LUKA 2 - Cho Bible Common Language 2016

Bawipa Jesuh ah Ng’tüi Nak

¹ Cun yah ung ghangpughang Aukustus naw Roman khopäng avan ung chang sing avan khei vai ah k’bäi ci.

² Cun ah chang sing khei nak cu Kuirinius naw Siria kho a uk sang ung atün law htük ah kyak ci.

³ Chang avan cu ami ming ng’khei tuk khai gui ah ami pigaw phäh phäh ah hteit ci gui.

⁴ Josef cu Kalile kho Nazaret ungka naw, Ghangpughang David ah ng’tüi nak Judea kho Bethlehem gawnu ah hteit ci. Josef cu David ah hta ng’shon ah kyak ciah kya ne acu ah hteit ciah kyak ci.

⁵ Josef cu ng’khei tuk khai ah, akchu nak vai ah shai ami taak ah Mari awn hteit ci goi. Mari cu käu mah ci,

⁶ ngani cu Bethlehem ah ani om tu yah ung a hta nak vai ah hnüüp ng’päng law sei,

⁷ Mari cu pamihta ah hta lawk ci. Ngani cu ani im kai nak vai im kä awng ci kyasei, ak hmawhta cu yih awn hlawp ne vantang ei-ko ung m’ih ci goi.

Htomeshäm Gui La Khanpughi Gui

⁸ Cun ah kho ung htomeshäm gui cu khomü ah khodo yung ah htome ngäng ne om ci gui.

⁹ Cun sang ung Khanpughi ah khankho chang dang law ne, Khanpughi ah bämang nak cu khang law sei htoshäm gui cu ang htei ah kyik ci gui.

¹⁰ Khankho chang naw, “Kä kyikyawk vä, chang avan naw ang htei ah a yeikyai nak vai ah ng’thu Ni cu nangmi ah hmawk ah ka law püi ci nei.

¹¹ Tuhngawi David ah gawnu ung Khrit Bawipa, nami Hunbawi cu ng’tüi pyi ci nei.

¹² Ak hmawhta cu yih awn hlawp ne, vantang ei-ko ung ami m’ih cu nami hmuk khai, cun nami hmuh ung ani cu nami hmat khai nei” cik ci.

¹³ Cun vai-am chünla ciah khankho gakap gui cu khankho chang veing ne ng’dang law u netah;

¹⁴ “A hlüngtai säih Khanpughi ah bämang nak cu, khankho ah be sä, khomdek khan ung phi ding gei nak om sä, am hni ah chang gui ah khan ah m’gein nak om sä” cine Khanpughi m’hlüngtai ne ng’äi m’cu ci gui.

¹⁵ Khankho chang gui khankho ah ami hteh ba kawn ah, htoshäm gui cu ami mät ng’htau u ne, “Mikmi Bethlehem ah mi hteit khai, Khanpughi naw ana m’thein gui cu hteit ne mi teng khai” cine ng’ge u netah Bethlehem ah hteit ci gui.

¹⁶ Gawk u netah, Mari la Josef la vantang ko ung ami m’ih ah ak hmawhta cu hmuk ci gui.

¹⁷ Htoshäm gui naw akhmawhta hmu u netah, ak hmaw ah mawng khankho chang ah ng’thu cu m’thein gui ci gui.

¹⁸ Htoshäm gui ah ng’thu pyein ng’ya tuk ci gui cu cäicat ci gui.

¹⁹ Cun ung phi Mari cu acun ah mawng gui avan ngai ne shüm ba ci.

²⁰ Htoshäm gui cu Khankho chang ah pyein ah mäih ah hmu ng’ya u netah, Khanpughi ng’äi ne m’hlüngtai ne hteit ba ci gui.

Jesuh Ang Ming

²¹ Ak hmawhta cu hnüüp chih lüng sei vun-ah nak ami bi nak ah hnüüp ung “Jesuh” ah ang ming sui ci gui. Cun cu kä ami m’gai nak pha ge ung khankho chang naw sui vai ah a pyein ah kiak ci.

Ak Hmaw Jesuh Taigüim ah Apnak

²² Moses ah thukhän ah mäih ah theingcim nak bi vai akhin gawk lawk ci kyasei, ak hmawhta cu Mari la Josef naw Jerusalem ah law püi ni ne, Taigüim ah Bawipa am ap ci goi.

²³ Bawipa ah thukhän ung, “Hta htük phung cu Khanpughi-am nami ap vai,

²⁴ müm kha hnih la cholung hnih phi Khanpughi-am pe ne nami taigü vai” ciah om ci kyasei, acun ah taigü ci gui.

²⁵ Cun yah ung Jerusalem ah Simeon ming nak ciah chang om ci. Ani cu Khanpughi kyih-aa ciah chang k’ni ah kyak ci. Israel chang gui hun nak ami gah vai ah ngäng ciah chang ah kyak ci.

²⁶ Mumcha Theing cu ani awn a täng ah om ne, “Nang cu Khanpughi ah shaitaak ah Messiah kä na hmuh pha ung kä na sik khai” ci ne am cäi ah kyak ci.

