng’pu ciah chang tumat ung ngui pu tuk ciah chang sing goi om ci. Tumat naw phia hma, tumat naw hma-kip ciah pu tuk ci goi.

⁴² Ani nik hnih naw kä thung law ba hlawt ni sei, ngui ng’pu ci naw nawng pe goi ci. Cun ung ngani ungka a u naw ngui ng’pu cicu yei na pi khai ang?” ci ng’shik ci.

⁴³ Simon naw, Ngui akdäm pi a nawng peit ah chang naw yei na pi khai ah ka ngai ci” cine pyein ci.

⁴⁴ Bawipa Jesuh naw, “Nang ah ngaih cu hman ci nei,” ci nak ci. Cun kawn ah hnumi lam ah ng’hlat netah, Simon-am, “Shin ah hnumi na hmuk ci ang? Kei cu na im kyong ah ka luh law yah ung khaw m’si nak vai kä na na pek ci. Cun ung shin ah hnumi naw ang phli tui awn ka khaw nam si ne, alusam awn ghu pyi ci nei.

⁴⁵ Nang naw kei kä na na ng’ui ci, cun ung phi shin ah hnumi naw shin ah im ung ka luh law ung tün ne kei ah khaw cu na ng’ui ci nei.

⁴⁶ Nang naw kei ah lu cu kä na na hluk ci, cun ung phi ani naw tuing’ui awn kei ah lu cu hluk pyi ci nei. Cun ah kyasei nang-am ka ning m’thein cu,’ shin ah hnumi cu hmakat nak akda ungka phyawng pyi ci nei.

⁴⁷ Cun ah a phiawn ah mawng cu, ani ah däm aih ciah a yum nak naw dang sak ci nei. Akat nak apihta bäng phiawn nak ciah chang cu a yum nak apihta bäng om ci” cine kyak na gui ci.

⁴⁸ Cun kawn ah Bawipa Jesuh naw, “Na katnak ka ning phiawn sak pyi ci nei” cine cun ah hnumi-am pyen nak ci.

⁴⁹ Bawipa awn a täng ah ei ei ci gui ah chang gui naw, “Kat nak hngaw phiawn sak hning ci, shin ah chang cu a u ang?” cine ami mät ng’cecäk ci gui.

⁵⁰ Cun ung phi Bawipa Jesuh naw, cun ah hnumi-am, “Na yum nak naw ning phiawn sak pyi ci nei, yeikyai ne hteit ba ä” cine pyen nak ci.