²⁷ Simeon cu Mumcha Theing ah lam shüm nak awn Taigüim kyong ah lut ci. Thukhän ung om ciah mäih ah bi vai ah anu la apa naw ak hmaw ani law püi cu hmu netah,

²⁸ Simeon naw ak hmaw cu chang ne, Khanpughi am hlüngtai ah ng’thu cu;

²⁹ “Bawipa, tuhbäi na shaitaak küm pyi ci kyasei, na chang shäm cu dimdeeih nak ah hteh sak ä.

³⁰ Ka mät ah mik awn na hun phiawn nak cu ka hmu pyi ci nei,

³¹ Cun cu chang van ah ma ah nang naw na pyan m’tham ah;

³² Na ng’yak hlü dang sak ciah akdei cu chang hei gui ah hmawk ah ak khang vai la; na chang gui Israel chang gui ah bämang nak a gawk law ah hmawk ah kyak ci” cik ci.

³³ Ak hmawhta ah anu la apa cu cun ah Simeon ah ng’thu ng’ya ni netah cäicat ci goi.

³⁴ Simeon naw hrilham pe gui netah, Nu Mari-am a pyein nak cu; Israel chang da gui ami didap vai la hun nak ami gah vai ah hmawk ah shin ah ak hmawhta cu Khanpughi naw a ghü pyi nei. Ani cu Khanpughi m’hnüt nak ah kya ne, chang gui naw hnu ng’tuk püi ne ami ng’thu nak awn, ami mät ah m’lung kyong cu dang sak khai gui nei.

³⁵ Nang ah m’lung kyong cu khim ghaat awn k’tawk ah mäih ah nak khai nei” cine Mari-am pyen nak ci.

³⁶ Asher pakhui ungka Phanuel ah hta Anna ming nak ciah profet hnumi tumat om ci. Ani cu ghi law pyi ci, ak hmaw chang yah ung ceimah ne, kum chih bäng ung a cei awn om ci goi.

³⁷ Ani cu tuhbäi a khokum cheit-kip-lei-phli law pyi ci. Ani cu amü ak hnüüp Taigüim ah om ne ei hlawi ne taigü ci.

³⁸ Ak hmaw ami ap law sang ung cun ah hnumi cu gawk law netah, Khanpughi m’hlüngtai ci! Cun kawn ah Jerusalem cu hun lawk khai’ ciah ngäng ci gui ah chang gui-am, ak hmawhta ah mawng cu m’thein gui ci.

Nazaret ah Hteit Ba Ci Gui

³⁹ Josef la Mari cu Bawipa ah thukhän ami bi kawn ah ami pigaw Kalile kho Nazaret ah hteit ba ci gui.

⁴⁰ Ak hmaw cu däm ng’vai ne gaigawng ci. Ani cu cüivai lunglang ci, Khanpughi ah m’shumphyuk nak cu ani ah khan ah be ci.

Taigüim Kyong ah Ak Hmaw Jesuh

⁴¹ Bawipa Jesuh ah anu la apa cu phiawn nak pawi akhin päng ung akum tä sei, Jerusalem ah hteit ci ci goi.

⁴² Jesuh a khokum kum gha-lei-goi a law yah ung phi, Jerusalem ah phiawn nak pawi ung hteit ba ci gui.

⁴³ Cun ah pawi ng’pyi sei chang gui cu ami im ah hteit ba ci gui. Cun ung phi ak hmawhta Jesuh cu, Jerusalem ah om shüt ci. A om shüt cu anu la apa naw kä hmat ci goi.

⁴⁴ Chang gui ah ng’lung ah hteit tuk ciah ngai ci goi. Hnüüp ät mü ne hteit u netah, ami mätyah teihpüi gui ah ng’lung ah shui ba ci goi.

⁴⁵ Cun ung phi kä hmu ba ni netah, Jerusalem ah hteit ne shui ba ci goi.

⁴⁶ Ak hnüüp thum hnüüp Taigüim kyong ah Jew saya gui awn ngo u ne, ami ng’thu ngai ne, ng’shi ca gui ne kyasei hmu ba ci goi.

⁴⁷ Ani ah hmuhmat nak la ang thu gui ng’yak ciah chang gui cu ang htei ah cäicat ci gui.

⁴⁸ Josef la Mari cun phi ani hmu law ne cäicat ni netah, Anu naw, “Ka hta, a i ah kyasei shikchaa ah na kyak ang? Napa la kei naw ang htei ah ng’ä ne ka ni ning shui ba ci nei” cik ci.

⁴⁹ Jesuh naw, “Nang nu la pa, a i vai na ni na shui ba ang? Kei Kapa ah im ung ka om khai ah kä nani hmat ne ma?” cik ci.

⁵⁰ Cun a cicu ngami naw kä hmat ci gui.

⁵¹ Cun kawn ah ak hmawhta Jesuh cu anu la apa awn a täng ah Nazareth ah hteit ba u netah, anu la apa ah ng’thu ngai ne om ci. Cun ah a kiak ah mawng gui cu anu Mari naw am lung kyong ung avan htin ci.

⁵² Ak hmaw Jesuh cu däm ng’vai law ne a hmuhmat nak dämda law pi sei, Khanpughi la chang ah ma ah a hmai kiang sei om ci.